Заң-заман

Түркістан облысының полицейлері жоғалған жасөспірімді Алматы қаласынан тапты

Сауран аудандық полиция бөліміне жергілікті тұрғынның бірі арызданды. Әйелдің айтуынша, оның кәмелетке толмаған ұлы үйден белгісіз бағытқа шығып кетіп, қайта оралмаған. Жоғалған баланың туыстары алдымен өздері іздеген, алайда оны табудың өзіндік әрекеттері нәтиже бермейді. Содан кейін жасөспірімнің ата-анасы полициядан көмек сұрайды.

Хабарламаны алған полицейлер, дереу кәмелетке толмаған жасөспірімді іздеуге кірісті. Баланың белгілері аудандағы полицейлердің барлығына хабарланып, бағытнама берілді. Содан тәртіп сақшылары жақын маңдағы көшелер мен аулаларды, сондай-ақ бала бара алатын жерлерді мұқият қарап шықты.

Бірнеше күн бойы жүргізілген жедел-іздестіру іс-шараларының нәтижесінде, саурандық полиция қызметкерлері жоғалған жасөспірімді Алматы қаласынан тапты. Баланы аудандық полиция бөліміне жеткізіп, анасына тапсырды. Белгілі болғандай, жасөспірім отбасылық жанжалға байланысты үйден кеткен. Өз кезегінде кәмелетке толмаған баланың туыстары полиция қызметкерлеріне жоғалған жасөспірімді іздеуде көрсеткен кәсіби шеберлігі мен жедел көмегіне алғыс айтты.

Отырар: Полицейлер оқушылармен профилактикалық әңгімесулер өткізуде

Отырар ауданының полиция қызметкерлері 7-11 сынып оқушылары арасында «Кәмелетке толмағандар арасында құқық бұзушылықтың алдын алу және зорлық-зомбылыққа жол бермеу» тақырыбында түсіндіру жұмыстарын ұйымдастырды.

Атап айтсақ, Отырар аудандық полиция бөлімінің ювеналды полиция тобының инспекторы полиция капитаны Динара Есенова, Аққұм ауылдық округінде орналасқан С.Сейфуллин атындағы жалпы орта мектепте профилактикалық іс-шара ұйымдастырды.

Онда оқушыларға қылмыстың алдын алу, құқық бұзушылық жасағаны үшін жауапкершілік бары айтылып, темекі мен алкогольді тұтынудың жағымсыз салдары туралы ақпараттар берілді. Және түнгі уақытта үйден тыс жерде болмау, жүргізуші куәлігінсіз көлік жүргізбеу, сондай-ақ қоғамдық орындарды ластамау туралы да айтылды. Сонымен қатар, семинарда елімізде белең алып келе жатқан есірткі заттарының заңсыз айналымы жөніндегі өзекті мәселесі талқыланды. Есірткі заттарының синтетикалық түрлерінің кеңінен таралуы, әсіресе жастар арасында жоғарғы сұранысқа ие болуы алаңдатады. Президентіміз 1 қыркүйектегі Қазақстан халқына жасаған жолдауында бүл кеселмен күресу бағыты жалпыұлттық деңгейде көтерілуі қажет екендігін жеткізді. Қолданыстағы технологияның дамуы есірткі заттардың таралуындағы жаңа әдістерінің пайда болу жолдарын ашуда. Аула қабырғаларында бейнеленген есірткі заттарының жарнамалары, есірткінің сан алуан түрін сатуға дайын тұрған Интернет желісіндегі сайттар, есірткіні оңай саудаға салуға мүмкіндік беретін әлеуметтік мессенджердегі парақшалар жыл санап көбейіп келеді. Осыған орай қоғам, саналы азамат және әрбір қызметкер есірткі бизнесімен күресуді өзінің асыл борышы ретінде санап, соған сай сауатты шара қолдануы заман талабы екендігі түсіндірілді. Өз кезегінде семинарға шақырылған нарколог-психиатр маман өзінің баяндамасында, жасөспірімдердің психологиялық және психикалық денсаулығына ерекше назар аудару керектігін, нашақорлықтың салдарын, электронды темекінің адам ағзасына зияны туралы, есірткі қабылдаған адам өмір бойы психикалық ауру деген диагнозы қалатындығын түсіндірді. Сондай-ақ, жасөспірімдердің психикасы мен психологиясы көптеген факторларға тәуелді екенін ескере отырып, оған күнделікті тәртіпті сақтау, дұрыс тамақтану, таза ауада жүру, қозғалыс белсенділігі және психологиялық жайлылық туралы айтып өтті. Сондай-ақ жиналыста тәртіп сақшылары жасөспірімдерді қоғамдық тәртіпті сақтауға және салауатты өмір салтын ұстануға шақырды. Полицейлердің айтуынша, мұндай іс-шаралар кәмелетке толмағандарға мінез-құлық туралы ойлануға және заңсыз әрекеттер жасағаны үшін жауапкершілік барын есте сақтауға көмектеседі. Осыған ұқсас семинарлар барлық мектептерде өткізілуі жоспарлануда.

Түркістан облысында «Қауіпсіз жол жүрісі апталығы» брифингпен бастау алды

14 қарашадан бастап, БҰҰ Бас Ассамблеясының 20 қарашада өткізілетін жол-көлік оқиғаларының құрбандарын еске алу күні аясында, ҚР ІІМ тапсырмасымен «Қауіпсіз жол жүрісі апталығы» мен «Есіңе ал және ойлан!» ұранымен қоғамдық акциясы басталды.

Осыған орай Түркістан облысы ПД-ның «Инстаграм» және «Фейсбук» ресми парақшаларында тікелей эфир өткізілді. Оған спикер ретінде Түркістан облысы ПД Әкімшілік полиция басқармасының бастығы полиция полковнигі Алмасхан Тастанбеков пен Жергілікті полиция қызметі басқармасы бастығының орынбасары полиция подполковнигі Бегімхан Ахметов қатысты.

Брифингке спикер ретінде қатысқан полицейлердің айтуынша, акция аясында жол апатын болдырмау мақсатындағы сан түрлі іс-шаралар ұйымдастырылады.

Статистикаға сүйенсек, облыста 2022 жылдың 10 айында 627 жол-көлік оқиғасы орын алған. Салдарынан 273 адам қаза тауып, 702 адам жарақат алған.

Сондай-ақ брифинг барысында әлеуметтік желі қолданушылары белсенділік танытып, 20-ға жуық сауалдарын жолдады. Бұл сұрақтарға полиция мамандары дер кезінде жауап беріп, желі қолданушыларының алғысын алды.

Осы орайда барша жолаушылар мен жүргізушілерді әрқашан жол қозғалысы ережелерін сақтауға шақырамыз.

Сауран: құқықбұзушылықтың алдын алу мақсатында түнгі рейд жұмыстары ұйымдастырылды

Сауран ауданы, Шаға ауылдық округінде жастар мен жасөспірімдер арасында құқықбұзушылықтың, қоғамдық орындарда тәртіп бұзу, келеңсіз оқиғалардың алдын алу мақсатында түнгі рей ұйымдастырлды.

Түркістанда «Сіздің жолаушыңыз – бала» акциясы өткізілді

"Қауіпсіз жол жүрісі апталығы" аясында облыс орталығының полицейлері «Сіздің жолаушыңыз – бала» акциясын өткізді.

Аталған шараның басты мақсаты – балаларды автомобиль көлігімен тасымалдау кезінде қажетті құрылғыларды пайдалану қажеттілігі туралы халық арасында түсіндіру жұмыстарын жүргізу, сондай-ақ жол-көлік жарақатының алдын алу, жолын кесу.

Іс-шара барысында Түркістан ҚПБ қызметкерлері халық арасында, оның ішінде "Жолаушы" ЖШС-нің 30 және "ТехАвтоПром" ЖШС-нің 14 қоғамдық жүргізушілеріне жол қозғалысы ережесін қатаң сақтап, балалардың қауіпсіздігін басты орынға қоюды түсіндірді. Және жүргізушілерге ескертпе қағаздарын таратты.

Іс-шараның маңыздылығын жіті түсінген жүргізушілер, қауіпсіздік шараларын ұстанатынын жеткізіп, полиция қызметкерлеріне алғысын білдірді.

Сонымен қатар полицейлер білім ошақтарына барып, бастауыш сынып пен жоғары сынып оқушыларына “балалардың жолдағы қауіпсіздігі” бойынша арнайы дәрістер өткізді.

Түркістан облысының полицейлері жүргізушіден 20 келіден астам марихуана тәркіледі

Түркістан облысы ПД Есірткі қылмысына қарсы іс-қимыл басқармасының қызметкерлері жедел-іздестіру іс-шараларын жүргізу барысында, Түлкібас АПБ және патрульдік полиция батальонының полицейлерімен бірлесіп, есірткі құралдарын заңсыз тасымалдаған күдіктіні анықтады.

Нақтырақ айтсақ полиция қызметкерлері, Түлкібас ауданы арқылы өтетін "Батыс Қытай - Батыс Еуропа" автожолында "Субару" маркалы автокөлікті тоқтатты. Жедел уәкілдер тінту жүргізу кезінде көліктің жүксалғышынан ішінде есірткіге ұқсас заты бар 4 қап пен өсімдік тектес темекі қорабын тапты. Анықталғандай, күдікті жүргізуші бұрын сотталған Түлкібас ауданының тұрғыны болып шықты.

Күдіктіден алынған дәлелдемелер сараптамаға жіберілді. Зерттеу қорытындысына сәйкес алынған айғақты заттар жалпы салмағы 20 келіден асатын "кептірілген марихуана" есірткісі екені расталды. Аталған жайт ҚР ҚК 296-бабы 4-бөлігі бойынша "Есірткі, психотроптық заттармен, сол тектестермен өткізу мақсатынсыз заңсыз жұмыс істеу" бойынша тіркелді. Күдікті қамауға алынды. Бүгінде оқиғаның толық мән-жайы анықталуда. Түркістан облысының полицейлері азаматтарға есірткі құралдарын заңсыз тасымалдау мен сақтауға қатаң қылмыстық жауапкершілік қарастырылғанын ескертеді.

ҚР Қылмыстық Кодексi 296-бабында «Есірткі, психотроптық заттармен, сол тектестермен өткізу мақсатынсыз заңсыз жұмыс істеу»:

Ескерту. 296-баптың тақырыбына өзгеріс енгізілді - ҚР 27.12.2019 № 292-VI (қолданысқа енгізілу тәртібін 2-баптан қараңыз) Заңымен.
1. Қоғамдық орындарда есiрткi, психотроптық заттарды, сол тектестерді медициналық емес тұтыну –
сексен айлық есептiк көрсеткiшке дейiнгi мөлшерде айыппұл салуға не сол мөлшерде түзеу жұмыстарына не сексен сағатқа дейінгі мерзімге қоғамдық жұмыстарға тартуға не жиырма тәулікке дейінгі мерзімге қамаққа алуға жазаланады.
2. Есiрткi, психотроптық заттарды, сол тектестерді өткізу мақсатынсыз заңсыз дайындау, қайта өңдеу, иемдену, сақтау, тасымалдау –
бір жүз алпыс айлық есептік көрсеткішке дейінгі мөлшерде айыппұл салуға не сол мөлшерде түзеу жұмыстарына не бір жүз алпыс сағатқа дейінгі мерзімге қоғамдық жұмыстарға тартуға не қырық тәулікке дейінгі мерзімге қамаққа алуға жазаланады.
3. Ірі мөлшердегі есiрткi, психотроптық заттарды, сол тектестерді өткізу мақсатынсыз заңсыз дайындау, қайта өңдеу, иемдену, сақтау, тасымалдау – екі жүз айлық есептiк көрсеткiшке дейiнгi мөлшерде айыппұл салуға не сол мөлшерде түзеу жұмыстарына не екі жүз сағатқа дейiнгi мерзiмге қоғамдық жұмыстарға тартуға не елу тәулікке дейінгі мерзімге қамаққа алуға жазаланады.
4. Аса ірі мөлшердегі есiрткi, психотроптық заттарды, сол тектестерді өткізу мақсатынсыз заңсыз дайындау, қайта өңдеу, иемдену, сақтау, тасымалдау – үш жылдан жеті жылға дейінгі мерзімге бас бостандығынан айыруға жазаланады.
Ескертулер.
1. Есірткі және психотроптық заттардың мөлшері Қазақстан Республикасының Үкіметі бекітетін Заңсыз айналымда жүргені анықталған есірткі, психотроптық заттарды, сол тектестер мен прекурсорларды шағын, ірі және аса ірі мөлшерге жатқызу туралы жиынтық кестеде айқындалады. Есірткі мен психотроптық зат тектестердің шағын, ірі және аса ірі мөлшерлері өздері тектестері болып табылатын есірткі және психотроптық заттардың шағын, ірі және аса ірі мөлшеріне сәйкес келеді.
2. Жеке тұтыну үшін сатып алған есiрткi, психотроптық заттарды, сол тектестерді, прекурсорларды өз еркiмен тапсырған не есiрткi, психотроптық заттарды, сол тектестерді медициналық емес мақсаттарда тұтынуына байланысты медициналық көмек көрсетiлуi үшiн медициналық мекемеге өз еркiмен барған не есiрткi, психотроптық заттардың, сол тектестердің, прекурсорлардың заңсыз айналымына байланысты қылмыстарды ашуға немесе олардың жолын кесуге, оларды жасаған адамдарды әшкерелеуге, қылмыстық жолмен табылған мүлiктi табуға белсендi түрде ықпал еткен адам осы бап бойынша қылмыстық жауаптылықтан босатылады.

Түркістан: “Қорғау” қосымшасы полицейге жол ережесін бұзушыны анықтауға мүмкіндік береді

ІІМ әзірлеген “Қорғау” қосымшасы полицейге жол ережесін бұзушыны анықтауға мүмкіндік береді
Бағдарлама көше камераларының деректерін талдай отырып, жақын маңдағы полицейдің планшетіне қауіпті жүргізушінің оған жақындағаны туралы сигнал береді. Бұл жол қозғалысы ережесін қасақана бұзушы немесе машинаны жоғары жылдамдықпен басқаратын жүргізуші болуы мүмкін. Қазір мұндай жоба Астана, Алматы, Шымкент, Өскемен, Атырау және Түркістан қалаларында жүзеге асырылуда. Аталған өңірлерде 11 мыңнан астам автокөлік айыппұл тұрағына қамалды, 3,5 мың құқық бұзған автокөліктің нөмірлік белгілері тәркіленді. Жалған мемлекеттік нөмірлерді пайдаланудың 726 фактісі анықталды. Басқару құқығы жоқ немесе бұрын осындай құқықтан айырылған 2 285 жүргізуші ұсталды.

Сауран: Көршісінің үйіне ұрлыққа түскен ер адам анықталды

Сауран аудандық полиция бөліміне жергілікті тұрғын арызданды. Әйелдің айтуынша, оның үйіне белгісіз біреу терезесі арқылы кіріп, 2 дана ноутбук пен алтын бұйымдарын жымқырып кеткен. Жәбірленушіге келтірілген шығын көлемі 1 миллион теңге. Аталған жайт бірден ҚР ҚК-нің 188-бабы «Ұрлық» бойынша тіркеуге алынды.

Тәжірибелі тәртіп сақшылары ұрлық қылмысын ашу мақсатында қажетті шараларды жүзеге асырды. Олар жақын аумақтарды түгел қарап шығып, көрген-білгендерден жауап алды. Жедел-іздестіру шараларының нәтижесінде күдікті ретінде жәбірленушінің ауылдасы анықталды. Полицейлер оны полиция бөліміне жеткізді.

Анықталғандай, ер адам түнгі уақытта жәбірленушінің үйінде ешкім жоқтығын байқап, арам ойын іске асырған. Яғни қоршаудан секіріп өтіп, пластик терезені күшпен ашу арқылы үйге ұрлыққа түскен. Нәтижесінде ұрлаған алтындарды облыс орталығындағы ломбардтардың біріне өткізсе, ноутбуктың біреуін сатып кеткен. Ал ақшасын жаратып жіберген.

Күдіктіден айғақты зат ретінде ұрланған ноутбуктың біреуі тәркіленіп алынып, заңды иесіне қайтарылды. Қазіргі таңда ұсталған күдіктіге қатысты тергеу амалдары жүргізілуде. Облыс полицейлері ескертеді, ұрлық қылмысының алдын алу үшін үйлеріңіздің терезесіне темір тор қойып, бейнебақылау камераларын орнатыңыздар.

ҚР Қылмыстық Кодексi 188-бап. Ұрлық туралы былай жазылған.

1. Ұрлық, яғни бөтеннің мүлкін жасырын жымқыру –
мүлкі тәркіленіп немесе онсыз, бір мың айлық есептiк көрсеткiшке дейiнгi мөлшерде айыппұл салуға не сол мөлшерде түзеу жұмыстарына не сегіз жүз сағатқа дейінгі мерзімге қоғамдық жұмыстарға тартуға не үш жылға дейiнгі мерзімге бас бостандығын шектеуге не сол мерзімге бас бостандығынан айыруға жазаланады.
2. Мынадай:
1) адамдар тобының алдын ала сөз байласуымен;
2) алып тасталды - ҚР 21.01.2019 № 217-VI Заңымен (алғашқы ресми жарияланған күнінен кейін күнтізбелік он күн өткен соң қолданысқа енгізіледі);
3) алып тасталды - ҚР 27.12.2019 № 292-VI (қолданысқа енгізілу тәртібін 2-баптан қараңыз) Заңымен.
4) ақпараттық жүйеге заңсыз кіру не телекоммуникациялар желісі бойынша берілетін ақпаратты өзгерту жолымен жасалған ұрлық –
мүлкі тәркіленіп, үш мың айлық есептiк көрсеткiшке дейiнгi мөлшерде айыппұл салуға не сол мөлшерде түзеу жұмыстарына не бір мың екі жүз сағатқа дейінгі мерзімге қоғамдық жұмыстарға тартуға не бес жылға дейiнгі мерзімге бас бостандығын шектеуге не сол мерзімге бас бостандығынан айыруға жазаланады.
3. Мынадай:
1) ірi мөлшерде;
2) бірнеше рет:
3) тұрғын, қызметтiк немесе өндiрiстiк үй-жайға, қоймаға не көлік құралына заңсыз кiрумен жасалған ұрлық –
мүлкi тәркiленіп, екі жылдан жетi жылға дейiнгi мерзiмге бас бостандығын шектеуге, не сол мерзімге бас бостандығынан айыруға жазаланады.
4. Мынадай:
1) қылмыстық топ жасаған;
2) мұнай-газ құбырынан;
3) аса iрi мөлшерде жасалған ұрлық –
мүлкi тәркiленiп, бес жылдан он жылға дейiнгi мерзiмге бас бостандығынан айыруға жазаланады деп.