Халықаралық іс-шара Түркістан облыстық «Фараб» әмбебап ғылыми кітапханасының қайта құрылғанына 5 жыл толуына орай ұйымдастырылып, бауырлас халықтардың ортақ рухани мұрасын дәріптеуді, кітапхана ісіндегі халықаралық ынтымақтастықты дамыту мен әдеби-мәдени байланысты нығайтуды мақсат етеді. Кездесу аясында «Кітап – достықтың алтын көпірі» атты халықаралық кітап көрмесінің салтанатты ашылуы өтіп, Қазақстан мен Өзбекстан қаламгерлерінің шығармалары, ғылыми, тарихи және көркем әдебиеттерден жасақталған кеңейтілген көрме көпшілік назарына ұсынылады.
Іс-шараға Қазақстан Жазушылар одағы, Халықаралық әдебиет, өнер, мәдениет және әлеуметтік ғылымдар академиясы, Ташкент мемлекеттік Шығыстану университеті, Өзбекстан Республикасының «Bilim» ақпараттық-кітапхана орталығы, Жызақ облыстық Шараф Рашидов атындағы ақпараттық-кітапхана орталығы, сондай-ақ Қазақстан мен Өзбекстанның мәдениет, ғылым және кітапхана саласының өкілдері қатысады.
Бағдарлама барысында Түркістан облыстық «Фараб» әмбебап ғылыми кітапханасына экскурсия ұйымдастырылып, Қазақстан мен Өзбекстан кітапханашыларының қатысуымен «Заманауи кітапхана: халықаралық тәжірибе және кәсіби ынтымақтастық» атты халықаралық тәжірибе алмасу семинары өтеді. Семинарда кітапхана ісін цифрландыру, ақпараттық технологияларды енгізу, оқырманға қызмет көрсетудің заманауи үлгілері, халықаралық жобаларды жүзеге асыру және кәсіби ынтымақтастықты дамыту мәселелері талқыланады.
Естеріңізде болса, Ташкент қаласында Орталық Азия елдері мен АҚШ мәдениет министрлерінің C5+1 форматындағы кездесуі аясында Қазақстан Республикасы Премьер-Министрінің орынбасары – Мәдениет және ақпарат министрі Аида Балаева Өзбекстан Республикасының Мәдениет министрі Озодбек Назарбековпен кездескен болатын. Тараптар екі ел арасындағы мәдени-гуманитарлық байланыстарды одан әрі дамыту мәселелерін талқылады. Әсіресе әдебиет саласындағы ынтымақтастыққа және театр өнері бағытындағы өзара іс-қимылды кеңейтуге баса назар аударылды.
Кездесу соңында тараптар 2024-2025 жылдарға арналған іс-шаралар жоспарының толық жүзеге асырылғанын атап өтіп, Қазақстан Республикасы Мәдениет және ақпарат министрлігі мен Өзбекстан Республикасы Мәдениет министрлігі арасындағы 2026-2027 жылдарға арналған мәдени-гуманитарлық ынтымақтастық жөніндегі жаңа іс-шаралар жоспарына қол қойған болатын. Аталған құжат екі ел арасындағы мәдени байланысты нығайтуға бағытталған бірлескен іс-шараларды өткізу мен ортақ жобаларды іске асыруды көздейді.
Қазақ пен өзбек халқының әдебиеті мен мәдениеті терең тарихи және рухани байланысқа ие екені баршаға мәлім. Бұл жақындықтың қайнар бастауы ортақ түркілікте жатқаны белгілі. Қазіргі уақытта да бұл үрдіс жалғасуда. Қазақ пен өзбек әдебиетінің жаңа буын өкілдері шығармаларын бір-біріне аударып, әдеби байланыстарды нығайтуда. Қазақ пен өзбек қарым-қатынасын жақындататын ортақ құндылық көп. Өйткені екі елдің салт-дәстүрі, мәдениеті, тілі, діні ұқсас. Бүгінде тарихы тамырлас халықтардың мызғымас достығы мемлекеттерді бір мақсат пен мүдде жолына тоғыстырып отыр. Тату көрші, сенімді серіктестікке негізделген берік қарым-қатынастың арқасында бауырлас елдердің арасындағы ортақ келісім де көбейіп келеді.
Мәдениетаралық байланыстарды нығайту, Қазақстандағы этносаралық келісімді қамтамасыз ету және ұлттық дәстүрлерді сақтау үшін мәдени іс-шаралар мен жобалар да жүзеге асырылады. Мысалы, ұлттық мерекелер мен фестивальдер еліміздің көпэтникалық қоғамын біріктіруге, әртүрлі ұлттардың мәдениетін танытуға, сондай-ақ ұлттық құндылықтарды сақтауға мүмкіндік береді. Қазақстанда жыл сайын ұлттық мәдениет күндері, тілдер фестивалі және басқа да мәдени шаралар өткізіледі. Мұндай шаралар халықтардың мәдени ерекшеліктерін құрметтеу, ұлттық мұраны сақтау және болашақ ұрпаққа жеткізу үшін маңызды алаң.
Қазақстанның ұлттық мәдениеті бірегейлігі мен байлығын сақтау үшін мәдениет саласына мемлекет тарапынан зор қолдау көрсетіледі. Үкімет тарапынан ұлттық мәдениет, тілдер мен дәстүрлерді дамыту үшін арнайы бағдарламалар қабылдануда. Атап айтқанда, «Мәдени мұра» мемлекеттік бағдарламасы ұлттық мәдениетімізді сақтау, зерттеу және қайта жаңғырту үшін үлкен мүмкіндік ашты. Бұл бағдарлама аясында тарихи-мәдени ескерткіштерді қорғау, ұлттық қолөнерді дамыту және мәдени құндылықтарды сақтауға арналған жобалар іске асырылды. Сонымен қатар бұл бағдарлама ұлттық мәдениетіміздің өкілдерін қолдау үшін қажет ғылыми-зерттеу жұмыстарын жүргізуге де мүмкіндік береді.
Этносаралық келісім мен мәдени түрлілікті қолдау саласындағы ғылыми-зерттеу жұмыстарын дамыту да маңызды мәселе. Қазақстандағы көптеген ғылыми-зерттеу институттары мен университеттер мәдениетаралық қарым-қатынас, этносаралық келісім мен әлеуметтік интеграция мәселелерін зерттейді. Әсіресе, елімізде этнографиялық зерттеулер жүргізетін институттар мен мәдениеттанушы ғалымдардың жұмысы мәдени мұраны сақтауға, оның дамуына бағытталған. Бұл жұмыстар этносаралық қатынастардың ерекшеліктерін тереңірек түсінуге мүмкіндік береді. Сондай-ақ, бұл зерттеулер Қазақстандағы мәдени әртүрлілік мәселелерін шешу жолдары мен әдіс-тәсілдерін көрсетуге мүмкіндік береді.
Қазақстандағы этносаралық келісім мен мәдени әртүрлілікті сақтау мен дамыту мәселесі сонымен қатар еліміздегі діндер мен конфессиялар арасындағы түсіністік пен бейбітшілікті нығайтуға да бағытталған. Әлемдік және дәстүрлі діндер арасындағы бейбітшілік пен келісімді сақтау үшін Қазақстанда әртүрлі халықаралық діни форумдар мен конференциялар өткізіледі. Бұл іс-шаралар дінаралық қатынастарды нығайту, конфессияаралық диалогты дамыту және әлемнің түрлі діндері мен мәдениеттері арасында түсіністік пен құрмет орнату үшін өте маңызды.
Қазақстанның көпэтникалық және көпконфессиялы қоғамында этносаралық келісім мен мәдениетаралық диалогты қолдау мәселелері жалғасуда. Елдегі әртүрлі ұлттардың мәдениетін, тілін, дәстүрлерін сақтап, дамыта отырып, ұлттық мәдениетімізді сақтау мен қорғауға бағытталған мемлекеттік саясат жүзеге асырылуда. Бұл саясаттың басты мақсаты – Қазақстан халқының бейбітшілік пен келісімде өмір сүруін қамтамасыз ету, әртүрлі ұлттар мен этностардың өзара құрметін нығайту және мәдени мұраны сақтап қалу.
«WWW.AQ-QARA.KZ» - ақпарат