– Әлеуметтік нысандар, әсіресе, мектептер, денсаулық сақтау мекемелері жылыту маусымына 100 пайыз дайын болуы керек. Әрбір ғимаратты тексеріп, жұмыс жүргізіңіздер. Білім, денсаулық сақтау, спорт, мәдениет саласына жауапты басқармалары бюджеттік мекемелердің жылыту маусымына дайындық жұмыстарын жүргізсін. Бюджеттік мекемелер қажетті қатты отын қорымен қамтамасыз етілсін. Аудан, қала әкімдері, барлық нысандардың, жылу қазандықтардың жылыту маусымына дайындығын пысықтаңыздар. Жылыжай бойынша былтырғы кемшіліктер қайталанбауы тиіс. Жұмысты жауапкершілікпен атқарыңыздар, – деді Дархан Сатыбалды.

Облыстық энергетика және тұрғын үй-коммуналдық шаруашылық басқармасы басшысының міндетін атқарушы Роза Сариеваның айтуынша, Түркістан облысында алдағы жылу беру маусымына дайындық жұмыстары жүргізілуде. Жалпы облыста 1733 көпқабатты тұрғын үй бар. Орталықтандырылған жылумен қамтамасыз етілетін 686 көпқабатты тұрғын үйдің 574-і жылыту маусымына дайын.2448 бюджеттік мекеменің жылыту маусымына дайындалғаны – 515. Өңірде196 білім мекемесі, 245 денсаулық сақтау мекемесі, 12 спорт нысаны, 58 мәдениет нысаны қысқа дайын. Жұмыстар жалғасуда.

Облыс бойынша көмір отынының қажеттілігі 1 млн. 154 мың тоннаны құрап отыр. Оның ішінде коммуналдық - тұрмыстық қажеттілігі – 245,1 мың. тонна. Тұрғындар мен жылыжайларға қажетті көмір – 908,9 мың тонна. Қазақстан Республикасы Индустрия және инфрақұрылымдық даму министрлігінің бекітілген іс-шаралар жоспарына сәйкес, бюджеттік мекемелер көмір сатып алуды 2023 жылдың 15 тамызына дейін аяқтауы тиіс. Бүгінгі таңға облысқа тасымалданғаны – 121,5 мың тонна (11%).Жиында жылыжайларды көмірмен қамту мәселесі де сараланды. Облыстық ауыл шаруашылығы басқармасының басшысы Тұрғанбек Оспановтың хабарлауынша, Түркістан облысында 1517 гектарды құрайтын 3366 жылыжай бар. Жылыжайлардың негізгі бөлігі Сарыағаш ауданында – 812 га (54 %).

Өткен жылы ауа райының күрт суытуы салдарынан жылыжайларда бірқатар мәселе туындаған. Осыған байланысты облыс әкімінің тапсырмасымен біраз жұмыс атқарылды. Нәтижесінде ҚР Ауыл шаруашылығы министрлігі тарапынан жылыжайларда пайдаланылған электр энергиясы мен газ шығындары ішінара субсидиялау Қағидасы әзірленуде. Бюджеттік бағдарлама 2024 жылдан бастап қолданысқа енгізіледі. Қазақстан Республикасы Сауда және интеграция министрлігінің ұсынысына сәйкес, көмір отынын өндірушілерден тауарлық биржа арқылы жылыжай шаруашылықтарына тікелей сатып алу механизмі пысықталуда. Осы биржа арқылы жылыжай шаруашылықтарын бір қолдан көмір отынмен қамтамасыз ету үшін Сарыағаш ауданында «Zhylyzhai otyn» ауыл шаруашылығы өндірістік кооперативі құрылды.

Жүргізілген талдау жұмыстарына сәйкес, облыс аумағында көмір отынымен жылытылатын 575,4 гектар жылыжайға 282,9 мың тонна көмір қажет екені анықталып отыр. Мәжілісте басқарма басшылары мен аудан, қала әкімдеріне жылыту маусымына дайындық және жылыжайларды көмірмен қамту бойынша тапсырмалар беріліп, хаттамаға енгізілді.

Түркістан қаласының жылу саласы «Жылу» мемлекеттік коммуналдық кәсіпорны арқылы жүргізіледі. Кәсіпорын шаһардағы 222 көпқабатты тұрғын үйді жылумен қамтуда. Олар: І және ІІ-ші мөлтек аудандағы 75, Отырар мөлтек ауданында 49, Әкімшілік іскерлік орталығында 98 көпқабатты тұрғын үйді құрайды. Жылу беру маусымы 2023-2024-не дайындық қала әкімінің күнделікті бақылауында. Биылғы жылы облыс орталығында 1-қарашадан жылу беру басталады деп жоспарланған. Жалпы жылу беру үшін мекемеде 17 дана қазандық іске қосылған. Аталған модуельды қазандық блоктары табиғи газ арқылы жұмыс істейді.

Жылу энергиясының тарифтік көрсеткіші дифференцировандық түрде Қазақстан Республикасы Ұлттық экономика министрлігі Табиғи монополияларды реттеу комитетінің Түркістан облысы бойынша департаментінің бұйрығымен бекітілген. Оның ішінде І және ІІ -ші, Отырар мөлтек аудандар және Мәдени рухани орталығында орналасқан жеке тұлғалар үшін 1 м² -92.46 теңге, 1 Гкал -2640.46 теңгені құраса, ал заңды тұлға үшін 1 Гкал – 5999.28 теңге болып бекітілген. Сондай-ақ, Әкімшілік іскерлік орталығында жеке тұлға үшін 1 м² -140.85 теңгеден 166.42 теңгеге дейін әр модуельды қазандық блоктарына бөлек жасалған, ал есептегіш құралы бойынша1 Гкал – 4535.85 теңгеден 5556.59 теңгеге дейін, ал заңды тұлға үшін 1 Гкал – 12637.85 теңге болып белгіленген. Ыстық сумен қамтамасыз ету үшін 1 м³ ыстық суға – 355.92 теңге жұмсалады.

Стастистикаға сүйенсек, мекемеге заңды тұлғалар 1.6 млн теңге, жеке тұлғалар 25.611 млн теңге берешектігі анықталған. Қазіргі таңда жеке тұлғалардан мәжбүрлеп өндіру мақсатында сот тәртібімен құжаттар рәсімделіп, шешімдеріне сәйкес өндіру үшін сот орындаушыларына жолдануда. Сонымен қатар, қала аумағындағы газ құбыры жүргізілген аймақтардың 98% көгілдір отын қолданып отыр. Түркістан қаласы Төтенше жағдайлар басқармасы қызметкерлері, "ҚазТрансГаз" АҚ, Газинспекциясы мамандары және сектор меңгерушілерімен бірге жылыту маусымына дайындық ретінде тұрғындардың газ қазандықтарын тексеру жұмыстары жүргізіп тұрады.

Осындай іс-шара барысында тұрғындарға жылыту маусымындағы газ қолданудың қауіпсіздік ережелері бойынша үгіт-насихат жұмыстары жүргізіліп, арнайы дайындалған жадынама парақшалары таратылуда. Қазіргі таңда газ қолданып отырған тұрғын үйлердің жылу беру маусымындағы техникалық мүмкіндігі жеке-жеке тексерілуде. Жылу беру техникалары ескірген, қауіпсіздік талаптарына сай емес құралдарды қолданыстан шығару жүргізілуде. Сонымен қатар, газ қолданып отырған тұрғын үйлерде газ тұтыну кезіндегі қауіпсіздік ережелері түсіндірілуде.

«AQ-QARA.KZ» - ақпарат