Сондай-ақ салтанатты рәсімге Түркістан облысы бойынша Сыбайлас жемқорлыққа қарсы іс-қимыл департаментінің басшысы Х.Көшқалиев, Полиция департаментінің бастығы Қ.Дәлбеков, Түркістан қаласы әкімінің орынбасары М.Базарқұлов, ІІО-ның ардагерлері мен жеке құрам қатысты. Халықтық кеңсенің ашылу рәсімінде ішкі істер органдарында көп жылдар еңбек еткен ардагер, заң ғылымдарының ардагері М.Қоғамов: «Полицияның ашықтығы мен қолжетімділігі тұрғындар үшін тиімді бастама» - деп айтты.
Салтанатты жиын барысында полиция генерал-майоры Қ.Дәлбеков бүгінде Түркістан облысы Полиция департаментіне қарасты 16 қала-ауданда тұрғындар үшін заманауи үлгідегі халықтық кеңселер ашылғанын, халыққа ыңғайлы кеңселерде осы уақытқа дейін мыңнан аса азаматқа көмек көрсетілгенін атап өтті.
Аталған фронт-офисте жеке құрам және тергеу, әкімшілік полиция құрылымы, құжаттамамен қамтамасыз ету бөлімінің мамандары тұрғындарды қабылдайды. Яғни әрбір арыз-шағым кезексіз осы жерде қаралып, тиісті мамандарға жолданатын болады.
Айта кетейік, азаматтар аптаның дүйсенбі мен жұма күндері аралығында таңғы 09:00-ден кешкі 19:00-ге дейін жұмыс істейтін кеңсеге келіп, полиция қызметіне байланысты сұрақтарына жауап, мәселелеріне құқықтық-кеңестер алады. Іс-шараға қатысқан қонақтар полицейлердің халық игілі үшін атқарып жатқан ауқымды істеріне оң бағасын берді.
«AQ-QARA.KZ»-ақпарат.