Техникалық және кәсіптік білімді дамытуға бағытталған байқауға қатысу үшін еліміздің барлық өңірлерінен келген 425 студент 38 түрлі мамандық бойынша жұмыс дағдылары деңгейімен сайысты. Конкурсқа қатысушыларды 500-ге жуық сарапшы-төреші бағалады. Тәуелсіздік сарайындағы «WorldSkillsKazakhstan-2019» жұмыс алаңқайларында Түркістан облысының ТжКБ ұйымдарының студент жастары 17 құзыреттілік бойынша өз ісінде «Үздік» атағын қорғап, жүлдегер атанды. Күнгей жастары білім мен дағды, қабілет пен білікті танытатын «WorldSkillsKazakhstan-2019» бесінші республикалық чемпионатында өз шеберліктерін көрсетіп, 4 алтын, 2 күміс, 2 қола медаль жеңіп алып, командалық есепте үштікке кіріп, биыл да республиканы мойындатты.

Атап өтейік, Түркістан облысының әкімдігі мен кәсіптік-техникалық мамандықты игеруге бағытталған колледждер және әлеуметтік әріптестер бірлесе отырып, білікті мамандар даярлап, облысты өнеркәсіптік хаб орталығына айналдыруды мақсат етіп отыр. Осы орайда 65 колледждің 36-сы дуалды оқытуды іске асырып, 4333 студентті қамтып отыр. Аталған жүйе бойынша мамандар даярлайтын 4 колледжді өңірдегі ірі компанияларға сенімгерлік басқаруға беру бағытында тиісті жұмыстар атқарылуда.

«AQ-QARA.KZ»-ақпарат.