Заң-заман

Полицейлер жүргізуші куәлігінің мерзімі өтіп кеткен ер адамды анықтады

Республика көлемінде 19 шілде мен 18 тамыз аралығында «Қауіпсіз жол» жедел-профилактикалық шарасы жүйелі түрде жүргізілуде. Осы тұрғыда Мақтаарал аудандық полиция бөлімінің қызметкерлері рейдтік шара ұйымдастырды. Нәтижесінде, сағат 02:00 шамасында Мырзакент-Атакент тас жолы бойында қауіпсіздік белдігін тақпай келе жатқан «Mersedes Benz» маркалы автокөлікті тоқтатты. Жүргізушінің құжаттарын тексеру кезінде, оның жүргізуші куәлігінің мерзімі өтіп кеткені белгілі болды. Сонымен қатар, оның мас күйіне күдіктенген полицейлер, бірден медициналық сараптама тағайындады. Сараптама қорытындысына сәйкес, ер адамның алкоголдьді мас халде екендігі расталды.

Тәртіп сақшылары аталған көлік жүргізушісіне ҚР ӘҚБтК-нің 593-бабы 2-бөлігі «Жол жүрiсi қағидаларында көзделген жолаушыларды және жүктердi тасымалдау, қауiпсiздiк белдіктерiн немесе мотошлемдердi пайдалану жөніндегі талаптарды сақтамау» және ҚР ӘҚБтК-нің 612-бабы 2-бөлігі «Құжаттары жоқ және басқару құқығы жоқ адамның көлiк құралын басқаруы» бойынша хаттама толтырды. Сондай-ақ алкогольдік ішімдік ішіп, көлік басқарғаны үшін ҚР ӘҚБтК-нің 608-бабы 6-бөлігі «Көлік құралын басқаруға құқығы жоқ адамның масаң халде көлік құралын басқаруы» бойынша іс-құжаттар жинақталып, Мақтааарал аудандық сотына жолданды.

Облыс полицейлері тұрғындарға көлік жүргізуден алдын, құжаттарыңыздың толық болуын қадағалауды сұрайды. Және де мас халде көлік басқармауға кеңес береді.

Түркістандық полицейлер алтын бұйым ұрлаған күдікті әйелді қолға түсірді

Түркістан ҚПБ-ға алтын бұйымдарды сатумен айналысатын сатушы әйел арызданды. Жәбірленушінің айтуынша, белгісіз біреу оның сатылымда тұрған алтын білезігін жымқырып кеткен. Келтірілген шығын 250 000 теңгеге жуық. Аталған жайт ҚР ҚК-нің 188-бабы “Ұрлық" бойынша тіркелді.

Қылмысты дер кезінде ашу мақсатында Түркістан ҚПБ-ның қызметкерлерінен арнайы жедел-тергеу тобы құрылды. Полицейлер шұғыл іздестіру жұмыстарын жүргізді. Куәлардан жауаптар алынып, ғимараттағы барлық бейнекамералар жіті қаралды. Нәтижесінде түркістандық тәртіп сақшылары күдіктінің ізіне түсті. Бір күн ішінде оның түр-тұлғасын анықтап, полиция басқармасына жеткізді.

Анықталғандай, күдікті жас әйел жергілікті тұрғын болып шықты. Ол оңай жолмен ақша табу мақсатында, сатушының байқамай тұрған сәтін пайдаланып, алтын бұйымды жымқырған. Бүгінде полицейлер айғақты зат ретінде күдіктіден ұрланған алтын әшекейлерді тауып, заңды иесіне қайтарды.

Түркістан облысы полиция қызметкерлері тұрғындарға ескертеді: үй-жайларыңызға, жеке ғимараттарыңыз бен нысандарға мықты құлып орнатып, бейнекамералармен жабдықтаңыздар. Сондай-ақ аулаларыңызды жарықтандырып, есік-терезелеріңізге темір тор жасатыңыздар. Егер де, сіз, осы секілді ұрлық жайтының құрбаны немесе куәсі болсаңыз, тез арада «102» нөміріне хабарлаңыз.

Велосипед ұрлаған Шымкент қаласының тұрғыны анықталды

Мақтаарал аудандық полиция бөліміне жергілікті тұрғын арызданды. Әйел адамның айтуынша, сағат 23:00 шамасында өзінің тұрғын үйінің ауласына белгісіз тұлға кіріп, «KIDSDIK» және «Барыс» деген жазуы бар велосипедін жасырын жымқырып кеткен. Аталған жайтты полиция қызметкерлері ҚР ҚК-нің 188-бабы «Ұрлық» бойынша тіркеуге алды.

Хабарлама келіп түскен бойда тәртіп сақшылары оқиға орнына бірден келіп жетті. Күдіктіні анықтау үшін қажетті шараларды жүзеге асырды. Көрген-білгендерден сұрастыру жұмыстарын жүргізіп, жақын аумақтарды түгел қарап шықты. Нәтижесінде, бұрын сотты болған ер адам ұсталды. Ол Шымкент қаласының тұрғыны екені анықталды.

Белгілі болғандай, сезікті түнгі уақытта тұрғындардың ұйқыда жатқан сәтін пайдаланып, арам ойын жүзеге асырған. Ол бөтеннің мүлкін ұрлап, оқиға орнынан бой тасалаған. Велосипедті сатып, ақшасын жаратып жіберген. Қазіргі таңда күдікті қамауға алынып, оған қатысты сотқа дейінгі тергеу амалдары жүргізілуде.

Түркістан облысының полицейлері тұрғындарға ұрлықтың алдын алу үшін, тұрғын үйлер мен ғимараттарға бейнебақылау камераларын орнатуға кеңес береді. Сонымен қатар, есік-терезелерді мықтап жауып жатуды ұсынады.

Шардара: Дін - тәрбиенің рухани тірегі!

Шардара қаласында «Дін - тәрбиенің рухани тірегі», - тақырыбында кездесу өтті. Түркістан облысы дін істері басқармасы «Дін мәселелерін зерттеу орталығы» КММ - нің теолог маманы Д.Аманов, Шардара аудандық ішкі саясат бөлімінің әдіскері, теолог маманы А.Данияров, Шардара аудандық «Жастар ресурстық орталығы» КММ - нің теолог маманы Е.Сариев, Мәулен Қалмырзаев атындағы мамандырылғын мектеп интернатының директоры Б.Құлахметов қатысты. Түркістан облысы дін істері басқармасы «Дін мәселелерін зерттеу орталығы» КММ - нің теолог маманы Д.Аманов кездесудің мақсаты - діннің шығу тарихымен жастарды таныстырып, мәнін және оның қоғамда алатын орнын ұғындыру, діни экстремизмнің алдын алу бойынша жастардың діни сауаттылықтарын ашу, рухани - адамгершілік тәрбие беру. Сондай - ақ діни сауаты аз адамдар осындай теріс ағымдардың соңынан ілесіп кетуі мүмкін. Әсіресе, жастар. Осы мәселелерді зерттегенде, діни сауатсыздық ең басты себеп екендігін анықтадық. Елбасымыз Жолдауында: «Қазақстандықтар бойында діни радикализмге қарсы иммунитет қалыптастыру керек. Және ішкі сүзгі деген дүниені қалыптастыруымыз қажет», - деген болатын. Бұл дегеніміз санамызға тек қажетті ақпаратты ғана қабылдап, керек емесін қабылдамау. Теріс ағымдар психологиялық тұрғыда алдау - арбау арқылы дегендеріне жетеді. Тоғыз жолдың бірі дұрыс емес болып қалуы мүмкін. Сондықтан абайлап жүру қажет», - деді.

Сөз кезегінде Шардара аудандық ішкі саясат бөлімінің әдіскері, теолог маманы А.Данияров қазақ ислам дінін берік ұстанып, дінмен біте қайнасқан халық. Қазіргі қоғамда оғаш болып көрініп жүрген діни ұстанымдағы ерекшеліктер бұрынғы ата - бабаларымыз ұстанған дінмен сәйкес келмей жататындығы рас. Бірақ бұрынғы ата - бабаларымыздың діни бағытымен қазіргі қоғам қабылдаған, қалыптасқан діни бағыттың ешқандай айырмашылығы жоқ. Тек қазіргі қоғамда бұрын болмаған діннің атын жамылған теріс ағымдар бар. Міне, біз осылардан қорқамыз. Әйтпесе бұрынғы Құран кітаппен қазіргі Құран кітапты салыстырыңыз, аятында да, сөзінде де ешқандай айырмашылығы жоқ, - деп сөзін қорытындылады.

Шардара аудандық «Жастар ресурстық орталығы» КММ - нің теолог маманы Е.Сариев қазіргі таңда тәуелсіз мемлекетіміздің дамушы және дамыған елдерден ерекшелігі, ол - қоғамдағы діннің нығаюы мен елдегі діни ахуалдың тұрақты болуы. Біздің мемлекетіміз көп ұлтты, демократиялық мемлекет болғандықтан дін мәселесі жөнінде барлық азаматтарға қай дінге кіруіне, қандай дінде болуына еркіндік берілген. Осыған орай, еліміздің жарқын болашағын қалаушы - жас ұрпақтарымыздың санасын улап жатқан жат ағымдардың мән - мағынасын, әсер ету жолдары мен тигізер зияндары да аз емес. Дәстүрлі діндердің құндылықтары мен қасиетін түсіндіру және діни сенімдерді насихаттау, теріс пиғылды діни ағымдар бойынша діни терроризм мен экстремизмнің алдын алу. Жас ұрпақтың санасына және қоғамға іріткі салатын дәстүрлі емес, теріс пиғылдағы, деструктивтік діни ағымдардан сақтанудың жолдарын жастардың санасына ұғындыру басты міндетіміз деп сөзін қорытындылады.

Шардара: Діни сауаттылықтың маңыздылығы

2022 жылдың тамыз айының 18 - ші жұлдызы күні ауданда дін саласындағы діни тұрақтылықты қамтамасыз ету мақсатында «Ұлтық сараптамалық талдау орталығы» ҚҚ - ның ұйымдастыруымен Шардара аудандық пробация бөлімінде есепте тұратын азаматтармен «Діни сауаттылықтың маңыздылығы», - тақырыбында кездесуге, Түркістан облысы дін істері басқармасы «Дін мәселелерін зерттеу орталығы» КММ - нің теолог маманы Д.Аманов, Шардара аудандық ішкі саясат бөлімінің әдіскері, теолог маманы А.Данияров, Шардара аудандық «Жастар ресурстық орталығы» КММ - нің теолог маманы Е.Сариев, Шардара аудандық пробация бөлімінің инспекторы, әділет капитаны Н. Алпысбаев қатысты.

Түркістан облысы дін істері басқармасы «Дін мәселелерін зерттеу орталығы» КММ - нің теолог маманы Д.Аманов бүгін де, асыл дінімізбен мүлдем жанаспайтын жат ағымдар жетегінде кеткен қаншама қандастарымыз отбасы мүшелерінен, үй - меншіктерінен айырылып, түрлі психикалық ауруларға шалдығып, өз - өзіне қол салып, балаларына тиісті медициналық екпе ектіруден бас тартып, мектептегі сабақтарын тастап, мектеп жасындағы ұл - қыздардың музыка тыңдауға қарсылық білдіріп, мемлекеттік әнұранды тыңдауды және туға құрмет көрсетуді харам деп жатқандарын да жоққа шығаруға болмайды. Соңғы уақытта кейбір отбасыларда әкесі бір дінді, баласы бір дінді, анасы бір дінді ұстанатын халге келдік. Осындай отбасыларда кикілжің туатын болса, әркім өз жақтастарын мәселеге араластырып, арты бітпес жанжалға ұласып кетуі мүмкін. Қоғамға іріткі салатын дәстүрлі емес, теріс пиғылдағы, деструктивтік діни ағымдардан сақтанудың жолдарын жастардың санасына ұғындыру.

Сөз кезегінде Шардара аудандық ішкі саясат бөлімінің әдіскері, теолог маманы А.Данияров болашақ жастардың қолында. Жастарымызды имандылыққа, ата - бабаларымыздың ғасырлар бойы ұстанып келген асыл дініміз исламға баулысақ, түрлі жат ағымдардың жетегіне кетпейтін болады. Сонымен қатар иманды жас отанын, елін, жерін сүйетін, салт - дәстүрін, тілін, мәдениетін берік ұстайтын болады. Пайғамбарымы Мұхаммед (с.а.с): «Отанды сүю иманнан», - деген. Мәңгілік елдің тірегі - құндылықтарында. Сол құндылықтардың бірі дәстүрлі дініміз. Діннің адамзат тарихында алатын орны ерекше. Дін - қоғамның рухани өмірінің маңызды саласы. Бұл мәнде дін қай халықтың болмасын мәдениетінің рухани негізі екенін ескеруіміз керек деді.

Шардара аудандық «Жастар ресурстық орталығы» КММ - нің теолог маманы Е.Сариев кездесу барысында жастарға теріс діни ағымдардың зияндығы жайлы түсіндіріліп, тыйым салынған террористік және экстремистік ұйымдардың тізімімен таныстырылды. Зайырлы қоғамда өскен ұрпақ теріс діни сенімдердің торына байланбай, әр нәрсеге сыншыл санамен қарайтын, жан - жақты білім алуға ұмтылған және де өзге дін өкілдеріне құрметпен қарайтын азамат болып өсуі тиіс екендігі туралы айтылды. Дін мәселесінде сұрақ туындаған кезде жауапты ең бірінші Қазақстан мұсылмандары діни басқармасының ресми сайттарынан іздеген абзал екендігін айтты. Студенттерге діни теріс ағымдардан келетін қауіп қатерлерді кең көлемде түсіндірілді. Сол себепті бұл қауіптің алдын-алып, теріс діни ағымдармен күресу қоғам алдындағы негізгі міндет болып табылады деп сөзін қорытындылады.

Түркістан: Деструктивті діни ағымдардың интернет арқылы жастарды арбауы

2022 жылдың тамыз айының 18 - ші жұлдызы күні ауданда дін саласындағы діни тұрақтылықты қамтамасыз ету мақсатында «Ұлтық сараптамалық талдау орталығы» ҚҚ - ның ұйымдастыруымен Шардара қаласы әкімі аппаратының қызметкерлерімен «Деструктивті діни ағымдардың интернет арқылы жастарды арбауы», - тақырыбында кездесуге, Түркістан облысы дін істері басқармасы «Дін мәселелерін зерттеу орталығы» КММ - нің теолог маманы Д.Аманов, Шардара аудандық ішкі саясат бөлімінің әдіскері, теолог маманы А.Данияров, Шардара аудандық «Жастар ресурстық орталығы» КММ - нің теолог маманы Е.Сариев қатысты. Түркістан облысы дін істері басқармасы «Дін мәселелерін зерттеу орталығы» КММ - нің теолог маманы Д.Аманов ислам діні атын жамылып деструктивті діни ағымдардың жақтастары кeз - келген бағыт бойынша, соның ішіндe ғаламтор арқылы да жастарымыздың санасын улап, қоғамымызға іріткі салып бағуда. Қоғамға дендей eнген әлеуметтiк жeлінің пайдасымен қоса зияны да бар. Мысалы, деструктивті діни ағымның жeтегінде кеткендердің 88 пайызына осы әлеуметтік желі әсер еткені зерделеу арқылы белгілі болды деді.

Шардара аудандық ішкі саясат бөлімінің әдіскері, теолог маманы А.Данияров деструктивті діни ағымдардың жастарды арбау әрекеттері осы ғаламтор ресурстары арқылы, соның ішінде әлеуметтік желілерде жүзеге асырылуда. Деструктивті діни ағымды ұстанушылардың басым көпшілігін жастар құрайды. Олар діни ағымдарға рухани азық іздеп кіріп жатқаны да қаперден шықпауы керек. Әсіресе олардың негізгі нысанасы әлеуметтік жағдайы мен дүниеге деген көзқарасы толық қалыптаспаған жастар болып табылады және діни сауаты жоқ, жұмыссыз жастарды еліктіріп қатарына тартатынын тілге тиек етті.

Шардара аудандық «Жастар ресурстық орталығы» КММ - нің теолог маманы Е.Сариев кез келген теріс пиғылды діни топ көздегеніне тез жету үшін әрі қатарын жаңа адепттермен толықтыру үшін өзінің шынайы мақсатын жасыруға және зұлымдықтарын ақтауға тырысатыны белгілі. Осыған орай деструктивті ағым өкілдері өз уағыздарында бұрмаланған әр түрлі діни дәйексөздерді келтіре отырып, өздерінің жолын әділ әрі ақиқат етіп көрсеткісі келеді. Алайда бейбітшілік пен бауырмалдылыққа үндейтін шынайы діни сенімде адамдарға зұлымдық пен әділетсіздік танытуға, нақақтан жан иесін өлтіруге жол берілмейтінін айтты.

Полицейлер профилактикалық жұмыс жүргізді

«Полиция - жазалаушы орган емес, қорғаушы орган», осы қағиданы ұстанатын Түркістан облысының полицейлері үнемі жол қауіпсіздігін қамтамасыз ету мақсатында профилактикалық жұмыстарды жүргізеді. Мәселен күні кеше Түркістан облысы ПД Әкімшілік полиция басқармасының бастығы полиция полковнигі Алмасхан Тастанбеков бастаған полицейлер, Шымкент-Түркістан тас жолы бағытында жүргізушілерге түсіндірме жұмыстарын ұйымдастырды.

Республикалық маңызы бар бұл трасса, көліктер көп жүретін аумақ. Тәртіп сақшыларының айтуынша, мұнда көбіне тұрған көліктерді жанынан соғып кету жайттары орын алған. Сондықтан 1 айға жоспарланған «Қауіпсіз жол» іс-шарасы кезінде полицейлер жүргізушілермен тілдесіп, жол қозғалысы ережелерін мұқият ұстануға шақырды.

Полиция полковнигі А.Тастанбеков: «Облысымызда жол көлік оқиғаларының бірінші себебі, жылдамдықты шамадан тыс асырудан болады. Оған маневр жасауды, қарсы бағытқа шығуды, үй жануарларының қатысуымен болатын жол апаттарын қосыңыз. Осындай олқылықтардың алдын алуда біз бірінші кезекте ескерту мен түсіндіруді қолға алдық. Яғни әкімшілік хаттама толтырудан бұрын, профилактикаға мән берудеміз. Әрбір тоқтатқан көліктегі жүргізушілерге жол ережесін сақтауды айтып, жаднамалар таратудамыз»-деп атап өтті.

Полицейлер тарапынан түсіндіру шаралары жүргізілгенімен, жол ережесін өрескел бұзған 30 000-нан астам жүргізушіге тиісті жауапкершілігі қаралған. Яғни «Қауіпсіз жол» жедел-профилактикалық іс-шарасы барысында анықталған құқық бұзушылықтар саны да аз емес деген сөз. Сондықтан, құрметті жүргізуші! Жол ережесін сақтаңыз, сізді үйіңізде жанұяңыз күтіп отыр.

Қазығұрт аудандық полиция бөлімінің полицейлері тұрғындарға ескертеді

Түркістан облысы аумағында 19 шілдеден бастап «Қауіпсіз жол» жедел-профилактикалық іс-шарасы тұрақты түрде жүргізілуде. Аталған іс-шараның мақсаты – аудан аумағындағы жол ережелерін сақтау, жол-көлік оқиғаларының алдын алу. Аталған іс-шара барысында Қазығұрт аудандық полиция бөлімінің қызметкерлері 800-ден астам әртүрлі әкімшілік құқық бұзушылықты анықтады.

Мәселен, ҚР ӘҚБтК-нің 608-бабы «Жүргізушінің көлік құралын алкогольдік, есірткілік және (немесе) уытқұмарлық масаң күйде басқаруы, сол сияқты көлік құралын алкогольдік, есірткілік және (немесе) уытқұмарлық масаң күйдегі адамның басқаруына беру» бойынша 42 мас халде көлік басқарған жүргізушіге хаттама түзді. Түркістан облысының полицейлері тұрғындарға автокөлік құралын басқару кезінде жол қауіпсіздік ережесін қатаң сақтау, көлікті мас халде басқармауға, сондай-ақ жолда жүргенде жылдамдықты шамадан тыс асырмауды ескертеді.