Шымкенттің көркіне сән беріп, ажарын арттыруда заманауи өнер туындыларының қосатын үлесі зор. Оның ішінде мынандай муралдар қаланы одан сайын әсемдей түседі. Жалпы қаланың Тұран ауданы бойынша бес ғимаратқа осындай көркем өнер туындылары салынған.

  Арасында құтқарушылардың жұмысын насихаттау мақсатында салынған мурал да бар. Олардың ерен еңбегін айшықтап, өртті сөндіру мен төтенше жағдайлардан адамдарды құтқару сәті көрініс тапқан. Арт-нысан қала орталығындағы көпшіліктің назарына түсетін аймақта орналасқан.  Тұрғындар да бұл бейнелер бірден назар аударатынын айтады.  

"Мұндай муралдар ұнайды, оның көп болғаны жақсы. Қазіргі замаға сай суреттер, арнайы мағынасымен. Қала көркіне де әсер жақсы әісер етеді, ескіні жаңа етіп көрсетеді",-дейді қала тұрғындары.

 Өнер туындысы Төтенше жағдайлар департаментінің бастамасымен қала әкімдігінің қолдауымен жүзеге асқан. Муралды жергілікті суретшілер Құтқарушылар күні қарсаңында 4 күнде салған. Одан бөлек Тұран ауданы аумағында биылдың өзінде қала ажарын арттыру үшін 5 көпқабатты үйдің қасбеті өнер туындысына айналды. Бұл мекендер көпшіліктің көзайымына айналып, өткен-кеткендердің қызығушылығын тудырып отыр.

Жаңа муралдар Адырбеков 165, Отырар шағын ауданы 58, Байтұрсынов 73, Спорт шағын ауданы 7-үйдің қасбетіне салынған. Бұл арт-нысандар тек әсемдік қана емес, мәдениетіміз бен тарихымызды насихаттаудың жаңа бір тәсілі,-дейді мамандар.

"Бюджеттен қаржы бөлініп, «Автобренд» ЖШС анықталды. Жоспар бойынша 5 үй болса, негізінен биыл 7 үйге салынды. Келісім-шарт бойынша 13 988 800 теңге бөлінген болатын. Жұмыс толық орындалып, бүгінде қабылданып қойды. Аудан аумағывнда бұлардан бөлек 8 мурал бар",-деді Тұран ауданы әкімдігі аппаратының бөлім инспекторы Б.Қаблан.  

Жалпы Шымкентте қабырғасына сурет салынған нысандар қатары көбейіп келеді. Бір ғана Тұран ауданы аумағында 13 ғимараттың қасбетіне мурал салынған.  Олар - әдеміліктен бөлек, қандай да бір терең идея мен мағынаны жеткізуге арналған өнер туындысы.