Күнгейдегі облыстардың бірінде бірқатар басқармаларға басшы тағайындау қиын соғып жатқан көрінеді. Ұзынқұлақтың сөзіне сенсек, әлгі басқармалардың бірінің тізгінін ұстайды деп таудай сенім артылған кісі конкурстан сүрініпті-міс. Енді «екінші айналымды» тағатсыздана күтіп жүр екен. «Қалайда бағым жануы тиіс» деген ниетпен. «Сірә, жоғары жақта «бағын жандыратын» жәкелері бар-ау. Әйтпесе өңірдегі №1 кісі анау-мынауға қарайламаушы еді. Өзінің ырқында болса, әлдеқашан сынақтан сүрініп-қабынып жүретін мұндай шикі кадрға емес, өз ісіне мығым, тірлігі тап-тұйнақтай маманға «ставка» жасар еді» дейді желауыздар. Әзірге, амал нешік, әлгі тұтастай басқарма мен оған қарасты мекемелер болашақ жаңа басшының екінші рет конкурсқа қатысар уақытын саусақпен санап тосып жүргенге ұқсайды.  

Одан бөлек 2-3 айдан бері тағы бір басқарманың басшысын лауазымынан босату ақырет болып тұрғандай. Сірә, облыс әкімінің оны өз командасында көргісі келмеген емеурінін дұрыс түсінбесе керек. «Қайта-қайта «больничный» аштырып, оны әрлі-берлі созып, әуре-сарсаңға түсіп жүр. Шамасы, жоғары жақтан өңір басшысына сөзін өткізіп, араша түсе алатын көкелерін жағалап жүр-ау. Алайда оның «өлетін» жағдайы жоқ. «Госслужбадан» кетсе де, күнін «беймарал» көреді. Дөңгелетіп отырған әжептәуір тірліктері бар» дейді құлағы түрік сәуегейлер. Әйткенмен ол шендінің өзінде де бір кәкір бар сияқты. «Кісікиіктеу, «кругқа» қосылмайды», менталитеті де басқаша» дей ме, бірдеңе.