Түркістан облысында жол қауіпсіздігін қамтамасыз ету мақсатында түсіндіру жұмыстарын жүргізген сұхбат өткізілді.

Түркістан облысы Полиция департаментінің әлеуметтік желідегі ресми парақшаларында брифинг өткізілуде. Онда ПД-нің әрбір салалық құрылым басшылары тікелей эфирге шығып, өздерінің басқарма, бөлім қызметкерлерімен атқарылған жұмыстары мен алдағы жоспарларын ашық, әрі нақты айтып өтуде. Мәселен, күні кеше «Жол қауіпсіздігі – басты орында» тақырыбында сұхбат өрбіп, спикер ретінде Түркістан облысы Полиция департаменті Әкімшілік полиция басқармасының бастығы полиция полковнигі Алмасхан Тастанбеков қатысты.

Іс-шара кезінде облыс тұрғындарына жол қозғалысы ережесін сақтау басты талапттардың бірі екендігі түсіндірілді. Өйткені жыл сайын еліміздің қаншама тұрғындары жолдарда жүргізушілердің жол ережесін сақтамауы салдарынан қаза табуда. Полиция полковнигі А. Тастанбеков өз сөзінде: «Ағымдағы жылдың шілде айының 19-ы мен тамыз айының 18-і аралығында 1 айға жоспарланған республикалық «Қауіпсіз жол» жедел-профилактикалық іс-шарасы өткізілуде. Бұл автоапаттылықтың алдын алу, жол-көлік оқиғаларын болдырмау, жүргізушілерге түсіндіру жұмыстарын жүргізуді одан ары жандандыру мақсатында өткізілуде.

Тәртіп сақшыларымен ескерту де берілуде, қажет болса заңға сәйкес айыппұл да салынуда. Осы сәтті пайдалана отырып, жол қозғалысы ережесін сақтап, жылдамдықты асырмай, жол ережесін бұзбауды ескертемін!»,-деп атап өтті. Тікелей эфир барысында желі қолданушыларынан жолға қатысты көптеген сұрақтар келіп, полиция тарапынан нақты жауап берілді.

Мәлімет ретінде айтар болсақ, аталған «Қауіпсіз жол» іс-шарасының 24 тәулігінде облыс бойынша 29 000-ға тарта әкімшілік құқық бұзушылық анықталды. Оның ішінде мас халде көлік басқарған 121 жүргізуші, қозғалыстың қарсы бағытына шыққан 69 жүргізуші жауапқа тартылды. Авариялық жағдай туғызған 157 жайт белгілі болып, әкімшілік шарасы көрілді. Жалған және қолдан жасалған мемлекеттік нөмірмен көлік құралын басқарған 19 жүргізуші анықталды. Ал заңсыз жолаушы тасымалдаған 31 көлік тізгіндеуші анықталып,хаттама толтырылды.

Ордабасы аудандық полиция бөлімінің 102 пультіне тұрғындардың бірінен хабарлама келіп түсті. Оның айтуынша, Шұбар ауылынан 20 шақырым жердегі егістік алқапта тұрғындардан қорқып, қашып жүрген ер адам туралы хабар айтқан.

Хабарлама келіп түскен бойда полицейлер жылдам іске кірісіп, ер адамды тапты. Одан сұрастыру жұмыстарын жүргізгенде сөйлей алмайтын, денсаулығында ақауы бар ер азамат екені белгілі болды. Полиция қызметкерлері орта жастағы ер адамды бірден полиция бөліміне жеткізді. Жеке басын анықтау үшін, Түркістан облысы мен Шымкент қаласындағы әріптестеріне фотосуретін жіберіп, таратты. Нәтижесінде, оның жүйке жүйесімен ауыратын Шымкент қаласының тұрғыны екендігі белгілі болды.

Оның туыстары полиция бөліміне келіп, жоғалған азаматты алып кетті. Полиция қызметкерлерінің жұмысына дән риза болған табылған ер азаматтың туысы ерекше алғысын білдірді. Ол: «Қазіргі уақытта неше түрлі жағдайлар орын алып жатыр. Осы тұрғыда ағам үшін алаңдаған едім. Сіздердің жүйелі жұмыстарыңыздың арқасында, ағам аман-есен табылды. Жұмыстарыңызға табыс, дендеріңізге саулық тілеймін. Отбасыларыңыз аман болсын!» - деп атап өтті.

Түркістан облысы аумағында "Қауіпсіз жол" жедел-профилактикалық іс-шарасы өтуде. Шараның басты мақсаты - жол көлік оқиғаларының алдын-алу.

Осы тұрғыда Қазығұрт аудандық полиция бөлімінің қызметкерлері рейдтік шараны күшейтті. Мәселен полицейлер атқарылған жұмыс нәтижесінде, кәмелет жасына толмаған баланың көлік тізгіндеп келе жатқанын байқап, бірден аталған "Ravon R-3" маркалы автокөлікті тоқтатпақ болды. Алайда жүргізуші көлікті тоқтатудан бас тартты. Жедел іске кіріскен полицейлер құқық бұзушылардың соңынан қуып жетіп, тоқтатты.

Тексеру кезінде жас жүргізушінің кәмелет жасына толмағандығы белгілі болды. Содан тәртіп сақшылары аталған көліктің иесіне ҚР ӘҚБтК-нің 612-бабы "Құжаттары жоқ және басқару құқығы жоқ адамның көлік басқаруына беру" бойынша хаттама толтырды.

Түркістан облысының полицейлері тұрғындарға көлікті тек жүргізуші куәлігі бар, заңды иесі айдауы керектігін ескертеді. Кәмелетке толмағандарға көлікті мүлде беруге болмайды.

Түркістан облысында мас халде көлік басқарған тұрғын анықталды.

Бәйдібек АПБ-нің қызметкерлері аудан бойынша қоғамдық тәртіпті және жол қауіпсіздік ережелерін сақтау, қылмыстың алдын алу және болған қылмыстарды дер кезінде ашу мақсатында рейдтік-профилактикалық жұмыстарды үзіліссіз, күні-түні атқаруда. Осындай іс-шараның бірі "Қауіпсіз жол", яғни жол қауіпсіздігін қамтамасыз ету мақсатында 1 айға жоспарлы түрде ұйымдастырылуда.

Аталған іс-шараның кезекті тексеруі кезінде Бәйдібек АПБ ЖПҚ учаскелік полиция инспекторы полиция лейтенанты Заманбек Жәнібекұлы, өзіне бекітілген аумақта, яғни Шалдар ауылы көшесінің бойында бағытынан ауытқып келе жатқан, жүрісі күмәнді көлікті тоқтатады. Аталмыш «ВАЗ-24014» маркалы автокөлікті тексеру кезінде, автокөлік жүргізушісінің іс-әрекетінен мас халде екеніне күдік туындап, оның мастық күйін анықтау үшін медициналық куәландырудан өткізу жұмыстары жүргізілді. Сараптаманың қорытындысы бойынша жүргізушінің "орта дәрежелі" мас екені анықталды.

Полиция қызметкерлері аталған жайтты ҚР ӘҚБтК 608-бабы «Жүргізушінің көлік құралын алкогольдік, есірткілік және (немесе) уытқұмарлық масаң күйде басқаруы, сол сияқты көлік құралын алкогольдік, есірткілік және (немесе) уытқұмарлық масаң күйдегі адамның басқаруына беру» бойынша тіркеді. Қазіргі таңда учаскелік полиция қызметкері аталған жайтқа байланысты іс-құжаттарды жинақтауда.

Өз кезегінде Түркістан облысының полицейлері жүргізушілерге автокөлікке мас халде отырмаңыздар, бұның соңы жазатайым оқиғалар мен өлімге әкеп соғуы мүмкін екенін ескертеді. Сондай-ақ қашықтықты және маневр жасау ережелерін сақтап, жылдамдықты асырмай, қарсы жолаққа шықпай көлік тізгіндеңіздер деп кеңес береді.