Сенат Спикері Мәулен Әшімбаев аталған заңдар Мемлекет басшысының тапсырмасымен әзірленгенін және Түркістанның жан-жақты дамуына серпін беретінін атап өтті.  Жаңа нормаларға сәйкес, Қожа Ахмет Ясауи кесенесінің қорғау аймағында биік ғимараттар салуға тыйым салынып, тарихи-мәдени мұраны сақтауға ерекше мән берілді. Сонымен қатар, мүгедектігі бар адамдарға қолайлы жағдай жасау және инклюзивті туризмді дамыту бойынша түзетулер енгізілді.

Сонымен қатар, әкімдіктер мен мәслихаттардың құзыреттері қайта қаралды. Енді қала аумағында тарихи-мәдени мұра объектілерін қорғау және пайдалану саласында мемлекеттік бақылауды жүзеге асыру, жергілікті бюджет қаражаты есебінен қаланың ұлттық қолөнер саласындағы шеберлердің шығындарының бір бөлігін өтеу қағидаларын әзірлеу әкімдіктің құзыретінде болады. Бұл Түркістан қаласының аумағы арқылы транзиттік автомобиль көлігі қозғалысының схемалары мен тәртібін келісу рәсіміне де қатысты екенін атап өткен жөн.

Осылайша, аталған заңнамалық нормалар қаланың тарихи-мәдени маңызы бар ескерткіштері мен объектілерін, оның ішінде дүниежүзілік мұра – Қожа Ахмет Яссауи кесенесін қорғау аймағында орналасқан нысандарды басқару мен сақтаудың тиімді жүйесін қалыптастыруға арналып отыр.

«WWW.AQ-QARA.KZ» – ақпарат