Соның нәтижесінде эпидемиялық жағдай тұрақтанып, қалада бүгіннен бастап бірқатар енгізілген шектеулер алынуда. Алайда тұрғындардың қауіпсіздігі үшін Шымкентте карантин режимі 25 мамырға дейін жалғасады. Бұл ретте қазір қаланың кіреберістерінде 18 блок-бекет жұмыс істеп тұр. Барлық жағдай – қатаң бақылауда.

- Бүгінде қаламызда коронавирус індетімен 233 азамат тіркеліп отыр. Жалпы 130 азамат сауығып шыққан. Қазіргі таңда Шымкент қалалық жұқпалы аурулар ауруханасында 117 адам емделуде. Қалада қауіпті індетке қатысты 32 ошақ бар. Оның 28-і тұрғын үйге, 4-і нысандарға байланысты карантиндік ошақтар. Инфекцияны жұқтырған азаматтармен байланыста болған азаматтарға арнайы алгоритм бекітіліп, тұрақты бақылауға алынып, дер кезінде тиісті ем-дом жасалуда, - деді қала әкімінің бірінші орынбасары Ербол Садыр.

Айта кетерлігі, карантин режиміне байланысты денсаулық сақтау саласында қызмет етіп жүрген бірқатар азаматтарға да көмек көрсетілуде. Яғни жалақыларына үстемақы төленуде. Сонымен қатар қауіпті ошақтарда қызмет етіп жүрген дәрігерлер мен мейірбикелерге қонақүйлерден арнайы орын берілген. Зертхана мен дезинфекция жұмыстарын жүргізетін мамандар да қонақүйлерге орналасты. Оған қоса қаладағы екі жатақханада денсаулық сақтау саласының 300 қызметкері оқшауланып, жұмысын жалғастыруда.

«AQ-QARA.KZ»-ақпарат.