Расын айту керек, жең ұшынан жалғасқан сыбайлас жемқорлықпен күрес «Ет тәттілігін қойса, мысық та ұрлығын тияр еді» дегеннің керін келтіріп тұр. Бірақ одан ет тәттілігін қоя салмайды. Мысық та ұрлығын тыймайды. Иә, бұл жан-жануарлардың хайуани түйсігіне байланысты айтылған тәмсіл ғой. Алайда түпкі мақсат – бұл мысалдан саналы адамдар, жұмыр басты пенделер сабақ алсын дегенді ұқтыру. Өкінішке қарай, «Ашыққаннан құныққан жаман» демекші, ашкөзденген адамдар бабалардан қалған, әбден сүзгіден өткен мұндай дана ойлардың тұңғиығына терең бойлап, басын ауыртқысы да келмейтін болған. Тіпті дәл осындай мысалдың мыңын айтыңызшы, пысқырып та қарамайды. Орайы келіп тұрса, «орып» қалуға тырысады. Қойны-қонышына ақша кіргенде, оның буымен ақыры қалай боларын ойланып та жатпайды. Әттең!..