ҚР Президенті Қасым-Жомарт Тоқаевтың ел аумағында COVID-19 коронавирусын пандемия деп тануына байланысты төтенше жағдай жарияланған болатын. Осыған орай, Түркістан облысында да індеттің таралуына тосқауыл қою бойынша барлық шаралар қарастырылып, жұмыстар атқарылуда.
Өңірде бетперделердің тапшылығына байланысты цехтар өз жұмыстарын қарқындатуда. Дәріханалар мен бөлшек саудада туындаған медициналық бетперде тапшылығын жою үшін бүгінде кәсіпкерлер өз үлесін қосып, өнімді арттырып жатыр.
Мәселен, Жетісай қаласындағы «Айнұр» және «Әсем» жеке кәсіпкерлік нысандары күніне 3000-ға жуық медициналық бетперде тігіп, сатылымға шығаруды қолға алды. Алдағы уақытта жұмыс күшін арттырып қуаттылығын 4000 данаға жеткізу жоспарланып отыр.
Осыған дейін Түркістан облысының бас санитарлық дәрігері Н.Нышанов Нұр-Сұлтан және Алматы қалаларында карантин режимі енгізілуіне байланысты туындап отырған жаңа міндеттерге тоқталып өткен болатын. Енді облысымызға сырттан кіретін азаматтар арнайы тексеруден өткізіледі. Сондай-ақ Түркістан және Кентау қалалық ауруханалары төтенше жағдай талаптарына сай медициналық қызметтерді көрсетуге дайын екенін мәлімдеген болатын.