Түркістан облысының ауыр атлетикадан құрама командасы Өскемен қаласында өткен Қазақстан Республикасының чемпионатына қатысты. Жеке жаттығулар бойынша 17 жасқа дейінгі ұлдар мен қыздар арасындағы ҚР жеке-командалық чемпионатында Түркістан өңірінен қатысқан бірқатар спортшылар жүлделі орындарға ие болды.
Түркістан облысы Жетісай ауданында спорт саласының дамуына сүбелі үлес қосып келе жатқан талантты бапкер, білікті басшы, Жетісай аудандық мәдениет, тілдерді дамыту, дене шынықтыру және спорт бөлімінің «Жетісай спорт клубы» КММ құрылғанына 5 жыл толуы мен клуб директоры Таласхан Битуреевтың 50 жас мерей тойына орай кіші футбол мен волейболдан 50 жастан асқан ардагерлер арасында халықаралық турнир ұйымдастырылды. Аудан спортын дамытуға бағытталған айтулы шараға Астана, Алматы және Шымкент қалалары мен облыс аумағындағы аудан-қалалардан, көршілес Өзбекстан Республикасынан командалар қатысып, өзара бақ сынасты. Турнир барысында әр команда өздерінің жоғары дайындықтарын көрсетіп, тартысты әрі қызықты ойын өрнегін көрсетті.
Түркістан қаласында академиялық ескек есуден көктемгі Қазақстан Республикасының чемпионаты өтті. Ел біріншілігінде Түркістан облысының спортшылары жоғары нәтиже көрсетіп, жалпы есепте 19 алтын, 18 күміс және 9 қола медаль жеңіп алды.
17 наурызда Түркістан қаласындағы жаңадан салынған атшабарда көкпардан әлем чемпионаты жалауын көтерді. Дүбірлі додаға әлемнің 9 елінен командалар қатысуда. Атап айтқанда, Ауғанстан, Қытай, Мажарстан, Моңғолия, Ресей Федерациясы, Тәжікстан, Өзбекстан, Түркия және Қазақстан құрамалары жүлде жолында бақ сынайды.
Шымкент қаласының спортшылары халықаралық жарыстарда табысты өнер көрсетіп, ел қоржынына бірқатар жүлде салды. Грек-рим күресі мен бокс бойынша өткен беделді турнирлерде шымкенттік спортшылар жоғары нәтижеге қол жеткізіп, Қазақстанның спорттағы беделін арттыра түсті.
Түркістан облысында спортты, туризмді және инвестицияны дамытуға бағытталған жаңа ауқымды жоба жүзеге асырылмақ. Облыс әкімі Нұралхан Көшеров осыдан бірер күн бұрын инвесторлармен кездесіп, Ұлттық спорттық-оқыту және сауықтыру хабын салу мәселесін талқылады. Жобада футболшыларға арналған заманауи, тәулік бойы жұмыс істейтін жаттығу базасы қарастырылған. Ауқымды инвестжоба Сарыағаш ауданында салынбақ. Бұл аймақ ауа-райының қолайлылығымен ерекшеленеді, сондықтан база жыл бойы үздіксіз жұмыс істей алады.
Түркістан облысының спорт мектептерінде 89700 спортшы спорттың 63 түрімен тұрақты түрде тегін шұғылдануда. 2024 жылмен салыстырғанда 27438 балаға немесе 69 пайызға артты. 2025 жылғы 12 айда дене шынықтыру және спортпен тұрақты түрде шұғылданатын барлық жастағы тұрғындар саны 851 мың адамға жетіп, халықтың 42,8 пайызын құрап бекітілен индикаторлық көрсеткіш орындалды.
Түркістан облысы Жетісай ауданы Асықата кентінде «SPORT ASSET MANAGEMENT» қоғамдық бірлестігінің жеке инвестициясы есебінен заманауи үстел теннис орталығы қолданысқа берілді. Орталықтың ашылуына Түркістан облысының әкімі Нұралхан Көшеров арнайы қатысып, тұрғындарды құттықтады.