Әрине, жаңадан ашылған ауданның тізгін-шылбырын мықтап ұстап, шаруасын дөңгелетіп әкету оңай тірлік емес. Сондықтан кім болса да, әлгі мақталы һәм жылыжайлы аудандарға қолынан іс келетін, көрген-түйгені мол кадрлардың барғанын қалар едік. Мысалы, мемлекеттік қызметте тәжірибесі аз болғанымен, бизнесте әбден ысылғандығына әрі Мырзашөл өңірі мен «ақ алтынның» жай-жапсарын бес саусағындай білетіндігіне «ставка» жасап, облыс әкімінің орынбасары Бауыржан Жамаловқа неге ауданды басқартып көрмеске?!

Кезінде Жетісай қаласы мен Мақтарал ауданын тізгіндеген Жамантай Бейсенбаев та тағынан тайып тұрған жоқ. Зейнетке шығуына әлі 4 жылдай уақыт бар.

Төрт жылдан астам мерзімде тоғыз жолдың торабындағы Арыс қаласын ажарландырып, қадамын қарыштатқан Сейіт Ертай да Мақтарал ауданына бөтен емес. Еңбек жолын 1993 жылы Жетісай ауданы әкімшілігі жастар ісі жөніндегі комитетінің бас маманы болып бастаған. Жетісай ауданы әкімшілігі жастар ісі, спорт және туризм жөніндегі басқармасының бастығы, Мақтарал ауданы әкімі аппараты ішкі саясат және әлеуметтік сала бөлімінің бас маманы, Мақтарал ауданы әкімшілігі ақпарат, мәдениет және қоғамдық келісім комитетінің төрағасы, Мақтарал ауданы Қазыбек би ауылдық округінің әкімі лауазымдарын атқарды.

Бір кездері Ордабасы ауданының әкімі болған Шоқан Кенжеев пен Данияр Тілеубергеновке де жаңа аудандардың жауапкершілігін жүктеп көрсек ше?

Жә, осымен тізгінді тарта тұрайық: «свято место пусто не бывает».