Білім күніне арналған негізгі салтанатты жиын Теріскей шағынауданында орналасқан жаңартылған №46 мектеп-лицейде өтті. Іс-шараға Шымкент қаласының әкімі Ғабит Сыздықбеков қатысып, ұстаздар мен оқушыларды жаңа оқу жылымен құттықтады. Мерекелік жиын Мемлекеттік Туды көтеріп, Қазақстан Республикасының Мемлекеттік Әнұранын орындаудан басталды.

Биылғы 1 қыркүйек еліміз үшін маңызды тақырыпқа арналды. «Қазақстан Республикасының Конституциясы: Адал азамат, зерделі ұлт және жауапты қоғам қалыптастырудың негізі» тақырыбы аясында оқушыларға елдің басты құжатының маңызы, азаматтық жауапкершілік, заңды құрметтеу және ұлттық құндылықтарды сақтау жөнінде түсіндіру жұмыстары жүргізілді.

Қала әкімі өз сөзінде білім сапасын арттыру, білім беру жүйесін цифрландыру, жасанды интеллект мүмкіндіктерін меңгеру және жастарға сапалы білім алуға қолайлы жағдай жасау мемлекеттік саясаттың басым бағыттарының бірі екенін атап өтті. Қазіргі таңда білім беру саласында дәстүрлі оқыту әдістерімен қатар, заманауи технологияларды тиімді пайдалану қажеттілігі артып келеді. Бұл бағытта оқушылардың жаңа білімді меңгеруімен бірге олардың шығармашылық және сыни ойлау қабілеттерін дамытуға да ерекше мән берілуде.

Шымкентте білім беру инфрақұрылымын жаңарту жұмыстары да жүйелі түрде жалғасып жатыр. Соңғы екі жыл ішінде қала аумағында 13 жаңа мектеп салынды. Сонымен қатар биыл 7 білім беру нысанына күрделі жөндеу жүргізіліп, 6 мектепке қосымша ғимараттар салынды. Бұл жұмыстардың негізгі мақсаты – оқушылар үшін қауіпсіз, жайлы әрі заманауи білім беру ортасын қалыптастыру.

Жаңартылған №46 мектеп-лицей де осы жұмыстардың нәтижесінде жаңа кейіпке енді. Биыл білім ордасында 478 миллион теңгеге күрделі жөндеу жүргізілді. Жөндеу барысында мектеп ғимаратының қасбеті мен шатыры толық жаңартылып, спорт залы мен жертөле бөлігі ретке келтірілді. Екі ауысымда білім беретін мектепте бүгінде шамамен 2700 оқушы оқиды. Ал биыл бірінші сыныпқа 218 бала қабылданды.

Жаңа оқу жылының алғашқы күнінде мектептерде тек мерекелік жиындармен шектелмей, оқушылардың тәрбиесіне бағытталған мазмұнды іс-шаралар да өткізілді. Білім күні аясындағы шаралар тәрбие мен ұлттық құндылықтарға басымдық бере отырып, артық шығынсыз ұйымдастырылды. Салтанатты жиындардан кейін барлық оқушыға Конституция құндылықтары мен жалпыұлттық жобаларға арналған бірыңғай сынып сағаттары өткізілді.

Жаңа оқу жылы – оқушылар үшін жаңа білім мен жаңа мүмкіндіктердің бастауы. Ал ұстаздар үшін жас ұрпаққа сапалы білім беріп, олардың бойына отансүйгіштік, жауапкершілік және адамгершілік қасиеттерді қалыптастыруға бағытталған маңызды кезең. Шымкентте білім саласына жасалып жатқан инвестициялар мен мектептердің жаңғыртылуы қаладағы өскелең ұрпақ үшін қолайлы білім беру ортасын қалыптастыруға мүмкіндік береді.

Осылайша, 405 мыңға жуық оқушы үшін басталған жаңа оқу жылы білім мен тәрбиеге, заманауи технологияларға және ұлттық құндылықтарға негізделген жаңа кезеңнің басталуын айқындап отыр.