Алдымен әкімшілік-іскерлік орталығында салынған 320 орындық «Атамекен» балабақшасы ел игілігіне берілді. Бөбекжай соңғы талаптарға сай, заманауи құрылғылармен жабдықталған. Мұнда әр топқа арналған ойын алаңшалары, қысқы-жазғы шомылу бассейндері бар. Сонымен қатарбалалардың қауіпсіздігі үшін барлық бөлмелерде және аумағына бейнебақылау камералары орнатылған. Жас өрендердің тәрбие алуына және олардың бойына білімнің алғашқы негізін қалауға қажетті жағдайдың барлығы жасалған. Жаңа балабақшада 100-ден астам жұмыс орны құрылып отыр.

Мұнан кейін Сайрам тұрғын алабында 900 орындық жекеменшік «Арафат» жаңа мектебінің лентасы қиылды. Мектепте балалардың толыққанды білім алуына, салауатты өмір салтын қалыптастыруға барлық жағдай жасалған.  Білім ордасында оқушылардың қолөнермен, тігін тігумен айналысуына, түрлі өнер үйірмелері мен спорттық шараларға қатысуына мүмкіндігі бар.

Айта кетейік, шаһарда ұзын-ырғасы мемлекеттігі бар, жекеменшігі бар 147 мектеп болса, оларда қазіргі таңда 200 мыңға жуық бала білім алады. Алжыл сайын мектепке баратын бала саны 20-25 мыңға артып келеді.  Бұл дегеніміз жыл сайын жаңа мектептер салуға мұқтаждық барын аңғартады. Яғни мектеп мәселесін шешуде орта білім саласына жекеменшік капиталды тарту қажет-ақ.

ҚР Білім және ғылым министрлігінің жаңа жүйесі бойынша осындай кәсіпкерлер тарапынан салынған мектептерге мемлекеттік тапсырыс бойынша жан басына шаққанда қаражат төленеді. Бүгінде бұл жүйеге қаладағы бірқатар мектептер көшкен.

«AQ-QARA.KZ»-ақпарат.