Аймақ басшысы Нұр-Сұлтан қаласынан шыққан жолаушылар автобусындағы коронавирус жұқтырған азаматпен бірге келген 50 адамды шұғыл түрде анықтап, қауіптің алдын алған полиция саласы өкілдерінің қырағылығын атап өтті. Жүйелі жұмыстың нәтижесінде барлық жолаушылар оқшаулануға алынып, тиісті медициналық тексеруден өтуде. Карантинге жатқызылған автобус жүргізушісі жолаушыларды тасымалдау қағидаларын бұзғаны үшін әкімшілік жауапқа тартылады.

    Жиналыста баяндама жасаған Түркістан облыстық ІІД басшысы Қайрат Дәлбеков атқарылып жатқан жұмыстарды тарқатып айтып берді. Белгілі болғандай, қауіп төндірген қалааралық автобустың жүргізушісінде жолаушылар туралы ақпарат мүлдем болмаған. Түркістан облысы Түлкібас ауданындағы «Шақпақ» бақылау бекетінен өткен кезде блок-пост қызметкерлері жолаушылардың жеке басына қатысты мәліметтерін жазып алған. Пандемияның алдын алу мақсатында облыс әкімі Өмірзақ Шөкеев кешенді қауіпсіздік шараларын қабылдағаны белгілі. Сақтық мақсатында Түркістан облысының шекаралық жерлеріне 35 блок-пост қойылды. Олар елдімекендерде, теміржол вокзалы мен станцияларда орналасқан. Отырыс барысында облыс әкімі Өмірзақ Шөкеев барлық бақылау бекеттерінде «Сергек» камераларын орнатуды міндеттеді.

    Жиналыста «Жібек жолы» кеден бекетінің алдында шоғырланған шетел азаматтарының тағдыры жайлы да айтылды. Бірнеше күн бойы оларға барлық жағдай жасалып, арнайы ашылған лагерьге орналастырылды. Қауіпсіздік шаралары қамтамасыз етіліп, 1777 азамат Өзбекстан Республикасына өткізілді. Тағы жүзден астамы отандарына оралуды күтіп отыр.

 Жыл басынан бері короновирусқа қатысты Полиция департаментімен ҚР Қылмыстық кодексінің 274 бабымен, Көрінеу жалған ақпарат тарату деректері бойынша 7 қылмыстық іс қозғалды. Олар: Кентау Түркістан қалалары, Мақтарал, Шардара, Келес, Жетісай аудандарында орын алған.