Осындай атаумен көне шаһарда ерекше думанды шоу өтті. Онда өнер жұлдыздары халық шығармалары мен бүгінгі жастардың сүйіп тыңдайтын әндерін орындады. «Шараның басты мақсаты – қасиетті мекенді жасыл желекке бөлеп, қауіпсіз қалаға айналдыру», - дейді ұйымдастырушылар. 

Отырар ауданында салынып жатқан жолдардың сапасы жоғары. «Сапалы жол» жобасы аясында аудандағы көлік дәліздеріне талдау жүргізген мониторингтік топ осындай қорытынды шығарды. 

Спорттың бірнеше түрін қамтыған «Төлеби ойындары» марафонға ұласты. Оған 18 бен 70 жас арасындағы желаяқтар қатысты. Олар жас ерекшеліктеріне қарай 4 топқа бөлініп, 42 шақырымды бағындырды. 

Қазығұрт ауданындағы «Өнер» мектебінде ҚР Тәуелсіздік күніне арналған «Сәлем саған, Түркістан»өнер фестивалі аясында балалар мен жасөспірімдер арасында ән орындаушылар байқауы болып өтті. Байқаудың мақсаты:Тәуелсіздік ұғымын балаларға, өскелең ұрпаққа кеңінен түсіндіру арқылы қазақ халқының, өз елін, жерін қорғайтын елжандылық рухқа тәрбиелеу, мәдениет пен өнерді ұрпақтан-ұрпаққа жеткізу, жастарды ұлттық рухта тәрбиелеу және патриоттық тақырыптағы жаңа классикалық әндерді халық арасында кеңінен насихаттау, классикалық әндерді өз нақышында орындау, сондай-ақ жас талант иелерін анықтау. 

Қазығұрт ауданындағы Алтынтөбе мен Тұрбат ауылдарына табиғи газ жеткізіліп, ауыл тұрғындары «көгілдір отынның» шарапатына қол жеткізді. 

Отырар ауданының орталығы Шәуілдір ауылында Кәсіпкерлер палатасы ғимаратынан ауыл тұрғындарына қызмет ететін «Халықтық кеңсе» ашылды. Кеңсенің негізгі мақсаты — ашықтықты қамтамасыз ету, мемлекеттік көрсетілетін қызметтердің сапасын арттыру, әкімшілік кедергілермен сыбайлас жемқорлықтың алдын алу және құжат рәсімдеуді жеңілдету. 

Кеншілер шаһарында қала әкімдігінің ұйымдастыруымен «Алтын күз» шарасы өтті. Жәрмеңкеде ауылшаруашылығы өнімдері сатылымға шығарылып, арзандатылған бағада жәрмеңкеге келген қонақтарға жол тартты. Мұндағы тауар нарқы базар бағасынан 10-15 теңгеге арзан. Мұнда Кентау қаласына қарасты ауылдық округтердің шаруақожалықтары өнімдері тұрғындарға ұсынылды. 

Мемлекет басшысы Қасым-Жомарт Кемелұлы Тоқаев ағымдағы жылғы 2 қыркүйектегі «Сындарлы қоғамдық диалог – Қазақстанның тұрақтылығы мен өркендеуінің негізі» атты Қазақстан халқына арнаған Жолдауында «Халық үніне құлақ асатын мемлекет» тұжырымдамасына ерекше назар аударды. Ондағы басты мақсат халықпен тікелей қатынас орнату болып табылады. Осыған байланысты, мемлекеттік органдарда Республикалық бірыңғай азаматтарды қабылдау күнін (ашық есік күнін) биыл 21 қарашада өткізу жоспарланды. 

«Түркістан облысының 2016-2020 жылдарға арналған даму жоспары» талқыланды. Жиын барысында облыстық мәслихат депутаттары облыс орталығын көгалдандыруда неліктен жауаптылар қылқан жапырақты ағаштарға басымдық бергендері жайлы мәселе көтерді. Әрине, онысы орынды-ақ. 

Көпшіліктің көңілін күпті еткен Түркістандағы «Шаңырақ» монументі бұзылды. Естеріңізге салсақ, әлеуметтік желіде жұрттың талқысына түскен бұл нысанды, әсіресе, «Фейсбук» белсенділері иісі қазақ қасиет тұтқан шаңырақтың төңкерілуін жаман ырымға балаған болатын.