Бүгінде облыс тұрғындарын заңсыз жер берілуі, қараусыз қалған ауыл ахуалы мен жауапсыз қалған арыз-шағымдар мәселесі мазалайтын көрінеді. Осындай мәселелермен танысу үшін Түркістан облыстық Әдеп жөніндегі Кеңес мүшесі, республикалық «Егемен Қазақстан» газетінің Түркістан облысы бойынша тілшісі Ғалымжан Елшібаев өңір тұрғындары арасында жеке қабылдау өткізді.
Жетісай ауданында жыл басынан бері 9 мыңға тарта отбасы әлеуметтік көмек алған. Олардың ішінде 2471 отбасы сәуір айында Елбасы тапсырмасымен тағайындалған бала басына берілетін 21 мың теңгеге қол жеткізіпті. Еңбекқор аймақ халқының көбі алған қаражатты бірден басқаға жаратпай кәсіп ашуға жұмсаған көрінеді.
Шардарада атаулы әлеуметтік көмектің шартты түрін алып, шаруасын ашқандардың қатары күн санап артып келе жатыр. Әлеуметтік аз қамтамасыз етілген және көпбалалы отбасыларға мемлекеттен берілетін атаулы әлеуметтік көмек көптеген жандардың өз кәсібін ашып, жұмыссыздықты жоюда үлкен рөл атқаруда. Шардара ауданында бұл бағытта атқарылып жатқан ілкімді істер аз емес.
Елбасымыз «Қазақстан экономикалық, әлеуметтік және саяси жедел жаңару жолында» «Жасыл ел» бағдарламасын жүзеге асыруды тапсырған болатын. Бұл бағытта Түлкібас ауданының жастары белсенді жұмыс атқаруда. Бос уақыттарын тиімді өткізіп, кешенді бағдарламаның жүзеге асуына септігін тигізіп отыр.
Арыстағы бірінші сектор Атырау облысы мен Жетісай ауданына берілген аймақ. Онда барлығы 482 үй бар. Ал 50 үйдің құрылысы қайта салынуда. Қазіргі таңда құрылыстар қарқын алып, тұрғындар қоныс тойларын тойлайтын күн де жақын. Ал, одан бөлек арнайы штаб қызметкерлері де өз міндеттеріне сай жұмыстар атқаруда.
Кентау қаласына қарасты Иқан ауылында жол мәселесі оң жолға қойылған. Бүгінде «Ауылым - алтын бесігім» бағдарламасы аясында 2 көшеге асфальт төсеу жоспарланған. Бүгінде жөндеу жұмыстары қарқынды жүріп жатыр.
Мақтаарал ауданында «Жас кәсіпкер» жобасына 76 азамат қатысып білім алудың алғашқы легін бастады. Жастар кәсіпкерлігін дамыту және қолдауға бағытталған бастама Атамекен Ұлттық кәсіпкерлер палатасының ұйытқы болуымен жасалған. Игі шараға аймақтан қызығушылық танытқандардың саны артуда. Қазірдің өзінде 400-ге жуық кәсіп ашам деген ниетті тұрғындар өз өтініштерін білдерген.
Түркістан қаласы әкімдігі газдандыру бойынша қарқынды жұмыстар жүргізіп жатыр. Мәселен, «Иассы» шағынауданы, «Ыждыхат» тұрғын үй массивін газдандыру бойынша айта өтсек. Мұндағы абонент саны – 4161 үй. 112,1 шақырым газ құбыры монтаждалды.