Серозды менингит – ми мен жұлынның жұмсақ қабықтарының қабынуымен сипатталатын инфекциялық ауру. Оның қоздырғыштары көбіне вирустар болып табылады, алайда кейбір жағдайларда бактериялар, соның ішінде туберкулез микобактериясы да себеп болуы мүмкін. Ауру дене қызуының көтерілуі, қатты бас ауруы, жүрек айнуы, құсу, әлсіздік, жарықтан қорқу, мойын бұлшықеттерінің құрысуы сияқты белгілермен көрінуі мүмкін. Мұндай белгілер байқалған жағдайда өздігінен ем қабылдамай, дереу медициналық ұйымға жүгіну қажет.

Көп жағдайда серозды менингит дер кезінде анықталып, тиісті ем жүргізілген кезде қолайлы аяқталады. Дене қызуы әдетте бірнеше күн ішінде төмендейді, ал аурудың жалпы ұзақтығы шамамен 10 күннен екі аптаға дейін созылуы мүмкін. Кейбір науқастарда аурудан кейін біраз уақыт бас ауруы, әлсіздік, есте сақтау мен зейіннің төмендеуі, эмоционалдық тұрақсыздық сияқты қалдық белгілер сақталуы ықтимал. Көп жағдайда олар бірнеше апта немесе ай ішінде біртіндеп жоғалады. Ал туберкулезді менингит ауыр өтуі мүмкін және уақтылы арнайы ем жүргізілмеген жағдайда өмірге қауіп төндіреді.

Менингиттің алдын алуда жеке гигиенаны сақтау, қолды сабынмен жиі жуу, таза немесе қайнатылған су ішу, көкөністер мен жемістерді мұқият жуу, жедел респираторлық және басқа да инфекциялық ауруларды уақытылы емдеу маңызды. Науқас адамдармен жақын қарым-қатынасты шектеу және қажет болған жағдайда оларды оқшаулау да инфекцияның таралу қаупін төмендетеді. Туберкулездің алдын алуда вакцинацияның маңызы зор.

Сонымен қатар дұрыс тамақтану, жеткілікті ұйқы, дене белсенділігі және салауатты өмір салтын ұстану ағзаның қорғаныс қабілетін нығайтуға көмектеседі. Аурудың алдын алу – әр адамның өз денсаулығына жауапкершілікпен қарауынан басталады.