Әкім орынбасарымен бетпе-бет кездесуге Ордабасы, Сайрам, Отырар, Созақ, Жетісай аудандары мен Түркістан қаласының тұрғындары арнайы келді. Шағымдар мен ұсыныстардың басым бөлігі: білім, мәдениет, және ақпараттық салаларға қатысты болды. Атап айтқанда, мектептерді күрделі жөндеуден өткізу, жаңа білім нысандарын салу, мекемелерге басшы тағайындау, мәдениет үйлерін жөндеу бойынша қаржыландыру, негізсіз жұмыстан босату жөнінде талаптар зерделеніп, сондай-ақ пилоттық жобалар ұсынылды.

Азаматтармен кездесуге облыс әкімдігіне қарасты жауапты басқарма басшылары мен орынбасарлары, аудан, қала әкімінің орынбасарлары шақырылып, көтерілген проблемалар мен туындаған сұрақтар қаралды. Талқылай келе, Бейсен Дәулетұлы мұң-мұқтажын жеткізген тұрғындардың өтініштерін қайта сараптап, жауап жолдауды тапсырды.

— Мен ай сайын облыс тұрғындарының талап-арызына құлақ түру үшін қоғамдық қабылдауды тұрақты түрде өткіземін. Бүгін де жетекшілігімдегі салалар аясында арыз-талаптарды қарадық. Қабылдауға келгендердің бірі ауылдың проблемасын арқалап келсе, енді бірі жеке мәселесінің шешілуін сұрайды. Көп жағдайда белсенді азаматтарымыз өзекті әрі күрделі түйткілдерді қозғап, халық мүддесі үшін шырылдап, алаңдайды. Оларды мұқият тыңдап, мемлекеттік органдардың ресми жауабына сүйене отырып, заң аясында қарастыруға қаншалықты мүмкіндік бар екенін анықтадық, - деді Б.Тәжібаев.

Сондай-ақ, Түркістан облысының «Ашық әкімдік» кеңсесінде облыс әкімінің орынбасары Ермек Кенжеханұлы да азаматтардың мәселелеріне құлақ түріп, жауапты сала өкілдерімен талқылады. Қабылдауға 20-дан астам тұрғын жазылып, өз талап-тілектерін жеткізді. Өңірдің Сауран, Сайрам, Сарыағаш, Келес, Отырар, Мақтаарал, Ордабасы, Бәйдібек аудандары, Арыс және Түркістан қаласының тұрғындарына бөлек, Маңғыстау облысынан келген бір топ азамат өз ұсыныстарын айта келді.

Олардың басым бөлігі ауыл шаруашылығы, жер қатынастары, кәсіпкерлік, әлеуметтік салалар бойынша өз өтініштерін білдірді. Облыс әкімінің орынбасары әр өтінішті мұқият тыңдап, заңдылыққа сәйкес қаралатынын мәлімдеді. Облыстық салалық басқармалар, аудан, қала әкімдіктеріне тапсырмалар жүктеліп, хаттамама негізінде өтініш иелеріне жауаптар жолданады.

— Ашық әкімдік алаңында облыс тұрғындарының арыз-шағымдары бойынша онлайн-офлайн форматта қоғамдық қабылдау өткіздім. Қабылдауға келген азаматтар жер қатынастары, жұмыспен қамту және әлеуметтік бағдарламалар, ауыл шаруашылығы, сонымен бірге, кәсібін дөңгелетуге қатысты өтініштерін білдірді. Әрбір тұрғынның жеке мәселесін тыңдап, тиісті сала басшылықтарымен заңдылықтарға сәйкес шешу жолын ұсындық.

Қордаланған мәселе көп. Ел ішіндегі кейбір проблемалар ақпарат, мәліметтің жоқтығынан, тіпті кейбірі өз құқықтарын заң аясында шешу жолын білмегендіктен туындаған. Кейбіреулер өз мәселесі бойынша қандай мекемеге барып, кө­мек сұрарын білмегендіктен, тікелей келгенін айтуда. Осы тұста аудан әкімдіктері, сала басшыларына тиісті тапсырмалар беріліп, халықпен тығыз жұмыс істеуді тапсырдым.

Әрине, оларды шешуде уақытты қажет ететін мәселелер бар, қабылдауға келген облыс тұрғындарының өтініштері толық шешімін тапқанға дейін менің бақылауымда болады. Белсенді азаматтық қоғамның көмегімен ғана біз бірлесіп мінсіз құқықтық, ашық мемлекет құра алатынымызға сенімдімін, — деді Ермек Кенжеханұлы.

Мұнымен қоса, Сарыағаш ауданына Түркістан облысы әкімінің бірінші орынбасары Зұлпыхар Жолдасов арнайы іссапармен келіп, аудан әкімі аппаратының мәжіліс залында жиын өткізді. Жиынға аудан әкімі А.Абдуллаев, энергетика және тұрғын үй-коммуналдық шаруашылық басқармасының басшысы Р.Мұздыбеков, бақылау жөніндегі басқармасының басшысы А.Исмайлов, аудан әкімінің орынбасарлары, дербес бөлім басшылары, қала, кент және ауылдық округ әкімдері қатысты. Аталған жиын барысында Сарыағаш ауданында сәулет және құрылыс, жолаушылар көлігі және автомобиль жолдары, энергетика және тұрғын үй-коммуналдық шаруашылығы, бақылау басқармаларына қатысты өзекті мәселелер және алдағы уақытта атқарылатын жұмыстар талқыланды.

Содан соң Зұлпыхар Жолдасов аудан тұрғындарын жеке мәселелері бойынша қабылдады. Қоғамдық қабылдау барысында тұрғындар табиғи газбен қамтамасыз ету, дәрігерлік амбулатория құрылысы, электр энергиясы және таза ауыз сумен қамтамасыз ету, көпірді жөндеуден өткізу және жеке мәселелері туралы сауалдарын жолдады. Облыс әкімінің бірінші орынбасары тұрғындардың өтініш, тілектерін тыңдап, мәселелердің шешімін табу бойынша атқарылатын жұмыстарды өз бақылауында ұстайтынын айтты. 

Сонымен қатар, Мемлекет басшысы Қасым-Жомарт Кемелұлы Тоқаевтың шалғай ауыл­дардың тұрғындарымен кездесулер өткізу туралы тапсыр­ма­сы­на сәйкес «AMANAT» партиясының Түркістан облыстық филиалы­ның қоғамдық қабылдау бөлімі Арыс қаласының Ақдала және Мон­тай­тас елді мекенінде мобильді қабылдау ұйымдастырды. «AMANAT» партиясы жанындағы  Қоғамдық қабылдау бө­лім­де­рі­нің басты бағыты жекелеген аза­мат­тар­дың өті­ніш­терін атқарушы билік өкіл­де­рін­дегі тиісті са­ла басшылары арқылы ше­­­шімін табуы­на көмектесу болып та­былады. Сон­дықтан партияның Түр­кі­стан облыстық фи­лиалының қоғамдық қа­былдау бөлімі шалғай ауылдардағы тұр­ғындардың өті­ніш-тілегіне барынша то­лық жауап беру үшін көшпелі мобиль­дік топ құрып, елді ме­кендерге жолға шық­ты. 

Мобильдік топты «AMANAT» пар­тия­­сының Түркістан облыстық фи­лиа­лы­ның төрағасы, облыстық мәслихат де­путаты, фракция жетекшісі Алтынсары Үм­бетәлиев бастап барды. Сонымен бір­ге, Арыс қаласынан сайланған депутат Ер­жан Қосмамбетов және облыстық про­­­куратура, облыстық полиция, об­лыс­тық төтенше жағдайлар департаменті, жер ресурстарын басқару және әділет де­­­партаменті, жер қатынастары, ауыл шаруа­шылығы, жұмыспен қамтуды үй­лес­тіру және әлеуметтік бағдарламалар бас­қармасы мен білім басқармасының бас­шылық құрамы тұрғындармен кез­дес­ті. Одан бөлек, мобильдік топтың құра­мын­да Түркістан облысының қоғамдық ден­саулық басқармасы, энергетика және тұрғын үй-коммуналдық шаруашылық, жо­лаушылар көлігі және автомобиль жол­дары, құрылыс, кәсіпкерлік және өнер­кәсіп басқармасынан, адвокаттар ал­қасынан өкілдер, заң консультанттары мен Арыс қаласының әкімінің орын­ба­сары және құрылымдық бөлімдерінің бас­шылары, қалалық мәслихат депу­тат­тары болды. 

Ақдала, Мон­тайтас ауылындағы Қоғамдық қа­был­дауға тұрғындар өте көп жиналды. Қа­былдауға келгендердің басым бөлігі инф­рақұрылым, ауылшаруашылық, ин­тернет желісі, асфальт төсеу мәселелерін алға тартты. Ойын, спорт алаңшаларын салу жөніндегі сұрақтарын да қойды. Жер­гілікті халықтың толғандырған мә­селелерінің қатарында елді мекеннің өзек­ті проблемасына айналған Қызыл­кө­пір елді мекеніндегі фельдшерлік-аку­шер­лік пункті күрделі жөндеу, Дермене ауы­лының ішінен өтетін облыстық маңы­зы бар 1,8 шақырым жолды яғни Ш.Уә­ли­ханов көшесін асфальттау жайы да бар. Жалпы қабылдау кезінде Ақдала ауы­лынан 47 тұрғын бірнеше мәселе бойынша өті­ніш білдірсе, Монтайтас елді мекеніндегі қа­былдауға кірген 30-дан аса азамат ша­ғымдары мен ұсыныс-пікірлерін ортаға сал­ды. 

Тұрғындар жолдаған сұрақтарға м­о­бильдік топтағы жауапты сала мүшесі әр­бір өтініш-шағымға тиянақты, жан-жақ­ты жауап беріп, бірқатар мәселенің сол сәтте шешімін табуына ықпал етті. Ал қаралуды талап ететін өтініштер хат­тамаға түсірілді. Алтынсары Дүй­сен­бекұлы осынау мәселелердің оң шешімін та­буына дейін бақылауда ұстайтын жет­кіз­ді. Айта кетейік, Түркістан облысы бойын­ша жыл басынан бері партия фи­лиалының қоғамдық қабылдау бөлмелері шал­ғай елді мекендерге 92 көшпелі мо­биль­ді қоғамдық қабылдау өткізіп, 600-ден астам тұрғынның өтінішін қараған. 

«AQ-QARA.KZ» - ақпарат