Жұма, 11 Қараша 2022 13:20

Отырар ауданының әкімі төрт ауыл округінің тұрғындарымен кездесті

Бүгін аудан әкімі Сәкен Сұлтанханов Қоғам, Қарғалы, Отырар Талапты ауыл округтерінің тұрғындарымен кездесіп, өтініштерін тыңдады.

Аудан әкімі алдымен Қоғам ауылына барып тұрғындарға бұған дейінгі кездесулерде көтерілген мәселелердің орындалу барысымен таныстырды. Айта кету керек мамыр, тамыз айларында өткен жиындарда тұрғындар тарапынан 20 мәселе көтеріліп, оның ішінде 7 мәселе оң шешімін тапқан болатын. Ал қалған мәселелер аудан әкімінің бақылауына алынған. Мәселен Қоғам ауылының тұрғыны Қоғам ауылындағы Бескепе көшесіне тас жол төселсе деген ұсынысын жеткізген болатын. Аталған мәселе бойынша тиісті жұмыстар атқарылып, жергілікті 4-ші бюджет есебінен тиісті қаржы қаралып, аталған көшеге (ұзындығы 510 метр) тас жол төселді. Сондай-ақ, тұрғындардың өтінішімен Талапты елдімекенінде ауылдық дәрігерлік амбулатория құрылысына облыстық бюджеттен қаржы қаралып, мемлекеттік сатып алу конкурсы нәтижесімен жеңімпаз анықталып, құрылыс жұмыстары басталып кетті. Нысан 2023 жылы пйдалануға беріледі деп күтілуде.

Мұнан бөлек Қарғалы, Отырар ауыл округі бойынша да атқарылған жұмыстар аз емес. Аталған ауылдардағы өзекті мәселелердің бірі ағын судың жетіспеушілігі болатын. Осыған орай Д.Алтынбеков каналының ПК194+42-ден ПК205-15 аралығында канал ұлтаны 47см-ге төмендету жұмыс жобасы толық аяқталды. Сонымен қатар Қызыл ту насос станциясындағы 7 дана «СНП-500» электр насостары күрделі жөндеуден өткізіліп, іске қосылды. Орнатылған насостар арқылы Арыс өзенінен 1,8м3/сек су шығарылып, егістік алқаптары ағын сумен қамтылды.

Талапты ауыл округінде өткен кездесуде ауыл тұрғыны Орынбасар Досов Сарыкөл елдімекеніндегі Ш.Қалдаяқов көшесіне аяқжол салынып, жарықтандырылса деген өтінішін айтқан болатын. Аталған мәселе бойынша көшені жарықтандыру үшін жобалық сметалық құжаттамасы дайындалды. Бұл нысан бойынша 2023 жылғы аудандық бюджет қаражаты есебінен жүзеге асыру жоспарланып отыр. Ынталы ауылынан балабақша жайын салу мәселесі бойынша да жергілікті кәсіпкермен келісім жасалып, 100 орындық балаға арналған балабақша жайының құжаттары заңдастырылуда.

Аудан басшысының ауыл тұрғындарымен кездесуі барысында көпшілік тарапынан қойылған өзге де сауалдарға тұщымды жауаптар беріліп, кейбір мәселелер бойынша жауапты сала басшыларына нақты тапсырмалар берілді. Сәкен Асылханұлы әрбір жиында көтерілген мәселелер өзінің тікелей бақылауында болатынын айтып ескертті.

Кездесуге келген халық аудандағы барлық ауыл округтерін аралап, халықпен кездесіп, көтерген мәселелерін тыңдап, олардың оң шешімін табуы үшін жұмыстанып жатқан аудан әкіміне ризашылығын білдіріп, алғысын айтса, ауыл қариялары елдің амандығын, ынтымақ-бірлігін тілеп, ақ баталарын берді. Жиыннан соң аудан әкімі тұрғындарды жеке мәселелері бойынша қабылдап, талап-тілектері мен өтініштерін тыңдады.

Елімізде түрлі деңгейдегі әкімдердің халықпен кездесуі жүйелі түрде өткізіліп келеді. Осы үдерісті өткізу үшін мемлекет басшысы арнайы Жарлық та шығарды. Қазақстан Республикасының Президенті Қасым-Жомарт Тоқаев 2022 жылғы 3 наурыздағы №826 "Әкімдердің халықпен кездесулерін өткізу туралы" Жарлыққа қол қойған болатын. Барлық деңгейдегі әкімдер жыл бойы халықпен кездесулер өткізсін, олардың барысында халықты толғандыратын әлеуметтік мәселелерге баса назар аудара отырып, Қазақстанды жаңғыртудың жаңа бағдарының негізгі бағыттары туралы хабардар етсін және проблемалық мәселелерді шешудің жолдары мен мерзімдерін түсіндірсін", - деп құжатта айтылған.

Облыстардың, республикалық маңызы бар қалалардың, астананың әкімдері: 1) жыл сайын 15 қаңтарға дейін мыналарды: жарты жылда бір рет облыс әкімінің әр ауданда және облыстық маңызы бар әр қалада кемінде бір көшпелі кездесуін; республикалық маңызы бар қала, астана әкімінің қаланың әр ауданында тоқсан сайын кемінде бір көшпелі кездесуін; аудан әкімінің әр ауылда, кентте, ауылдық округте, аудандық маңызы бар қалада тоқсан сайын кемінде бір көшпелі кездесуін; облыстық және аудандық маңызы бар қала, ауылдық округ әкімінің қаланың, ауылдық округтің құрамына кіретін әр ауданда (шағын ауданда), ауылда, кентте тоқсан сайын кемінде бір көшпелі кездесуін; ауыл, кент, қаладағы аудан әкімінің тоқсан сайын кемінде бір кездесуін өткізу көзделген әкімдердің халықпен кездесулерінің икемді жылдық күнтізбесін (бұдан әрі – күнтізбе) әзірлеп, оны мәслихатпен келісу бойынша бекітіп отырсын. Қажет болған жағдайда күнтізбені мәслихатпен келісу бойынша түзетуге жол беріледі; 2) жыл сайын 20 қаңтарға дейін Қазақстан Республикасының Үкіметіне бекітілген күнтізбені ұсынсын.  Барлық деңгейдегі әкімдер: 1) халықтың талап етуі бойынша және қажет болған кезде күнтізбеден тыс халықпен кездесу өткізсін; 2) техникалық мүмкіндіктерді ескере отырып, халықтың әлеуметтік желілердегі ресми аккаунттарда міндетті түрде пікір білдіру мүмкіндігімен онлайн-трансляциялар, сондай-ақ қажет болған жағдайда бейнеконференцбайланыс ұйымдастыру арқылы кездесулер өткізуді қамтамасыз етсін; 3) кездесу үшін жоспарланған уақыттың төрттен бірден аспайтын бөлігін баяндаманы таныстырумен, уақыттың қалған бөлігін «сұрақ-жауап» форматында өткізсін; 4) халықпен кездесулер өткізгенге дейін: проблемалық мәселелердің пулын жасау үшін жергілікті қоғамдастық жиналысы және қоғамдық кеңестер мүшелерінің қатысуымен халықтың сұраулары мен ұсыныстарын жинау жөнінде комиссия құруды;   ашық деректердің интернет-порталына және әкімдердің блог-платформасына, сондай-ақ коммуникацияның басқа да нысандарында халықтан келіп түскен сұраулар мен ұсыныстарды жинауды және талдауды; бұқаралық ақпарат құралдарында, оның ішінде өңірлік баспа басылымдарында, радиода, ресми интернет-ресурстарда және «электрондық үкімет» веб-порталында, ашық деректер интернет-порталында, сондай-ақ әкімдіктердің (әкімдер аппараттарының) ресми аккаунттарында, әлеуметтік желілерде және барлығына қолжетімді жерлерде ақпараттық-насихат  жұмысын жүргізуді; әкімнің халықпен кездесуін өткізу туралы хабарландыруды: облыс, республикалық маңызы бар қала және астана, аудан, облыстық және аудандық маңызы бар қала әкімі өткізетін кездесу күніне дейін екі апта бұрын; ауыл, кент, ауылдық округ, қаладағы аудан әкімі өткізетін кездесу күніне дейін бір апта бұрын ұйымдастыруды қамтамасыз етсін; 5) халықпен кездесулер өткізгеннен кейін: жергілікті атқарушы органдардың, прокуратура және ішкі істер органдарының басшылық құрамымен, мәслихат депутаттарымен, қоғамдық кеңестер мүшелерімен, жергілікті зиялылармен бірлесіп, азаматтарды жеке қабылдауды өткізсін; проблемалық мәселелерді қаржыландыру мүмкіндігін мәслихат сессиясында қарай отырып, жүйеге келтірсін; кездесулер мен азаматтарды қабылдау аяқталған күннен бастап күнтізбелік он күннен кешіктірмей, өткізілген кездесулердің қорытындылары туралы ақпаратты, проблемалық мәселелердің тізбесін, проблемалық мәселелерді шешудің нақты мерзімдерін, жауапты орындаушыларды көрсете отырып, оларды шешу жөніндегі іс-қимыл жоспарын бұқаралық ақпарат құралдарында, оның ішінде ресми интернет-ресурстарда және «электрондық үкімет» веб-порталында орналастыруды қамтамасыз етсін; тоқсан сайын есепті кезеңнен кейінгі айдың 25-күніне қарай кездесулерде халық көтерген проблемалық мәселелерді шешу барысы туралы ақпаратты ресми интернет-ресурстарда және «электрондық үкімет» веб-порталында орналастырсын.

Қазақстан Республикасының Үкіметі: 1) жыл сайын есепті жылдан кейінгі 1 ақпанға дейін өңірлердің бекітілген күнтізбелерін Қазақстан Республикасы Президентінің Әкімшілігіне ұсынуды; 2) жыл сайын есепті жылдан кейінгі жылдың 15 ақпанына және 15 тамызына дейін орталық атқарушы органдар, ұлттық холдингтер мен компаниялар деңгейінде шешуді талап ететін проблемалық мәселелердің тізбесін және оларды шешу жөніндегі ұсыныстарды жинауды; 3) әкімдердің халықпен көшпелі кездесулерінің қорытындысы бойынша халық көтерген мәселелерді шешу жолдары мен олардың орындалу барысын көрсете отырып, олардың ішінен  құзыретіне кіретін проблемалық мәселелердің тізбесін орталық атқарушы органдардың, ұлттық холдингтердің, компаниялардың ресми интернет-ресурстарында орналастыруды және тоқсан сайын жаңартуды қамтамасыз етсін» - делінген болатын президент Жарлығында.

 

 

 

Оқылды 2556 рет