Жақында Премьер-министр Бақытжан Сағынтаевтың төрағалығымен Үкімет отырысы өтті. Селекторлық жиында еліміздегі «ақылды қалалар» жобасын іске асыру мәселелері қаралды. Олардың арасында Шымкент қаласы да бар. Бұл туралы Премьер-министрдің ресми сайты хабарлады.
Шымкент қаласындағы 128 мектептің барлығында "Күнделік" электронды журналы мен күнделік жүйесі енгізілген. Соның нәтижесінде шаһардағы оқушылар арасындағы тәртіп бұзушылық деңгейі 75%-ға азайды.
Шымкент қаласы аумағындағы 459 балабақшаға бүлдіршіндер автоматты түрде қабылданады. Аталмыш жүйе балабақшаға кезекке тұру мен жолдама беруге, сондай-ақ балабақша ауыстыруға мүмкіндік береді.
Шымкент қалалық білім бөлімінің мәліметінше, 2017-2018 оқу жылында Шымкент қаласы бойынша 121 жалпы орта білім беретін мектепте 11 сыныпты 7987 оқушы бітірді. Оның 5424-і – қазақ, 1422-сі – орыс, 1141-і – өзбек сыныптарының бітірушілері. 287 бітіруші – «Алтын белгі», 203 бітіруші – «Үздік аттестат» иегері.
Таяуда Шымкенттегі Мұхтар Әуезов атындағы университеті бітіруші түлектерге арнап салтанатты кеш ұйымдастырды. Онда 444 түлек үздік дипломмен марапатталды. Мегаполистің қақ ортасындағы Әл-Фараби алаңында өткен аталмыш іс-шараға қала әкімі Ғабидолла Әбдірахымов қатысып, үздіктерге дипломды өзі табыстады.
Биылғы оқу жылында Шымкент қаласында 7987 түлек мектепті тәмамдап, соның ішінде 5446 түлек ҰБТ тапсырды. Соның ішінде 5422 түлек тест тапсыру орнына келген. Биылғы ҰБТ нәтижесі бойынша Шымкент түлектерінің орташа көрсеткіші 83,6 балды құраған. Қалалық білім бөлімінің мамандары осылай деп хабарлап отыр. Солардың арасында 138 балл жинаған екі түлек бар. Олар - Шымкенттегі №35 мектептің түлегі Гүлдана Мейірбек және №23 мектептің 11 сыныбын тәмамдаған Тұран Азым.
Үш ауысымды мектептердің пайда болуы мүмкін екендігінің себебін мамандар бала санының артуымен байланыстырып отыр. Тіпті орынның жетіспеуінен жеке ғимараттарды жалға алуға мәжбүр екен. Әйткенмен тығырықтан шығудың жолын іздеген қалалық білім бөлімінің қызметкерлері қазынадан қыруар қаржы бөліп, тозығы жеткен мектептерді күрделі жөндеуден өткізуге кіріскен. Олар мүмкіндігінше білім ұясының аумағында қосымша құрылыс жүргізуді жоспарлапты.
Биылғы оқу жылында Шымкент қаласы бойынша жаңадан 5 мектептің тұсауы кесілмек. Әзірге шаһарда 10 білім ошағының құрылысы жүргізіліп жатыр. Бұдан бөлек екі мектептің құрылысын бастау үшін тиісті құжаттары әзірленуде. Ал қыркүйек айында пайдалануға берілетін мектептердің құрылысы бүгінде қызу жүріп жатыр.
Жаңа мектептің бірі «Шаңырақ» шағынауданынан бой көтеруде. Аты меңзеп тұрғандай, мұнда негізінен қазақ топырағын аңсап, сырттан қоныс аударған қандастарымыз тұрады. Олардың ұл-қыздары бірнеше жылдан бері өзге білім ошақтарына қатынап оқитын. Енді биылғы қыркүйек айынан бастап 600 орындық мектеп бұйырмақ. Мердігерлер бүгінде «Нысан құрылысының 85 пайызын аяқтадық» деп сендіріп отыр. Әйткенмен қаражат мәселесінде қолбайлау болып тұрған жайттардың барын да жасырмады.
Ал құрылысы 2017 жылдың қазан айында басталған тағы бір білім ошағына 1 миллиардқа жуық теңге қаралыпты. 3 гектар аумақта еңсе тіктеп жатқан мектеп, сала мамандарының айтуынша, 2019 жылға өтпелі екен. Бір қуанарлығы, бұл нысанда мүмкіндігі шектеулі оқушылар үшін қолайлы жағдай жасалып жатыр. Жеделсаты мен арнайы әжетхана бөлек салынуда.
Құрылыс жұмыстары келер жылға өтпелі саналатын тағы бір мектеп Әкімшілік-іскерлік орталығында орналасқан. 1200 орындық білім ошағының құны 1 миллиард 600 миллион теңгеге бағаланған. Биыл 1 миллиард 300 миллион теңге игеріледі деп жоспарланған. Жалпы, қалалық білім бөлімінің «Осы қарқыннан таймасақ, 2019 жылы Шымкент қаласында үш ауысымда білім беру мәселесі түбегейлі шешіледі» деген болжамы бар.
«AQ-QARA.KZ»-ақпарат.