Халық санының жылдан-жылға артуы мен қалаға келетін туристердің көбеюі теміржол вокзалының жұмыс жүктемесін арттырып қана қоймай, сервистік қызметті жақсартуды талап етуде. Қаланың даму жоспарына сәйкес, Теміржол вокзалының ғимаратын реконструкциялау жұмыстары қазір қарқынды жүргізілуде. Бүгін қала әкімі Мұрат Әйтенов жауаптылармен бірге қайта құру жұмыстарының барысын қадағалады. Жауаптыларға құрылысты дер кекзінде әрі сапалы тұрде жұргізуді тапсырды.

Қазіргі таңда теміржол вокзалы 2- қабатының құрылыс жұмыстары 80 пайызға, бірінші қабаты 30 пайызға орындалды.

Реконструкциялау жобасына сәйкес, теміржол вокзалының аумағы 2249,33 шаршы метрге ұлғаяды. Ғимараттың жолаушы өткізу қабілеті қазір тәулігіне 2 мың адамды құрайды. Қайта құрудан кейін вокзал тәулігіне 6 мың адамға дейін қамти алады. Сондай-ақ жобада ғимараттың екінші кіреберісі, жолаушыларға жайлы қызмет көрсететін заманауи талапқа сай екі күту залы қарастырылған. Вокзал ғимаратының қасбеті мегаполистің сәулеттік келбетіне сай жабдықталып, шыны витражды жүйелерден және металл кассеталардан жасалады.

Құрылыс жұмыстары 5 кезең бойынша жүргізіледі. Қазір монтаждау жұмыстары жалғасып, нысанда жылу, жарық жүйелері тартылуда.

Сондай-ақ, өрт сөндіру дабылдары, интернет жүйесі және бейнебақылау камераларын орнату жұмыстары атқарылуда. Ал бірінші қабатта құрылысшылар колонналарды күшейту жұмыстарын жүргізуде. Вокзал ғимараты республикалық маңызы бар қаланың ерекшелігіне сай қайта құрылып, жыл соңына дейін пайдалануға беріледі.

Мұрат Дүйсенбекұлы вокзал құрылысын жобаға сәйкес атқарып, нысанды мерзімінде қолданысқа беруді тапсырды. Сондай-ақ жолаушыларға қолайлы болу үшін желдеткіш жүйесін тиісті талаптарға сай жүргізуді ескертті.

Қаланың жолаушылар көлігін дамытудың кешенді кестесіне сәкес, бүгінде 78 бағытта қоғамдық көліктер жолаушыларды тасымалдау қызметін көрсетеді. Қала аумағына күнделікті бағытқа 895 автобус шығады.

Бүгін қала әкімі М.Әйтенов жауаптылармен бірге қоғамдық көлік қызметінде атқарылып жатқан жұмыстар барысын тексерді. Қазіргі таңда мегаполисте әлеуметтік мәні бар маршруттардың тізімімен 77 маршрут айкындалған.

Аталған бағыттағы автобус маршруттары қала аумағын, сонымен қатар шет аймақтарда орналасқан барлық шағынаудандар мен тұрғын алабтарды қоғамдық көлікпен қамтиды. Автобустардағы кондукторсыз жүйе де қызмет сапасын жақсартып, жолаушылар үшін тиімділігін көрсетуде. Сондай-ақ бұл жүйе автобус жүргізушілерінің де жалақысын арттыруға септігін тигізіп отыр. Қалада жалпы резервпен қоса санағанда 1100-ден аса автобус, 10 автопарк бар. Сондай-ақ жолаушылардың қолайлылығы үшін қоғамдық көліктерді заман талабына сай жаңарту да басты назарда. Қалада барлық дерлік автобустар жаңа “Yutong” және “Ankai” маркалы заманауи көліктерге ауыстырылды. Тұрақты маршруттарда 600-ден астам автобус жанар-жағар май ретінде экологиялық таза газ-метанды пайдаланады.

Көліктерді газ отынымен қамтамасыз ету үшін 2 газ станциясы қызмет көрсетуде, ал үшінші станциясының құрылысы қазір қарқынды жүргізілуде. М.Дүйсенбекұлы станцияның құрылыс барысын қадағалады. Жауаптыларға құрылыс ерекшеліктерін назарға алып, жұмыстарды жобаға сәйкес атқаруды тапсырды. Сондай-ақ газ құбырларын тартуда орын алған өзекті мәселелерді шешу бойынша тиісті басқармаға нақты тапсырма берді. Автобустардың тасымалдау сапасын арттырып, қозғалыс жиігілін қадағалау қажеттігін ескертті. Жоспарға сәйкес, аталған станцияның құрылысын толық аяқтап, пайдалануға беру 2024 жылдың сәуір айына жоспарланған.

Шымкентте қала мәслихатының сегізінші шақырылымдағы алтынша сессия отырысы өтті. Қала әкімі Мұрат Әйтеновтің қатысуымен өткен жиынның күн тәртібінде 9 мәселе қаралып, жылу маусымы мен жаңа оқу жылының дайындығы пысықталды. Алдымен бес ауданның әкімдеріне жүктелген функционалдық міндеттердің орындалу барысы баяндалды. Мінберде қала мәслихаты алдында есеп берген аудан әкімдері аумақтарда халыққа қолайлы орта қалыптастыру, инфрақұрылыммен қамту, ауданның экономикалық-әлеуметтік дамуы Мемлекет басшысының Жолдауы және қала әкімі бекіткен 5 жылдық даму жоспары негізінде атқарылып жатқанын айтты.

Қазір жаз мезгілінің соңғы айы. Шымкентте жылу маусымына дайындық жұмыстары да аяқталуға таяған. Мәслихаттың бірлескен отырысында қалалық энергетика және инфрақұрылымды дамыту басқармасының басшысы Мақсат Ердембеков жылу маусымына дейін жоспарланған жұмыстардың барлығы толығымен атқарылып жатқанын айтты.

Қалада жылу жүйелерінің ұзындығы 838,6 шақырымды құрайды. Басқарма басшысының айтуынша, бүгінде оның 37 пайызы тозған. Осы тозу деңгейін төмендету үшін жергілікті және республикалық бюджеттен 6,3 млрд. теңге қаржы бөлінген. Қаражаттың 3,2 млрд. теңгесі жергілікті бюджеттен қаралып, биыл 8,8 шақырым жылу жүйелеріне ағымдағы жөндеу жұмысы жүріп жатыр. Ал, республикалық бюджеттен бөлінген 3,1 млрд. теңгеге 3 жоба негізінде 8,7 шақырым жылу құбыры қайта құрудан өтуде. Қысқы дайындық үшін жөндеу жұмыстары осы жылдың 20 қыркүйегінде толық аяқталады.

Мұнан кейін қалалық білім басқармасының басшысы Жанат Тәжиева Шымкент қаласында «Білімді ұлт» сапалы білім беру» ұлттық жобасы аясында атқарылған жұмыстар мен жаңа оқу жылына дайындықтың барысын айтты.

Жаңа оқу жылында 28 мыңнан астам бала 1 сыныпқа қабылданыпты. Білім беру ұйымдарындағы орын тапшылығын жою мақсатында биыл 48 білім мекемесі жаңадан пайдалануға берілсе, оның 15-і жалпы орта білім беретін мектеп. Осылайша үш ауысымда оқытатын 4 мектептің мәселесі толығымен шешіліп, 61 мектеп бір ауысымда білім беруге көшкен.

Жиын соңында қала әкімі Мұрат Әйтенов қала тұрғындарының өмір сүруіне қолайлы орта құрып, аумақтарды дамыту, халықтың әлеуметтік мәселелерін барынша шешуге бағытталған жұмыстарды күшейту қажет екенін алға тартты.

–Осы міндеттерді сапалы орындау үшін аудан әкімдерінің ұсынысымен әр ауданнан коммуналдық мекемелер ашылып, оларға қажетті ресурстар мен қаржы берілді. Жылу маусымына дайындық жұмыстарын да пысықтап алдық. Әкімдік жылу маусымына дайындықты қызу атқарып, мәселелерді жүйелі түрде шешуде. Қаламызда урбанизация процесі қарқынды жүруіне байланысты оқушылар саны да жылдан-жылға артуда. Білім беру ұйымдарында орын тапшылығын жою үшін биыл 15 жаңа мектеп қолданысқа беріледі. Мемлекет басшысының тапсырмасына сәйкес, қаламызда 2026 жылға дейін «Жайлы мектеп» ұлттық жобасы аясында 18 мектеп салу жоспарланып отыр. Бүгінгі сессияды аудан әкімдері мен басқарма басшыларының есебіне қатысты сын-ескертпелер назарға алынды. Бұл бағыттағы жұмыстарды одан әрі жалғастыратын боламыз, - деп қала әкімі сессияны қорытындылады.

Биыл Шымкентте «Жайлы мектеп» ұлттық жобасы аясында 17300 орындық 12 мектеп салынуда. Мемлекет басшысы құрылыста отандық өнімдерді қолдануды басты назарға алуды тапсырған болатын. Осыған орай, кәсіпкерлік палатасының ұйымдастыруымен «Жайлы мектеп» ұлттық жобасы аясында іс атқарып жатқан тапсырыс берушілер мен бас мердігерлер, дизайнерлердің отандық тауар өндірушілермен кездесуі өтті. Жиынға қалалық құрылыс және білім бөлімінің басшылары да қатысып, өз ұсыныстарын білдірді.

 –Бүгінгі таңда мердігер мекемелер анықталып, келесі жылы пайдалануға берілетін мектептердің жобалық-сметалық құжаттары әзірленуде. Ал, 2024 жылы үшінші мегаполисте 10700 орындық 6 мектептің құрылысы басталмақ. Қазіргі уақытта бас мердігер компаниялар «Ақ ордасы», «Арт құрылыс», «Оңтүстік құрылыс», «Отау строй» құрылыс компаниялары анықталды. Ұлттық жобаны жүзеге асыру барысында Президент тапсырмасына орай отандық құрылыс материалдары, жабдықтар мен жиһаздар сатып алынады. Әлеуетті жеткізушілерге жоғары талаптар қойылады, өнімнің сапасы мен қауіпсіздігі, сондай-ақ «СТ-KZ» тауардың шығу тегі мен сертификатының болуы маңызды. Әлбетте сапалы өнім өндірушілер Шымкентте көп деп ойлаймын. Бұл кәсіпкерлер арасында бәсекелестікті арттырып, сапаны жақсартуға кепіл деп білемін,– деді Шымкент қалалық кәсіпкерлер палатасының басшысы Сәбира Адамбекова.

«Жайлы мектеп» ұлттық жобасы аясында салынып жатқан білім беру нысандарының басты ерекшелігі – заманауи стандарттарға сай болмақ. Жаңа мектептерде жоғары жылдамдықтағы интернет, компьютерлік шеберхана, STEM зертханалары, жарық диодты экрандар, электронды кітапханалар болады. Сондай-ақ заманауи үлгіге сай жеке спорт залы мен асханасы, бастауыш және жоғары сыныптарға арналған блоктар, әр қабатта су фонтандары, бейнебақылау және қауіпсіздік жүйелері бар интерьермен жабдықталады. Ал, үстел, орындықтарды баланың бойына сай үлкейтіп, кішірейтіп реттеуге болады. Қазіргі ғылымның дамуына сәйкес робототехника кабинеттері, нанотехнология мен биотехнологияны зерттейтін зертханалар, оқу және демалыс үшін коворкинг аймақтары да қарастырылған. Барлық мектептер алдағы уақытта ерекше қажеттіліктері бар балаларға да бейімделіп, волейбол, баскетбол, теннис корттарымен қамтамасыз етілмек.
Жиынға 40-тан астам құрылыс компанияларының өкілдері қатысып, травертин, кірпіш, керамикалық плиталар, қапматама панельдері, әрлеу және бояу материалдары сынды өз өнімдері мен мүмкіндіктерін көрсетті. Жиһаз жасаушылар технологиялық тұрғыдан ыңғайлы жиһаз шығаруға мүмкіндіктері бар екенін көрсетіп, бұйымдардың эскиздерін ұсынды. Жиын барысында желдету жабдықтары, терезе, есіктерге арналған профильдер, қауіпсіздік жүйелері де таныстырылды.
Шымкенттік «Eagle teck» ЖШС-і ұсынған интелектуалды қауіпсіздік жүйесінің бірнеше ерекшеліктері бар. Компания басшы Кәрімбай Оразалының айтуынша, бейнебақылау жүйесі тек камераға түсіріп қана қоймай, суық қару, оқ ату орын алған жағдайда дыбыстық сигнал бірден құқық қорғау орындарына келіп түседі.
–Егер жүйе қауіпті таныса, ақпарат бірден құқық қорғау орындарына жіберіледі. Жасанды интеллект – жерде жатқан немесе төбелесіп жатқан адамдарды анықтай алады. Сондай-ақ, жасөспірімдер арасында әлімжеттіктің алдын алып, қорқытатын, ар-намысына тиетін, қорлау сөздерге де жауап береді. Смарт камералардың тағы бір мүмкіндігі мектеп оқушысының дене қызуы көтерілсе де фельдшерлік пунктке дабыл сигналы жіберіледі. Осылайша көптеген келеңсіздіктің алдын алуға болады, – дейді К.Оразалы.