Полицейлер «Қорғау» жүйесі арқылы 5 тәулікте 1300-ге тарта көлік жүргізушілеріне түсіндірме жүргізіп, 45 көлікті айыптұраққа қойды

Түркістан облысы Полиция департаменті бастығының бірінші орынбасары полиция полковнигі Бағланбек Айтпаевтың төрағалығымен жол қауіпсіздігін қамтамасыз ету мақсатында кең көлемді жиын өтті. Оған қалалық, аудандық Полиция басқарма, бөлім басшылары бейнеселекторлық режимде қатысты.

Мұндағы негізгі мақсат - «Қорғау – қауіпті жүргізуші!», «Қауіпсіз жол» жедел-профилактикалық іс-шарасы мен алдағы уақытта жол апатын азайту бағытында атқарылатын жұмыстарды талқылау, нақты тапсырмалар бойынша жүйелі жұмыс жүргізу болып табылады.

Аталған іс-шара кезінде Полиция құрылымдарының басшыларына бірінші кезекте: тіркеуде жоқ, айыппұлын төлемей жүрген және жалған мемлекеттік белгіні тағып жүрген автокөліктерді анықтау, жүргізушілердің жауапкершілігін қарау, халыққа барынша түсіндіру жұмыстарын жүргізу жөнінде нұсқама берілді. Яғни «Қорғау» жүйесіне енгізілген тізімге сәйкес профилактикалық жұмыс жүргізу тапсырмасы жүктелді. Осы бағытта Түркістан облысы ПД Жедел басқару орталығындағы полицейлер бірден қызметке кірісті.

Нәтижесінде 5 тәулік ішінде патрульдік полиция батальоны қызметкерлеріне 1297 автокөлікке қатысты бағыт-бағдар беріп, көліктердің жүрген жерлерін жеткізді. Ал тәртіп сақшылары аталған көліктердің 1252-сіне түсіндірме жұмыстарын жүргізді. Түрлі құқық бұзушылықтар жасаған 45 автокөлік анықталып, айыптұраққа қойылды.

Сонымен қатар іс-шара кезінде 4 жүргізушінің автокөлікті мас халде басқарғаны анықталды. 1 көліктің мүлдем іс құжаты болмаса, 2 көлік мемлекеттік тіркеу нөмірін тақпай жүргені бойынша жауапқа тартылды. Осылайша Түркістан облысы ПД-ға басшылық лауазымға келген полиция полковнигі Б.Айтпаевтың бастамасымен, түркістандық полицейлер 1300-ге тарта көлік жүргізушісіне түсіндіру жұмыстарын жүргізіп, ескертпе қағаздарын таратты.

Шекарадан «гашиш» есірткісін алып өтпек болған өзбекстандық ұсталды.

Сарыағаш аудандық полиция бөлімінің қызметкерлері «Жібек жолы» шекарасының бақылап-өткізу бекетінен есірткі алып өтпек болған Өзбекстан Республикасының азаматын ұстады.

Нақтырақ айтсақ, өзбекстандық тұрғын ҚР-ға өтерде, оған «Клементина» атты ит белгі береді. Оқиға бойынша тәртіп сақшылары бірден тексеру жұмыстарын жүргізіп, оның шалбарының оң жақ қалтасынан полиэтилен пакетке салынған есірткі затына ұқсас зат табады.

Полиция қызметкерлері табылған айғақты затты тәркілеп алып, аталған жайтты ҚР ҚК-нің 286-бабы 1-бөлігі «Айналыстан алып қойылған заттардың немесе айналысы шектелген заттардың контрабандасы» бойынша тіркеуге алды. Сараптама тағайындалды.

Зерттеу қорытындысы шетелдіктен алынған заттың «гашиш» есірткісі екенін анықтады. Қазіргі таңда күдікті қамауға алынды, сотқа дейінгі тергеу амалдары жүргізілуде.

Созақта зорлық-зомбылықты азайту мақсатында дөңгелек үстел өтті.

Созақ ауданы әкімшілігінің мәжіліс залында зорлық-зомбылыққа қарсы дөңгелек үстел өтті. Жиынға полиция подполковнигі Ербол Оралбаев, полиция капитаны Қалижан Мусалимов, полиция аға лейтенанты Бағлан Нұрмаханов, әйелдерге қарсы зорлық-зомбылық тобының инспекторы полиция майоры Айжан Манапова және аудан әкімдігінің ішкі саясат бөлімінің басшысы Мерей Ниязәліұлы, сондай-ақ Халыққа әлеуметтік қызмет көрсететін аудандық аумақтық орталығы КММ директоры Ерболат Тұңғышбайұлы, аудандық орталық аурухананың дәрігері Талғат Қалдыбеков қатысты.

Жиынның басты мақсаты – әйелдерге қатысты зорлық-зомбылықпен күресу жолдары мен дағдарыс орталықтары туралы кеңінен талқылау. Яғни жиналыс барысында әйелдер мен балаларға қамқорлық жасау туралы кеңінен айтылды. Шараға жиналғандар зорлық-зомбылықты болдырмау бойынша өздерінің ұсыныс-пікірлерін ортаға салды.

Бүгінде елімізде зорлық-зомбылыққа ұшырайтын әйелдер мен балалар саны әлі де болсын азаймай тұр. Бұндай жағдайға тап болатын адамдар көбіне өздерінің құқығы мен мүдделерімен айналысатын дағдарыс орталықтары барынан бейхабар. Осы тұрғыда полиция қызметкерлері алдағы жұмыс жоспарлары жайлы толығырақ талқыға салды. Бұндай қоғамдық деңгейдегі мәселелер полицейлердің күн тәртібінен түскен емес.

Тұрғынның сиырын ұрлап сатқан шымкенттік жас жігіт анықталды.

Мақтаарал аудандық полиция бөліміне жергілікті тұрғын арызданды. Әйел адамның айтуынша, өзінің қоршаулы егістік алқабына қамап кеткен сиырын белгісіз біреу ұрлап кеткен. Жәбірленушіге келген шығын көлемі 600 000 теңге. Аталған жайтты полиция қызметкерлері ҚР ҚК-нің 188-1-бабы «Мал ұрлығы" бойынша тіркеуге алды.

Тәртіп сақшылары хабар келіп түскен бойда жедел іске кірісті. Олар қылмысты ашу үшін қажетті шараларды жүзеге асырып, көрген-білгендерден жауап алды. Нәтижесінде, қылмысқа қатысы бар күдікті анықталды. Ол Шымкент қаласының тұрғыны болып шықты.

Белгілі болғандай, жас жігіт Мақтаарал ауданына егін егу үшін келген. Ол егістік алқапта жүрген сәтте, тұрғынның сиырын көріп, оңай олжалы болуды көздеген. Сезікті жігіт «Газель» маркалы автокөлігіне сиырды тиеп, егістік алқаптан жымқырып кеткен. Ұрлаған бөтеннің мүлкін сатып, ақшасын жаратып жіберген. Қазіргі таңда күдіктіге қатысты сотқа дейінгі тергеу амалдары жүргізілуде.

Облыс полицейлері тұрғындарға мал ұрлығының алдын алу үшін бақташы жалдауға кеңес береді. Сонымен қатар малдарыңызды жайылымға қараусыз жібермеуді сұрайды.