Күні кеше «Өнерлі өлке» облыстық өнер фестивалі аясында Түркістан қаласындағы Жетісай ауданының мәдениет күндері басталды. Мерекелік шараға аудан әкімінің орынбасары Серік Пірімбеков пен зиялы қауым өкілдері қатысты.

Түлкібас ауданында «Аудандық мәдениет үйі» ғимаратында еңбек күшін қажет ететін солтүстік өңірлерге халқы тығыз орналасқан оңтүстік аймақтарынан азаматтарды ерікті түрде көшіру жұмыстары бойынша тұрғындарымен кездесу ұйымдастырылды. Жалпы 2015 жылдан бергі көрсеткіштерге сәйкес, жұмыс күші аз Солтүстік өңірлерге Оңтүстік аймақтардан жалпы саны 14 874 адам қоныс аударған.

Венгриялық «UBM GROUP» компаниясы Түркістан облысында құрама жем зауытын салу бойынша таяуда Түркістан облысының әкімі Дархан Сатыбалдымен кездесіп, арнайы келіссөз жүргізген еді. Нәтижесінде Мажарстанның Алматы қаласындағы Бас консулдығы коммерциялық атташе Ковач Иштван Тибор және «UBM GROUP» компаниясының бас директорының кеңесшісі Доктор Золтан Питер Винм аудандарды аралап, зауыт салуға қолайлы өңірлерді қарастырды.

Шымкент қаласының кәсіпкерлер палатасында өткен жиында кәсіпкерлерге инвестициялық карта кеңінен таныстырылды. Басқосуға Палата директорының орынбасары Бауыржан Бердалиев, «Kazakh Invest» АҚ Шымкент қалалық филиалының директоры Дінмұхамед Зиятбеков, Шымкент қаласының кәсіпкерлік және индустриялды-инновациялық даму басқармасының бөлім басшысы, «Invest Shymkent» өкілдері, кәсіпкерлер қатысты.