Кене энцефалиті – орталық жүйке жүйесін зақымдайтын, кене арқылы таралатын вирустық инфекциялық ауру. Оның негізгі қоздырғышы – кене энцефалиті вирусы. Адамға вирус көбіне жұқтырған кененің шағуы арқылы беріледі. Кей жағдайда ауру жұқтырған малдың пастерленбеген сүтін немесе сүт өнімдерін тұтыну арқылы да жұғуы мүмкін. Ауру дене қызуының көтерілуі, бас ауруы, әлсіздік, жүрек айнуы, бұлшықет ауыруы сияқты белгілермен басталып, ауыр жағдайда жүйке жүйесінің зақымдануына әкелуі мүмкін. Кене энцефалитіне қарсы арнайы вирусқа қарсы ем жоқ, сондықтан емдеу негізінен симптомдарды жеңілдетуге және асқынулардың алдын алуға бағытталған медициналық бақылау мен қолдаушы терапиядан тұрады. Ауыр жағдайларда науқас ауруханаға жатқызылады.

Конго-Қырым геморрагиялық қызбасы (КҚГҚ) – қан тамырларын және қан ұю жүйесін зақымдап, ауыр қан кетулерге әкелуі мүмкін табиғи-ошақты вирустық инфекция. Аурудың қоздырғышы – Қырым-Конго геморрагиялық қызбасының вирусы. Инфекция көбіне жұқтырған кененің шағуы немесе кенемен жанасу арқылы, сондай-ақ ауру жануардың қаны мен тіндерімен байланыс кезінде жұғады. Адамнан адамға қан және басқа да биологиялық сұйықтықтар арқылы берілуі мүмкін. Негізгі белгілеріне жоғары дене қызуы, қатты бас және бұлшықет ауыруы, әлсіздік, жүрек айнуы, құсу, іш ауыруы, ал ауыр жағдайда қан кету жатады. КҚГҚ кезінде науқасты шұғыл түрде медициналық ұйымға жеткізу қажет. Емдеу негізінен симптоматикалық және демеуші терапиядан тұрады, ал ауыр жағдайларда қарқынды медициналық көмек көрсетіледі.

Семинар барысында аурулардың алдын алу шараларына да ерекше көңіл бөлінді. Табиғатта жабық киім кию, репелленттер қолдану, серуеннен кейін дене мен киімді мұқият тексеру, кенені жалаң қолмен ұстамау және кене шаққан жағдайда медициналық көмекке жүгіну қажеттігі түсіндірілді. Кене энцефалитінің алдын алудың тиімді әдістерінің бірі – қауіп жоғары аумақтарда вакцинациядан өту.

Мамандар аурудың алғашқы белгілері байқалған кезде өздігінен ем қабылдамай, медициналық ұйымға дер кезінде жүгінудің маңыздылығын атап өтті. Уақытылы диагностика және дұрыс ұйымдастырылған емдеу ауыр асқынулардың алдын алуға мүмкіндік береді.