«Түркістан - Адалдық алаңы» жобалық кеңсесінің жетекшісі Біркөлік шатқалында болып, "Адал ұрпақ" еріктілер клубының 100-ден аса мүшесімен кездесті.

Жас буынның сыбайлас жемқорлыққа қарсы мүлдем төзбеушілік мәдениетін қалыптастыруға негізделген шарада Нұржахан Абуова - Қожа Ахмет Ясауи бабамыздың "Әділ сөйлеп, адал жүр" деген даналық ойларын балаларға жеткізіп, оларды әділ болуға, парасатты болуға дәріптеді. Балалар қай кезде де әділдіктен айнымаған жөн. Әділдік – қоғам дамуының маңызды шарты. Әділеттілік –  әсіресе, ел-жұрттың тағдырын шешу үшін аса қажет қасиет» және «Бізге керегі – адалдық, ұқыптылық, тиянақтылық. Біз сонда ғана бәсекеге қабілетті мемлекет, зияткер ұлт қалыптастыра аламыз» дей келе, әділдік пен адалдық сынды құны биік қасиеттердің қазіргі қазақ  қоғамында  аса қажет,-деді Н.Абуова.  Адамдық болмыстың озық үлгісі болуға шақыратын Ясауидың даналық ойларынан дән іздеп қана қоймай, олар жаһандану дәуіріне аяқ басқан жас ұрпақтың санасына сілкініс жасауға және сол арқылы парасатты қоғамды қалыптастыруға ықылас танытып отыр. Жалпы Түркістандық ғұламаның еңбектеріне терең бойлай түссек, “Арыңды сақта,  болсаң да малға кедей” деген тіркесті сөздерінен  дүниеде жиған-тергенің  аз болса да,   ар өлшемің биік болуы тиіс екендігін шебер жеткізген.  Және “Жалтақтардан жөн сұрама, жолдан қалған,  Жаны АДАЛДЫ әр уақытта қолдайды Аллам”, – деген шумақтарынан теріс мінезділердің жолымен емес, адал ризықпен күн кешіп жүргендердің ізімен жүру қажеттігін және сол арқылы  мол сауапқа кенелуге болатынын атап өткен. Сондай-ақ, Қожа Ахмет Ясауи бабамыз: “… Ақылды алсаң, жараңдарға қызмет қылғын, АДАЛ жолды тұтқандарға ізет қылғын”,- деген өлең жолдары арқылы  замандастарын парасатты болуға үндеп,  бұқара халыққа таза ниетпен, адал еңбекпен қызмет қылу қажеттігін ерекше атап көрсетсе, “Пара алған әкімдер – арамдықпен жүргендер, Өз бармағын өзі шайнап өкінішпен қалады”,- деген Ахмет Ясауи қоғамның күрделі мәселесін ашық көрсетіп, пара алған би-болыс пен  шенді-шекпендінің және әкім-қараның ертеңгі күні өкінішпен өтетінін жеткізеді. Сондықтан да, ол “Диуани хикмет” еңбегінде  оқырман қауымды  қара бастың қамын ойлауға емес, халықтың  алғысына кенелуді мақсат етуге шақырады. Бұдан бөлек, әділдікті сүйген Ясауи бабамыз өзінің 60-хикметінде: “Арың таза болса, әр кез жеңіс сенде” деп өнегелі өсиет сөз қалдырған. Бұдан біздер, жеңіс жалауы – тек ары биік азаматтардың ғана қолында желбірейтінін және 102-хикметінде: “Қазы болған ғалымнан ПАРА істеп жегендер, Ондай ғалым жайын мен тар азаптан көрдім мен”, –    деп көлеңкелі қылмыс түріне жақын болған  азаматтардың болашағы тас түнек қараңғы болатынын ашық баяндаған.   Түп-тамырымыз бен ұлттық тарихымызға терең үңілсек, қазақ халқымыз сонау ықылым замандардан-ақ,  Қ.А.Ясауи сынды дана ойшыл бабаларымыздың асыл мұрасымен жіті танысып, қай дәуірде болмасын адалдық деген асыл қасиетпен азықтанып келгендігін  анық байқаймыз.   Ата-бабаларымыздан бері келе жатқан ар тазалығының биік өлшемін әрі қарай да  сақтап қалу үшін, біз  тәрбиеге тұнық туындыларымызды бүгінгі күні  қайта жаңғыртуға айрықша басымдық берудеміз. Сол себепті, біздер жаңа оқу жылында өскелең жас ұрпақты қазыналы еңбектері түркі мәдениетінің төрінде сақталған Қожа Ахмет Ясауидың  өнегеге толы өсиет сөздерімен танысу арқылы қоғамның парасатты тұлғасы болып қалыптасуға шақырамыз!  Жаңа оқу маусымында бабамыздың даналық ойларымен кемелденген ел жастары –  білім бәсекесінде адал білімді арқау ететініне сеніміміз мол! ,-деп қорытындылады ойын Н.Абуова. Шара соңында балалар адалдық аясында өзара пікір алмасып, Отанды құрметтеудің маңыздылығын ортаға салды.

Төлеби аудандық полиция бөліміне жергілікті тұрғын алаяқтың құрбаны болғаны жөнінде шағым түсірді. Жәбірленуші жас жігіттің айтуынша, оны сырттай танысы жүргізуші куәлігін алып беремін деп алдап кеткен. 2022 жылы мамыр айында көлік басқаруға қажетті құжатты алу үшін, тұрғын күдіктіге 250 000 теңге береді. 2 айда жүргізуші куәлігі қолыңда болады деп алаяқ сеніміне кірген. Тәртіп сақшылары аталған жайтты ҚР ҚК-нің 190-бабы «Алаяқтық» бойынша тіркеп, жедел іздестіру шараларына кірісті.

Осы оқиғаға байланысты полиция қызметкерлерінен жедел-тергеу тобы құрылды. Нәтижесінде жұмыссыз жас жігіт ұсталды. Ол оңай жолмен пайда табу мақсатында жәбірленушіні алдап, алған ақшаны өз қажеттілігіне жұмсаған. Қазіргі таңда сотқа дейінгі тергеу амалдары жүргізілуде.

Түркістан облысының полицейлері азаматтарға қылмыстың құрбаны болмау үшін күмәнді қызмет көрсетуге уәде берген бейтаныс адамдарға сенбеуге кеңес береді.

Қазығұрт АПБ-ның патрульдік полиция тобының қызметкерлері жол-көлік апаттарының алдын алу мен жолда жүру ережелерін өрескел бұзушыларды анықтау мақсатында, «Қауіпсіз жол» рейдтік-профилактикалық іс-шарасын өткізуде. Осындай кезекті рейд барысында аудандық полицейлер түнгі уақытта аудан көшелерінің бірінен күдік тудырған «Ваз 2121» Нива маркалы автокөлігін байқады.

Содан тәртіп сақшылары көліктің алдына шыға отырып, оны тоқтатты. Құжаттарын тексеру кезінде тәртіп сақшылар жүргізушінің мас халде болғанын анықтады. Сонымен қатар оны медициналық куәландыруға жеткізді. Қорытындыға сәйкес ер адам көлікті мас халде басқарғаны белгілі болды.

Құқық бұзушыға қатысты ҚР ӘҚБтК-нің 608-бабы "Жүргізушінің көлік құралын алкогольдік, есірткілік және (немесе) уытқұмарлық масаң күйде басқаруы, сол сияқты көлік құралын алкогольдік, есірткілік және (немесе) уытқұмарлық масаң күйдегі адамның басқаруына беру" бойынша әкімшілік хаттама толтырылды. Жиналған материалдарды полицейлер заңды шешім қабылдау үшін сотқа жіберді.

Түркістан облысының полицейлері жүргізушілер мен жаяу жүргіншілерді жол қозғалысы ережелерін қатаң сақтауға шақырады. Автокөлікке мас халде отырмаңыз, бұның соңы жазатайым оқиғалар мен өлімге әкеп соқтыруы мүмкін.

ҚР Президенті Қ.Тоқаевтың «Жаңа Қазақстан» атты халыққа Жолдауындағы тапсырмаларды, қоғамдық қауіпсіздіктің сервистік моделіне көшуі, жедел және дамыған әдістерді қолдануы, цифрлық технологияны меңгеруі бойынша ауқымды істер атқарылуда. Осыған орай Ұлы Дала музейінің конференция залында пилоттық режимге енгізілген Түркістан қаласында қоғамдық қауіпсіздіктің сервистік моделінің енуіне арналған жиналыс ұйымдастырылды.

Іс-шараға Түркістан облысы Қоғамдық кеңестің мүшесі Зуппархан Чалданов, Түркістан қаласы әкімінің орынбасары Ерлан Бақытжанұлы, қалалық Полиция басқармасының жергілікті полиция қызметі бөлімінің бастығы Шалбай Мақсұтұлы, қалалық прокуратураның бөлім басшысы Мақсат Кенжеханұлы қатысты.

Кездесудің күн тәртібінде бірнеше мәселелер қаралып, баяндамалар жасалды. Біріншіден, Түркістан қаласы әкімдігінің қоғамдық қауіпсіздіктің сервистік моделін енгізу мақсатында атқарылған жұмыстар туралы мәселе қаралды.

Екіншіден, Түркістан ҚПБ-ның осы жаңа бағдарлама бойынша алдағы уақытта атқарылатын жұмыстар талқыланды. Үшіншіден, Түркістан қаласы бойынша 2019, 2020, 2021 жылдарда орын алған қылмыстарды саралау бойынша құрылған ведомствоаралық топ мүшелерінің қорытындысы тыңдалды.

Жиналғандар Түркістан өңірінде қоғамдық қауіпсіздіктің сервистік моделіне көшу жұмыстарын сапалы іске асыруды саралады. Ал мұндай жұмыстар өз кезегінде Түркістан облысын қауіпсіз әрі қылмысы аз облыс қатарынан көрініп, жақсы нәтижелерге қол жеткізуге, қауіпсіз аймаққа айналдыруға үлкен үлесін қосады.

«Отау сити», «Медина», «Тенгри». Бұл Шымқалада жеке инвесторлар есебінен салынып жатқан тұрғын үй кешендері. Бүгін Шымкент қаласының әкімі Мұрат Әйтенов осы нысандардың құрылыс жұмыстарымен танысты. Бүгінде мұнда құрылыс монтаждау жұмыстары жүргізілуде. Нұрсат және Қошқар ата аумағында орналасқан бұл тұрғын үйлердің алаңы 124 857 шаршы метрді құрайды. Пәтерлер 2022-2023 жылдары пайдалануға беріледі. Қала әкімі үйлердің заманауи дизайнда, тұрғындарға қауіпсіз әрі қолайлы болуына аса мән берілуін атап өтті.

Айта кетейік, Шымкент қаласында тұрғын үйге сұраныс өте жоғары екендігін ескере отырып, биылғы жылы 2 972 пәтерлі 51 тұрғын үй салынып, жыл соңына дейін қолданысқа берілмек.  Шымкент қаласының құрылыс басқармасы 2022 жылы бюджет есебінен жалпы құны 56,8 млрд. теңгені құрайтын 90 нысанның құрылысы жүргізуде. Оның ішінде, 31 кредиттік тұрғын үй және 20 арендалық тұрғын үй салынуда.

Сонымен қатар, инженерлік инфрақұрылым бойынша «Тұран» шағынауданында 5 жоба, «Бозарық» шағынауданында 6 жоба, «ӘІО» 2 жоба және «Жанаталап» тұрғыналабында 2 жоба жыл соңына дейін пайдалануға беріледі. Әлеуметтік нысандардың құрылысы бойынша 13 нысанның (4 спорт нысаны, 3 мәдениет нысаны, 2 саябақ, 2 өрт сөндіру нысаны, 1 биотермиялық шұңқырдың және 1 денсаулық сақтау құрылысы) құрылысы жүргізіледі. Оның ішінде, 1 саябақ, 2 спорт нысаны, 1 өрт сөндіру нысаны және 1 биотермиялық шұңқырдың құрылысын биылғы жылы аяқтау жоспарлануда.

Сондай-ақ, 8 мектеп құрылысы, 1 колледж, 1 оқушылар сарайы және 1 балалар шығармашылық орталығының құрылысы жүргізілуде. Жылдың аяғына дейін 5 мектеп, 1 колледж және 1 балалар шығармашылық орталығын пайдалануға беру жоспарлануда. Айта кетейік, 2022 жылы 500 азаматқа 1 миллион теңгеге дейін қайтарымсыз негізде бастапқы жарнаның бір бөлігін жабу үшін тұрғын үй сертификаты беріледі. Тұрғын үй сертификатының сомасы әрбір үміткер үшін 1 миллион теңгеден аспайды. Әлеуметтік көмек қайтарымсыз негізде беріледі. Тұрғын үй сертификаты «Нұрлы жер» мемлекеттік бағдарламасы аясында несие негізінде«2-10-20», «5-10-20» бағыттары шеңберінде тұрғын үйді сатып алу кезінде ипотекалық тұрғын үй қарыздары бойынша бастапқы жарнаның бір бөлігін жабу үшін азаматтарға берілетін жергілікті атқарушы органның ақшалай міндеттемесінің нысаны.

Төлеби АПБ-ға жергілікті тұрғын арызданып келген. Оның айтуынша, белгісіз біреу есепшотындағы 700 000 теңге ақшасын аударып алған. Полиция қызметкерлері аталған жайтты ҚР ҚК-нің 190-бабы «Алаяқтық» бойынша тіркеп, қылмыстық істі ашуға бағытталған шараларды жедел түрде жүргізді.

Орын алған қылмысты ашу және күдіктіні ұстау мақсатында Төлеби АПБ-ның тәжірибелі қызметкерлерінен арнайы жедел-тергеу тобы құрылды. Полицейлер тыңғылықты тексеріп, куәлардан сұрастырып шықты. Нәтижесінде полицейлер күдікті ретінде бойжеткенді анықтап, оны өз үйінен ұстады. Ол жәбірленушінің танысы, жергілікті тұрғын болып шықты.

Белгілі болғандай, жәбірленуші мен күдіктіні достары үйіне қонаққа шақырған. Сол сәтте күдікті жас қыз әлеуметтік желіге кіру үшін, жәбірленушінің ұялы телефонын сұрап алған. Содан бойжеткен, жігіттің есепшотындағы ақшасын көріп, арам ойы туындап, өзіне аударып алған. Сондай-ақ күдікті жас қыз жымқырған ақшаларды бас пайдасына жаратқан. Қазіргі таңда аталған жайтқа байланысты тергеу амалдары жүргізілуде.

Келес аудандық полиция бөліміне Жетісай қаласының тұрғыны арызданды. Ер адамның айтуынша, жайылымдық жерде малшыға 500 бас қойын сеніп тапсырған. Алайда мал басын тексеруге барғанында, ол әрқайсысы 60 000 теңге тұратын 4 бас қойының жоқ екендігін байқаған. Жәбірленушіге келген шығын көлемі 240 000 теңге.

Тәжірибелі тәртіп сақшылары хабар келіп түскен бойда оқиға орнына бірден жетті. Қажетті шараларды жүзеге асырып, күдікті ретінде қойшы, яғни Мақтаарал ауданының тұрғынын анықтады. Аталған жайтты полиция қызметкерлері ҚР ҚК-нің 189-бабы «Сеніп тапсырылған бөтен мүлікті иемденіп алу немесе талан-таражға салу» бойынша тіркеуге алды. Қазіргі таңда оған қатысты сотқа дейінгі тергеу амалдары жүргізілуде.

Түркістан облысының полицейлері ауылдықтарға қырағы болуды және өз малдарын бейтаныс адамдарға бақтырмауды ұсынады. Сондай-ақ, мүмкіндігінше үй малын таңбалап, ен салдыру керек, ал қора-жайларды сенімді қоршаумен нығайтыңыздар. Егер сізде малыңызды жоғалтып, ұрлатып алсаңыз тез арада полицияға хабарласыңыз.

Түлкібас ауданының патрульдік полицейлері "Қауіпсіз жол" іс-шарасы кезінде қоғамдық тәртіпті сақтау және жол қауіпсіздігін қамтамасыз ету мақсатында, бекітілген бағыт бойынша патрульдеу жұмысын тұрақты түрде жүргізуде. Осы тұста полицейлер Түлкібас ауданына қарасты ауыл көшелерінің бірінде түнгі уақытта жол жүру ережесін бұзған «МТЗ-80» маркалы тракторды тоқтатады. Аталған трактор жүргізушісінің құжаттарын тексеру барысында, оның спирттік ішімдік ішкеніне күдіктенеді.

Полиция қызметкерлері орын алған оқиғаны ҚР ӘҚБтК-нің 608-бабы «Жүргізушінің көлік құралын алкогольдік, есірткілік және (немесе) уытқұмарлық масаң күйде басқаруы, сол сияқты көлік құралын алкогольдік, есірткілік және (немесе) уытқұмарлық масаң күйдегі адамның басқаруына беру» бойынша тіркеді. Жүргізушіге қатысты сараптама тағайындалып, қорытындысына сәйкес оның "орта дәрежелі" масаң күйі анықталды. Осыдан соң аталған жайтқа байланысты жинақталған іс-құжаттар сотқа жолданды.

Сот шешімімен жүргізуші 7 жыл мерзімге көлік басқару құқығынан айырылды.Түркістан облысының полицейлері жүргізушілер мен жаяу жүргіншілерді жол қозғалысы ережелерін қатаң сақтауға шақырады. Автокөлікке мас халде отырмаңыз, бұның соңы жазатайым оқиғалар мен өлімге әкеп соқтыруы мүмкін.

Түркістан ҚПБ-ға жергілікті тұрғын 102 сымтетігі арқылы хабарласқан. Оның айтуынша 46 жастағы баласы Ресейге жұмысқа кетіп, 1 жыл бойы қайта оралмаған. Ал анасының із-түзсіз кеткен баласын іздеп жүргеніне шамамен 1 айдан астам уақыт болған. Алайда еш нәтиже шықпаған соң, полицейлерге арызданған.

Түркістан қалалық полиция басқармасының көші-қон қызметкерлері хабарлама түсе салысымен тез арада әрекет етіп, із-түзсіз кеткен азаматты іздеуді бастап кетті. Полицейлер облыс көлемінде, одан соң Қазақстан Республикасы бойынша бағыттамалар беріп, іздестіру ауқымын кеңейтті. Ресей Федерациясында жұмыс бабымен болуы мүмкін деген тұжырымды да ескеріп, сол жақтағы елшілік пен тәртіп сақшыларына хабарлама жібереді. Нәтижесінде полицейлер жоғалған орта жастағы азаматты бірнеше күн ішінде тапты.

Белгілі болғандай, жоғалған ер азамат Ресейде жұмыс жасауға барып, абайсызда аяғын сындырып алған. Содан бері жұмыссыз жатқан. Сондай-ақ азамат өз сөзінде анасы уайымдамас үшін оған хабарласпағанын айтты. Қазіргі таңда жоғалып кеткен 46 жасар азамат үйіне қайтарылды. Ұлымен аман есен қауышқан ана, баласын іздестіруде шапшаңдықпен әрекет еткен көші-қон қызметкерлеріне алғысын айтып, ризашылығын білдірді.

Қазығұрт аудандық полиция бөліміне жергілікті тұрғын арызданды. Ер адамның айтуынша, түнгі сағат 23:45 шамасында оның цех ішіндегі жұмысшылар демалатын бөлмеде тұрған қол сөмкесінен белгісіз біреу 50 000 теңге ақшасын ұрлап кеткен.

Хабар келіп түскен бойда тәжірибелі тәртіп сақшылары оқиға орнына келді. Олар ұрлық қылмысын ашу үшін қажетті шараларды жүзеге асырды. Көрген-білгендерден сұрастыру жұмыстарын жүргізіп, бейнебақылау камераларын қарап шықты. Нәтижесінде осы қылмысқа қатысы бар жергілікті тұрғындар ұсталды.

Анықталғандай, екі жас жігіт көршілер болып шықты. Олар жол бойынан өтіп бара жатып, оңай олжалы болуды көздейді. Күдіктілер ешкімнің байқамай тұрғанын пайдаланып, қақпа жасайтын цех ішіне еркін кіріп, арам ойларын жүзеге асырады. Ұрлаған ақшаны бас пайдаларына жаратып жіберген. Аталған қылмысты полиция қызметкерлері ҚР ҚК-нің 188-бабы «Ұрлық» бойынша тіркеуге алып, сотқа дейінгі тергеу амалдары жүргізілуде.

Түркістан облысының полицейлері тұрғындарға ұрлықтың алдын алу үшін дүкендерге, ғимараттарға, тұрғын үйлерге, жұмыс орындарына бейнебақылау камералары мен арнайы дабылқаққыштар орнатуға кеңес береді. Егер де, сіз, ұрлық қылмысына тап болсаңыз немесе куәсі болсаңыз, бірден полицияға хабар беріңіз.