Қазақстан Республикасының Қаржы министрлігі Шымкент қаласына республикалық маңызы бар қала мәртебесі берілуі мен Түркістан облысының пайда болуына байланысты республикалық бюджеттің қалай өзгеретінін түсіндіріп берді.
Шымкент қаласының мемлекеттік қызметшілерінің еңбекақылары Қазақстан Республикасының орталық мемлекеттік органдарының деңгейіне дейін көтеріледі. Қазақстан Республикасы Парламентінің Мәжілісінде Қазақстан Республикасының Қаржы министрі Бақыт Сұлтанов жаңа Түркістан облысын қалыптастыруға байланысты бюджетке өзгерістер енгізудің және Шымкент қаласына республикалық маңызы бар қала мәртебесін берудің шарттары туралы әңгімеледі.
Шымкент қалалық мәслихатының кезектен тыс жиырма тоғызыншы сессиясында депутаттарға Шымкент қаласы халқының бір миллионға жетуіне орай, қалаға мегаполис статусын беру ұсынылды. Аталған ұсынысты қолдаған халық қалаулылары Шымкент қаласына республикалық маңызы бар қала мәртебесін беру туралы шешімге бүгінгі өткен сессия отырысында қала әкімдігімен бірлесе тарихи құжатқа қол қойды. Енді бұл құжат Оңтүстік Қазақстан облыстық мәслихатының қарауына ұсынылады.
Мамыр айында Астанада өткен экономикалық форумда мемлекет басшысы өз сөзінде «Егер бізде бұған дейін миллион тұрғыны бар тек Алматы қаласы болса, қазір үш мегаполисіміз бар – Алматы, Астана және Шымкент қалалары»,-деген болатын. Осы мәлімдемеден кейін Шымкент облыс орталығы мәртебесін сақтап қала ма әлде республикалық маңызы бар қалаға айнала ма деген сауалдар жиі қойыла бастады.