Іс-шараға ауданға қарасты барлық мекемелері қызметкерлері, ауылдық округтер, білім беру ұйымдары, ерікті жастар және тұрғындар белсене қатысып, жалпы саны 1000-нан астам адам жұмылдырылды. Тазалық жұмыстарына 7 арнайы техника тартылып, қатысушылар қажетті құрал-жабдықтармен, қолғаптармен және қоқыс жинауға арналған арнайы қаптармен қамтамасыз етілді. Келес өзенінің жағалауында қатты тұрмыстық қалдықтар жиналып, шөп шабу жұмыстары жүргізілді. Сонымен қатар Аққұм сарқырамасы аумағы мен оған іргелес жерлер толықтай тазартылып, демалушылар көп келетін аумақтардың санитарлық жағдайы жақсартылды. Нәтижесінде екі аумақтан жалпы көлемі 8,8 тоннадан астам күл-қоқыс шығарылды.
Аталған шараға Қазығұрт ауданы әкімінің орынбасары Нұрсұлтан Медеуов қатысып, экологиялық акцияның маңыздылығына тоқталды. Ол өз сөзінде қоршаған ортаны қорғау, табиғи су көздерін сақтау және туған жердің тазалығын қамтамасыз ету – барша азаматтың ортақ міндеті екенін атап өтті. Сондай-ақ акция аясында табиғатты қорғау мен қоршаған ортаны таза ұстаудың маңыздылығын насихаттайтын ақпараттық баннерлер орнатылып, тұрғындарға экологиялық мәдениетті қалыптастыру бағытында түсіндіру жұмыстары жүргізілді. Таза табиғат – болашақ ұрпаққа қалдырар ең үлкен мұра. Сондықтан қоршаған ортаны қорғау, табиғи байлықтарды сақтау және туған жердің тазалығына жауапкершілікпен қарау – әрбір азаматтың қасиетті борышы.
Сондай-ақ, Түркістан облысы Сарыағаш ауданында «Мөлдір бұлақ» экологиялық акциясы ауқымды тазалық жұмыстары өтті. Экологиялық акция Мемлекет басшысының бастамасымен жүзеге асырылып жатқан «Таза Қазақстан» жалпыұлттық бағдарламасы аясында табиғатты қорғау, су көздерінің тазалығын сақтау және тұрғындардың экологиялық мәдениетін арттыру мақсатында ұйымдастырылды. Іс-шараға Сарыағаш ауданының әкімі Арман Абдуллаев бастаған аудан басшылығы, мемлекеттік мекеме қызметкерлері, еріктілер мен белсенді жастар қатысып, қоршаған ортаны таза ұстауға бағытталған жұмыстарға белсене атсалысты.
Акция барысында республикалық маңызы бар магистралды канал мен оның айналасы тазартылып, абаттандыру жұмыстары жүргізілді. Сонымен қатар арнайы техникалардың көмегімен «Рамадан» каналының арнасы қоқыстардан тазартылып, су өткізу қабілетін жақсартуға бағытталған жұмыстар атқарылды. Сарыағаш қаласындағы Әйтеке би көшесінде ауқымды тазалық жұмыстары жүргізілді. Жалпы аудан көлемінде 50 шақырым арық-атыздар мен 70 шақырым ирригациялық жүйелер тазартылды.
Мемлекет басшысы Қасым-Жомарт Кемелұлы Тоқаевтың бастамасымен қолға алынған «Таза Қазақстан» экологиялық жобасы аясында бүгін Жетісай ауданына қарасты қала, кент және барлық ауылдық округтерде «Мөлдір бұлақ» акциясы мен «Өзіңнен баста» экологиялық челленджі өтті. Акция барысында Қызылқұм, Ж.Ералиев, Абай және Ш.Ділдәбеков ауылдық округтерінің аумағынан өтетін Шардара су қоймасының жағалауында жүргізілген тазалық жұмыстарына мыңнан астам адам мен 13 техника жұмылдырылып, 15 тоннаға жуық қоқыс шығарылды.
Аудан тұрғындарын көшелер мен елді мекендердегі, су қоймасы жағалауындағы тазалықты сақтауға жұмылдыру ісінде аудан басшысының орынбасарлары мен бөлім басшылары, жергілікті әкімдер мен тұрғындар белсенділік танытып, арнайы бекітілген аумақтарында жұмыстар жүргізді. – Қоғамның назарын тұрғылықты жердің тазалығын сақтауға аударып, экологиялық мәдениетті қалыптастыруда сенбіліктерді тұрақты түрде ұйымдастырудың маңызы өте зор, – дейді ұйымдастырушылар.
Одан бөлек, күнделікті жүргізіліп отырған сенбілік аясында да мемлекеттік және квазимемлекеттік мекеме қызметкерлері өздеріне бекітілген көшелерде тазалық жұмыстарын жүргізсе, ауданның әрбір тұрғыны үй іргелік жерлерін күл-қоқыстардан тазартуда. Сонымен қатар сенбілік барысында саябақтар мен көшелер, арық-атыздар, ирригациялық жүйелер тазалануда. Айта кетейік, аудан көлемінде өткен сенбілік шарасын ұйымдастырушылар тазалық жұмыстары тек орталықтарда ғана емес барлық округтерде, елді мекендерде жыл он екі ай жалғасатынын, әрбір мекеме мен әрбір аула тұрғындарға бекітіліп беріліп, тазалықты сақтауға ауыл ақсақалдары да жұмылдырылғанын айтады.
«WWW.AQ-QARA.KZ» - ақпарат