Мектеп директоры Арман Қарсыбаев өз шәкірттерінің үздік нәтиже көрсетіп, биік белесті бағындырған ерліктерін көп алдында атап өтіп, «Алғыс хаттармен» және бағалы сыйлықтармен марапаттады. Мұндай құрмет гір көтеру спортының жаттықтырушысы Мұхан Әбдірахановқа да жасалды.

– Сендердің есімдерің гір көтеру спортынан шыққан тұңғыш әлем чемпиондары ретінде ауданның тарихында да, біздің спорт мектебінің тарихында да қалатын болады. Қазіргі таңда Түркия елінде қол күресінен әлем чемпионаты басталып жатыр. Бұл дүбірлі жарысқа да біздің мектептің спортшылары қатысып, еліміздің құрама сапында өнер көрсетуде. Шәкірттеріміз бұл сайыстан да үлкен олжамен келеді деп отырмыз. Жеңістерің тағы да құтты болсын! – деді Арман Романұлы.

Айта кетейік, Шардара топырағында жаз айында ашылып, өз жұмысын бастаған облыстық №4 олимпиада резервіне мамандандырылған балалар-жасөспірімдер спорт мектебінде бүгінгі таңда барлығы 1200 оқушы жаттығады. Олардың арасынан Медет пен Нұрболаттың, Бақдәулеттің жеңісті жолдарын жалғастыратын жеңімпаз ұл-қыздар шыға беретініне спорт мектебінің ұстаздары бек сенімді.

«AQ-QARA.KZ»-ақпарат.