Қазақстан Республикасының Туризм және спорт министрі Ербол Мырзабосынов елордада бокстан жастар арасындағы әлем чемпионаттарында жоғары жетістіктерге қол жеткізген жас боксшылармен кездесу өткізді. Бұл чемпионаттар 26 қазан мен 4 қараша аралығында Черногорияның Будва және АҚШ-тың Пуэбло қалаларында өтті. Іс-шара барысында ведомство басшысы талантты спортшылар мен олардың жаттықтырушыларын құттықтап, елдің спорттық беделін нығайтуға қосқан үлестері үшін алғыс хаттар табыс етті. Марапатталғандардың қатарында шымкенттік спортшы Санжарәлі Бегалиев бар. Оған Халықаралық дәрежедегі спорт шебері атағы берілді.

Министрліктің мәліметінше, іс-шараға Қазақстан бокс федерациясының президенті Шахмұрат Мүтәліп, Қазақстан бокс федерациясының бас хатшысы Рауан Игенев, Бокстан ҚР жастар әйелдер құрама командасының аға жаттықтырушысы Жанкелді Ахметов, бокстан ҚР жастар құрама командасының аға жаттықтырушысы Мақсат Бақтыбазаров және әлем чемпионатының жеңімпаздары мен жүлдегерлері қатысты.

Министр жас қазақстандық спортшылардың әлемдік аренадағы жетістіктері ел болашағына қосылған маңызды үлес екенін ерекше атап өтіп, бұл жеңістердің өскелең ұрпақ үшін символдық маңызы зор екенін жеткізді. Ол жас боксшылардың еңбекқорлығы мен ұмтылысы жаңа буынға шабыт беріп, лайықты үлгі болатынына сенім білдірді.

«Жас спортшылардың әлем чемпионаттарында топ жаруы – үлкен жетістік. Бұл жеңіс ел боксшыларының бұған дейінгі жетістіктерінің заңды жалғасы екендігін көрсетеді. Сондай-ақ әлемге біз Қазақстан құрамасының жаңа, жұлдызды буынының өсіп келе жатқанын дәлелдедік. Жастар – біздің үмітіміз, еліміздің жарқын болашағы. Боксшыларымыз өздерінің еңбекқорлығы, таланты мен талабының арқасында әлемдік аренада еліміздің абыройын асқақтатты. Олардың жетістіктері жаңа буынға үлгі-өнеге болады. Жас боксшыларымыздан болашақта одан да жоғары нәтижелер күтеміз», – деді Ербол Мырзабосынов.

Естеріңізге сала кетейік, Будвада өткен жастар арасындағы әлем чемпионатында Қазақстан құрамасы 6 алтын, 1 күміс және 10 қола медаль жеңіп алып, жалпыкомандалық есепте бірінші орынды иеленді. Ал Пуэблода өткен әлем чемпионатында боксшыларымыз 2 күміс медаль жеңіп алып, қазақстандық бокс мектебінің жоғары деңгейін тағы да дәлелдеді.