Бейсенбай Тәжібаевтың сөзінше, ҚР Тұңғыш Президенті Н.Назарбаев мақаласында сан қилы статистикаға тоқталмай, стратегиялық бағыттарға аса мән берген. Бастысы, мемлекеттің халықпен бірге екенін ұғындыра білген.

«Елбасы бұл қиындықтан бірлік, тәртіп және болашаққа деген сенім алып шығатынын айтты. Мемлекет тарапынан коронавирустың алдын-алу бойынша жедел әрі сапалы жұмыстар қолға алынғанына атап өтті. «Әр министр, әрбір облыс, қала және аудан басшылары жүйемен, тәртіппен, үйлесіммен, нақты жоспармен, нық сеніммен әрекет етіп, уақытша қиындықтан шығуға барлық күш-қуатты жұмылдыруы қажет. «Nur Otan» партиясының мүшелері де осы бір сауапты істің алдыңғы қатарынан табылуға тиіс», – деді Елбасы. Бұл ретте Түркістан облысында сақтық шаралары күшейтілгенін, облыс әкімі Өмірзақ Шөкеевтің бастамасымен нақты жұмыстар атқарылып жатқанын айта кеткен жөн»,- деді «Nur Otan» партиясы Түркістан облыстық филиалы төрағасының бірінші орынбасары.

Бейсенбай Тәжібаевтың айтуынша, өңірде Елбасы бастамасымен «Nur Otan» партиясы қолға алған «Біз біргеміз!» акциясы арқылы 3 мыңнан астам отбасыға азық-түлік және гигиеналық заттар жеткізілген. «Түркістан» әлеуметтік-корпоративтік даму қорында ел кәсіпкерлері айрықша үлес қосып, жанашырлық танытуда. Мемлекеттік қызметкерлер де бір күндік жалақыларын аударған. Осы қолдаулардың нәтижесінде әлеуметтік аз қамтылған көпбалалы отбасыларға, тыл ардагерлері мен жалғызбасты қарияларға, мүмкіндігі шектеулі жандарға тұрақты түрде көмектер беріліп отыр. Сондай-ақ, жекелеген демеушілер де акция аясында қарапайым халыққа барынша көмектесуде.

 «Ең бастысы, мемлекет әрбір азаматтың қауіпсіздігіне, дамуына қолдау көрсетуді жалғастырады. Төтенше жағдайдағы ережені қатаң сақтап, жұдырықтай жұмылып, бірлігімізді сақтай білсек, бұл тығырықтан да шығамыз»,- дейді Бейсенбай Тәжібаев.

«AQ-QARA.KZ»-ақпарат.