Жетісай ауданында бір күнде бес ауылға табиғи газ берілді. Салтанатты шараға Түркістан облысының әкімі Жансейіт Түймебаев арнайы қатысып, жергілікті тұрғындардың қуанышымен бөлісті. Атап айтқанда, көгілдір отынға қол жеткізген ауданның Ш.Ділдәбеков ауыл округіне қарасты Достық, Байдала, Зерделі ауылдары мен Атамекен ауылдық округіне қарасты Тыңдала және Қоғалы елдімекендері. Аймақ басшысы Достық ауылындағы газ торабын іске қосу рәсіміне қатысып, ендігі кезекте 5 мыңға жуық халқы бар бес ауыл тұрғындарының көмір тасып, күл шығармайтынын жеткізді.

«Қазақ тілі әліпбиін латын графикасына 2025 жылға дейін кезең-кезеңімен көшіру жөніндегі іс-шаралар жоспарын» іске асыру мақсатында «Латын негізді әліпби мен емле ережесі туралы насихат» жобасы бойынша көпшілікпен талқылау мақсатында «Тіл- Қазына» ұлттық ғылыми-практикалық орталығы бас директорының кеңесшісі - Оразкүл Асанғазы, Еуразия ұлттық университетінің профессоры, филология ғылымдарының докторы - Бекжан Әбдуалиұлы және Назарбаев Университетінің қауымдастырылған профессоры - Жазира Ағабекова жұмыс сапарымен Түлкібас ауданына келіп, аудан тұрғындарына семинар өткізді.

Қазақстан Республикасының «Құрметті спорт қайраткері», бокстан КСРО ІІБ бірнеше дүркін чемпионы, КСРО спорт шебері Кенебаев Шамдаулет Абжаппарұлының 80 жасқан толған мерейтойына орай Түлкібас ауданының орталығында 2004-2005 жылдары туылған жасөспірімдер арасында бокстан І-облыстық турнир бастау алды. Үш күнге жоспарланған турнирге Түркістан, Жамбыл, Қызылорда облыстары, Түркістан мен Шымкент қалалары, Ордабасы, Сайрам, Мақтарал және Түлкібас аудандарынан барлығы 150 жас былғары қолғап шеберлері қатысып өзара мықтыларды анықтайды. 

15 қараша күні Қазақстан Республикасы Президентінің жанындағы Мемлекеттік басқару академиясының Шымкент қаласы бойынша филиалы Түркістан облысы Түлкібас ауданы әкімінің қолдауымен Тұрар Рысқұлов кентінде «Бюджеттік процестер мен жергілікті өзін-өзі басқарудың коммуналдық меншігін басқару» семинарын ұйымдастырды. Семинарды Түлкібас ауданының әкімі Тұрашбеков Нұрбол Әбдісаттарұлы ашып берді. Қазақстан Республикасы Президентінің «Ұлт жоспары – бес институционалдық реформаны жүзеге асыру жөніндегі 100 нақты қадамның» 98 қадамы жергілікті өзін-өзі басқарудың дербес бюджетінің енгізілуі бойынша ауданда атқарылып жатқан жұмыстар жөнінде баяндаған Нұрбол Әбдісаттарұлы оқуға келген қатысушыларға семинардың нәтижелі өтуіне тілегін білдірді.

Қарашаның 15 күні Отырар ауданы әкімдігінің мәжіліс залында аудандық мәслихаттың кезектен тыс ХХХІ сессиясы өтті. Сессияға аудан әкімі Ерлан Айтаханов, аудан әкімінің орынбасарлары, аудандық мәслихат депутаттары, мекеме-кәсіпорын басшылары мен БАҚ өкілдері қатысты. Депутат Асан Аралбайдың төрағалық етуімен өткен сессияның күн тәртібіне Отырар аудандық мәслихатының 2017 жылғы 22 желтоқсандағы №22/106-VІ ««2018-2020 жылдарға арналған аудандық бюджет туралы» шешіміне өзгерістер енгізу туралы мәселе қойылды. 

Жұма, яғни, 16 қараша күні Отырар ауданында «Алтын күз» мерекесі салтанатты түрде аталып өтті. Мерекелік шараға қатысқан аудан әкімі Ерлан Айтаханов барша ауыл шаруашылық саласының мамандарын мерекемен құттықтап, ізгі тілегін жеткізді.

Жетісай ауданында «Алтын күз-2018» іс-шарасы тойланып, Жетісай қаласының күні мерекесі аталып өтілді. Қос мейрамға облыс әкімі Жансейіт Түймебаев қатысып, жемістер перамидасын тамашалап, сүт, нан өнімдері және ауылдық округтердің ауыл шаруашылық өнімдерінің көрмесін аралап көрді. "Алтын күз - 2018" мерекесі барысында «Бұқа», «Ләңгі», «Айыр ағашпен дәлдеу», «Көңілді старт» сынды спорттық сайыстар ұйымдастырылып, қонақтар бауырсақтан жасалған пирамидадан дәм татты.

ҚР Премьер-Министрінің бірінші орынбасары Асқар Мамин бастаған топ іссапармен Түркістан облысына келді. Астанадан келген меймандармен бірге аймақ басшысы Жансейіт Түймебаев шекара бойындағы «Жібек жолы» бақылап өткізу бекетінің жұмысымен танысты. 

Шымкентте Қазақстан мен Өзбекстан Республикаларының арасындағы өңіраралық бірінші ынтымақтастық форумы болып өтті. Қос мемлекеттің делегацияларын Бірінші Премьер-Министрлер Асқар Мамин мен Ачилбай Раматов бастады. Ал форумның басты тақырыбы - шекара маңындағы сауда-саттық пен инвестициялық және экономикалық қатынастарды дамыту. Форум барысында тараптар кең ауқымды мәселелерді, соның ішінде, Қазақстан мен Өзбекстанның іскер топтары мен өңірлері арасында өзара тиімді және практикалық ынтымақтастықты жолға қою мәселелерін талқылады. Бұдан басқа, экономиканың шикізаттық емес секторларындағы екіжақты өзара іс-қимылды дамытуға, екі елдің экспорттық əлеуетін ұлғайтуға назар аударылды.

Шымкент қаласында өткен «Қазақстан Республикасы мен Өзбекстан Республикасы арасындағы өңіраралық бірінші ынтымақтастық форумында» Түркістан өңірі өзбек елінің Жизақ, Ташкент облысы және Ташкент қаласымен меморандум түзді. Басқосуда Түркістан облысының әкімі Жансейіт Түймебаев пен Жизақ облысының әкімі Эргаш Салиевпен екі ел арасындағы сауда-экономикалық және инвестициялық ынтымақтастықты нығайту жайын талқылады.