Сайрам ауданындағы Қарабұлақ ауылы республикамыздағы етті мал өсіру бойынша алдыңғы қатарда тұр. Қарабұлақтық шарулар бүгінде өз өнімдерін еліміздің ірі қалаларынан бөлек Өзбекстанға да ірі көлемде саудалап жатыр. Жуырда мал шаруашылығы саласындағы озық тәжірибелерді үйрену үшін бір топ мақтааралдықтар Қарабұлаққа іссапармен барды. Ауданның әр округінен жиналған шаруаларды аудандық ауыл шаруашылығы бөлімінің басшысы Өсер Мырзамданов пен осы бөлімнің бас маманы Талғат Каленов бастап жүрді. Бұл «AQ-QARA.KZ» ақпарат агенттігі хабарлайды аудан әкімінің баспасөз қызметіне сілтеме жасап. 

Түлкібас аудандық қоғамдық денсаулық сақтау басқармасында «Эпидемиологиялық маңыздылығы бар нысандар құрылысына қойылатын талаптар» тақырыбында арнайы дөңгелек үстел болып өтті. Эпидемиологиялық маңыздылығы бар нысандарға – барлық түрдегі мектепке дейінгі дейінгі тәрбиелеу және оқыту объектілері, соның ішінде балабақшалар жататынын айта кетейік. Жиын барысында санитарлық талапқа сай салынбаған балабақшалар мәселесі де талқыланды.

Кентау қалалық мәдениет және тілдерді дамыту бөлімі «Тіл-қазына» орыс тілінің білгірлері арасында көркемсөз оқу шеберлерінің байқауын жариялайды. Байқаудың мақсаты Елбасының «Болашаққа бағдар: рухани жаңғыру» мақаласы аясында орыс тілін жетік меңгерген қабілетті жастарды анықтау және қолдау, тілдік қарым-қатынас мәдениетін қалыптастырып, көп тілді меңгерген тұлғаны тәрбиелеу, өзге халықтардың мәдениеті мен тілін құрметтеу болып табылады.

Түркістан қаласындағы «TÚRKISTAN MEDIA» халықаралық орталығында орналасқан Өңірлік коммуникациялар қызметінде  ақпарат кеңістігіндегі тұңғыш цифрлық «Ulys» журналының таныстырылымы өтті. Аталған жиынға Қазақстандағы алғашқы электронды «Ulys» журналының бас редакторы Ержан Қалымбай, философия ғылымдарының кандидаты Жанат Момынқұлов,  басылымның техникалық директоры Болат Әскер, сондай-ақ облыстық ішкі саясат, мәдениет саласының мамандары мен баспасөз өкілдері, студенттер қатысты.

Түркістан облысының әкімі Жансейіт Түймебаев «KK-KIUNSEN» компаниясының директоры Джон Енг Сун бастап келген делегациямен кездесті. Басқосуда тараптар Түркістан облысында инвестициялық жобаларды жүзеге асыру жайын ақылдасты.

Елбасының «Болашаққа бағдар: рухани жаңғыру» мақаласы аясында Арнаулы кәсіптік колледж студенттерінің Кентау қаласының кәсіби әншілермен тәжірибе алмасу, халық әндерін насихаттау, сонымен қатар ән өнеріне деген қызығушылығын арттыру және қолдау көрсету мақсатында қалалық мәдениет және тілдерді дамыту бөлімінің бірлесіп ұйымдастыруымен «Жүректерге жол тапқан – екі жұлдыз» ән байқауы өтті.

Түркістан қаласына «Латын негізді әліпби мен емле ережесі туралы насихат» жобасы бойынша ғалымдардан құралған насихаттық топ келді. Белгілі мемлекет және қоғам қайраткері Оразкүл Асанғазықызы, Назарбаев Университетінің профессоры Жазира Ағабекқызы бастаған топ әуелі Түркістан облысы әкімі Жансейіт Түймебаевпен кездесті. Басқосуда ҚР Мәдениет және спорт министрлігі Тіл саясаты комитеті және Ш.Шаяхметов атындағы «Тіл Қазына» ұлттық ғылыми-практикалық орталығының ұйымдастыруымен облыста өтетін семинарлар барысы баяндалды. Бұл туралы «AQ-QARA.KZ» ақпарат агенттігі хабарлайды «ontustik.gov.kz» порталына сілтеме жасап. 

Ағымдағы жылдың 9 айының қорытындысы бойынша Түркістан облысының 300-ден астам өнеркәсіп кәсіпорны 323,9 млрд. теңгенің өнімін өндіріп, нақты көлем индексі 97 пайызды құрады. Бұл туралы Түркістан облысының өңірлік коммуникациялар қызметінде өткен брифингте Кәсіпкерлік және индустриалды-инновациялық даму басқармасының басшысы Ғанибет Әубәкіров мәлімдеді. 

2018 жылдың 1 қазанындағы мәліметке сүйенсек, Түркістан облысында тіркелген шағын және орта кәсіпкерлік субъектілері саны - 140 992, оның жұмыс істеп тұрғаны - 129 424. «Бизнестің жол картасы 2020» бағдарламасы аясында 2010 жылдан қазіргі таңға дейін 43 млрд. теңгеге 1500 жобаға қаржылай қолдау көрсетілген. Нәтижесінде 6 мыңнан астам жаңа жұмыс орындары құрылып, бюджетке 63 млрд. теңгенің салығы түскен. Бұл туралы Түркістан облысының өңірлік коммуникациялар қызметінде өткен брифингте Кәсіпкерлік және индустриалды-инновациялық даму басқармасының басшысы Ғанибет Әубәкіров мәлімдеді. 

Жетісай ауданының әкімі Жамантай Бейсенбаев алматылық «Прометей» және испаниялық «Корбелл» компаниясының өкілдерімен кездесті. Кездесу барысында тараптар Жетісай ауданынан 25 гектар жерге тәжірибе ретінде зәйтүн бағын егу мәселесін талқылады.