2019 жыл - жастар жылы. Соған орай, Ұлттық кәсіпкерлер палатасы кәсіп ашып, табысты болғысы келетін жастарға қолдау көрсетуді қолға алды. Енді 18 бен 29 жас аралығындағы қыз-жігіттер бизнес саласын небәрі 15 күн ішінде оқып шығады. Бұл «Бастау» жобасының «Жас кәсіпкер» бағдарламасы негізінде жүзеге асып отыр. Жалпы, Түркістан облысының халқы кәсіпкерлікке бейім. Үлкендер жағы ата кәсіп – мал шаруашылғын қолға алса, жастар ерекше бизнес идеяларымен қуантуда.

Мереке - 5 балалы ана. Мамандығы - мұғалім. 29 жастағы келіншектің бизнестен мүлдем хабары жоқ. Тұрмысқа шыққалы еш жерде жұмыс істеп көрмепті. Осы оқуды аяқтаған соң өз кәсібін ашып, үйде отырып ақша тапқысы келеді. «Бұл оқуды инстаграм желісінен білдім. Бұл оқуға келген мақсатым - үде отырып, өз кәсібімді ашу.  Мал шаруашылығымен айналысып, дамыту. Бөдене шаруашылығымен айналыссам» - дейді ол. Ал, Бекжан - Түркістан қаласының тұрғыны. «Жас кәсіпкер» бағдарламасын естіп, арнайы кәсіптің қыр-сырын үйренуге келген. Ол мемлекеттен бөлінетін гранттан үмітті.  Бизнес саласын оқығалы, өзіне деген сенімі арта түсіпті. Айта кетейік, «Жас кәсіпкер» жобасының екінші кезеңі ағымдағы жылдың 21 тамызында басталады. Әзірге құжаттарды қабылдау жұмыстары жүргізілуде.

«AQ-QARA-KZ» - ақпарат»