«Соңғы үш жылда «Аграрлық несие корпорациясы» - «Кең дала» бағдарламасы аясында жыл сайын көктемгі егін егу және күзгі жиын-терім жұмыстарын жүргізуге 140 млрд теңге көлемінде қаржы беріп келеді. Биыл қаражат 300 млрд теңгеге ұлғайтылды. Сондай-ақ, бұл жобаның тиімділігі - шаруаларға төмендетілген 5%-дық несие беруінде. Сонымен қатар, шаруалардың кепілге қоятын мүлкі ұйымның талаптарына сәйкес келмеген жағдайда мемлекеттік «Даму» қоры шаруаларға 85%-ға дейін кепілдік беруге әзір», - деді «Аграрлық несие корпорациясы» АҚ Басқарма төрағасының орынбасары Айдын Досқараев.

Ал «Аграрлық несие корпорациясы» АҚ Түркістан филиалының директоры Фурхат Миркаримов несие беру тәртібін түсіндірді. «Бұған дейін несиелер қысқа мерзімге беріліп, оларды 1 желтоқсанға дейін өтеу қажет болса, қазір қарызды өтеу мерзімі ұзартылды. Енді қарыздардың 50%-н өтеу 1-желтоқсанға дейін, қалған 50%-ын келесі жылдың 1-наурызына дейін төлеуге болады. Бұл фермерлерге астықты барынша ұтымды бағамен сатуға мүмкіндік береді», - деді ол.

Расымен де елімізде «Кең дала-2» бағдарламасының танымалдылығы артып келеді. Бұған дейін сан мәрте айтылғандай, аталған жоба аясында көктемгі және күзгі жұмыстарға 5 пайыздық үстемеақымен ғана несие беріледі. Бұл кез келген ауыл шаруашылығы саласы өкілін қызықтырары айдан анық. Шаруалардың қуанышына қарай, биыл мемлекет фермерлерге ұсынылатын қаражат көлемін әжептәуір арттырды.

Тағы бір жағымды жаңалық бар. Енді диқан Аграрлық несие корпорациясынан ғана несие алады. Бұрынғыдай берешек үшін бір ұйымның, субсидия үшін екінші ұйымның есігін қақпайды. Қағазбастылықтың ауылы алыстады, «жоғары пайызбен займ рәсімделеді» деген күдік те жойылды. Кепілдік мәселесіне бөлек тоқталу қажет. Мұнда да өзгеріс бар.Бұрын фермер 100 пайыздық кепіл ұсынатын болса,қазір қарыздың 15 пайызына ғана кепіл қажет. Қалған 85 пайызды «Даму» қоры кепілдендіреді.

«AQ-QARA.KZ» - ақпарат