Халықаралық сайыс жағымды жаңалықпен бастау алды. Спорт кешені қосымша 4 жаңа нысанмен толығып, Азия бойынша ең ірі стенд ату алаңына айнылып отыр. Ату алаңдары толық электронды. Барлық заманауи жабдықтармен қамтылған. Халықаралық стандарттарға толық сай. Биылдыққа екінші рет осы турнирге қатысып отырған, әлемдік жарыстарда жоғары орындардан түспейтін, Италия мемлекетінен келген аға жаттықтырушы Даниел Лучиди өзінің таңданысын жасыра алмады.

Қалада ату спортының даму тарихында бұл турнир 28-ші рет өткізіліп, еліміздің тәуелсіздігімен қатар қадам басып келеді. 2018 жылдан бері турнир ISSF Спорттық ату түрлерінен Халықаралық Федерациясының күнтізбелік жоспарына енгізілген.  Бұл жарысқа әлемнің 6 елінен – Италия, Қырғызстан, Ресей, Тәжікстан, Өзбекстан, Қазақстаннан Нұр-Сұлтан, Алматы, Шымкент қалалары мен Жамбыл, Қарағанды, Қызылорда, Маңғыстау, Павлодар облыстарынан жалпы саны 200-ден астам спортшы қатысуда.

Айта кетейік, бұл жарыста Азия ойындары, Азия Чемпионаттары мен «Азия балалары» халықаралық спорттық ойындарының чемпиондары мен жүлдегерлері өз шеберліктерін көрсететін болады. Жарыс қорытындысы 28 қазан күні белгілі болмақ.

«AQ-QARA.KZ»-ақпарат.