Дендросаябақта өткен салтанатты шараға тұрғындар көп жиналды. Оларды мыңға жуық мектеп оқушысы қарсы алды. Көрермендер алдымен жас домбырашылардың ерекше флешмобын тамашалады. Мыңға жуық өнерпаз бір мезетте қазақтың күйін орындады.

Бұдан кейін дендросаябақта ұлттық музыкалық аспаптар көрмесі ұйымдастырылды. Қолөнер шеберлері қала тұрғындары мен қонақтарының назарына өздері жасаған ұлттық бұйымдар мен кәдесыйларды ұсынды. Олардың арасында домбыра жасаудың шебері Сәдібеков Қожабек те өзі жасаған домбыраларды көрмеге қойды.

Мерекелік бағдарлама мұнымен шектеліп қалмады. Дендросаябақта домбыра жасаудан шеберлік сағаты ұйымдастырылды. Қалаған адам сондағы шеберлерден ұлттық музыкалық аспаптың жасалу жолдарын тамашалай алды. Бұған қоса саябақта домбыра күніне арналған концерт өтіп, Шымкент қаласының барлық қоғамдық көліктерінде домбырамен күй тартылып, термелер орындалды. Сондай-ақ қаладағы кітапханаларда да мерекелік іс-шаралар жалғасын тауып жатты.

«AQ-QARA.KZ»-ақпарат.