Аталған екі ауданда ұзындығы 70 шақырым республикалық және 59,4 шақырым облыстық маңызы бар жолдар күрделі және орташа жөндеуден өтуде. Оның ішінде, Жетісай ауданында 11,5 шақырымды құрайтын облыстық маңызы бар КХ-117 «Сырабат-Үтіртөбе-Көктөбе» бағытындағы автомобиль жолы ретке келтіріліп жатыр. Мамандар құрылыс жұмыстарының жыл соңында аяқталып, толықтай пайдалануға берілетінін айтады. Сонымен қатар, жақын арада ұзындығы 19,9 шақырым болатын облыстық маңызы бар КХ-86 «Жетісай-Мақталы» бағытындағы автомобиль жолына орташа жөндеу жұмыстары басталмақ. Нысанның жөндеу жұмыстары 2021 жылға өтпелі. Ал, Мақтаарал ауданы аумағында ұзындығы 16,4 шақырымдық облыстық маңызы бар КХ-78 «Атакент-Кеңесшіл-Есентаев» пен 6,9 шақырымды құрайтын облыстық маңызы бар КХ-164 «Үлгілі-Таубай ата» автомобиль жолдары орташа жөндеуден өтуде. Одан бөлек, келесі айдан бастап облыстық маңызы бар КХ-80 «Ынталы-Фирдоуси» автомобиль жолының 4,7 шақырымына орташа жөндеу жұмыстары басталмақ. Жыл соңына дейін тағы «Үлгілі-Таубай ата» және «Ынталы-Фирдоуси» автомобиль жолдарында жұмыстар толық аяқталып, пайдалануға берілетін болады.

 «AQ-QARA.KZ»-ақпарат.