Заң-заман

Қазығұрт: Мекемеге ұрлыққа түскен екен

Қазығұрт аудандық полиция бөліміне ер адам арызданып, өзіне тиесілі ғимаратта тұрған 330 дана жылу батареяларын, құрылысқа қажетті заттарын белгісіз біреу ұрлап кеткенін жеткізді. Жәбірленушіге келген шығын көлемі 1 500 000-ға жуық теңгені құрады. Аталған жайтты полиция қызметкерлері ҚР ҚК-нің 188-бабы 3-бөлігі 3-тармағы «Ұрлық» бойынша тіркеуге алды.

Ақпаратты алған бойда тәртіп сақшылары оқиға орнына жетті. Қылмысты ашу үшін сұрастыру жұмыстарын жүргізіп, бейнебақылау камераларын қарап шықты. Нәтижесінде ұрлық жасаған үш ер адамның екеуі ұсталып, соңғысына іздеу жарияланды. Олардың бірі Өзбекстан азаматы болса, қалған екеуі Нұр-Сұлтан қаласы мен Сарыағаш ауданының тұрғындары. Сондай-ақ күдікті өзбекстандық бұрын сотты болған. Қазіргі таңда ұсталған 2 күдікті қамауда, сотқа дейінгі тергеу амалдары жүргізілуде. Анықталғандай таныс үш ер адам түнгі уақытта ғимаратқа кіріп, құрылысқа қажетті заттарды ұрлап, сатып, ақшасын жаратып жіберген.

Өз кезегінде Түркістан облысының полиция қызметкерлері тұрғындарға тұрғын үйлеріңізге, ғимараттарға, дүкенге бейнебақылау камералары мен дабылқаққыштар орнатуға кеңес береді. Егер де сіз ұрлық қылмысының куәсі болсаңыз, полицияның 102 нөміріне хабарласыңыз.

«AQ-QARA.KZ»- ақпарат

Отырар: Трактордың аккумуляторын ұрлапты

Отырар аудандық полиция бөліміне ер адам арызданды. Оның айтуынша тұрғын үйінің ауласының сыртында тұрған «К-700» маркалы трактордың құны 75 000 теңге тұратын 2 дана аккумляторын белгісіз біреу ұрлап кеткен. Жәбірленушіге келген шығын көлемі 150 000 теңге. Аталған жайтты полицейлер ҚР ҚК-нің 188-бабы 1-бөлігі «Ұрлық» бойынша тіркеуге алды.

Хабарламаны естіген тәртіп сақшылары оқиға орнына жедел жетті. Олар ұрлық қылмысын ашуға бағытталған шараларды жүзеге асырды. Жақын аумақтарды түгел қарап шығып, көрген-білгендерден жауап алды. Нәтижесінде оның жергілікті тұрғын екені белгілі болды. Анықталғандай күдікті жас жігіт сол көшеден күнделікті өтіп, бақылап жүрген. Ер адам ешкімнің байқамай тұрғанын пайдаланып, арам ойын жүзеге асырған. Күдікті ұрлаған бөтеннің мүлкін арнайы аккумулятор қабылдайтын орынға алып барып өткізіп, ақшасын жаратып жіберген. Қазіргі таңда күдіктіге қатысты тергеу амалдары жүргізілуде.

Өз кезегінде Түркістан облысының полицейлері тұрғындарға жеке мүліктеріңізге сақ болуды ескертеді. Пайдакүнемдік мақсатпен бөтен мүлікті жасырын ұрлау қылмыс болып саналады. Әрбір қылмыстың өтеуі – жаза екенін естен шығармайық.

«AQ-QARA.KZ»- ақпарат

Телефон ұрлаған әйел ұсталды

Арыс аудандық полиция бөліміне орталық базар сатушыларының бірі арызданып, өзіне тиесілі "Самсунг" маркалы ұялы телефоны ұрланғанын хабарлады. Оқиға орнына дереу жедел-тергеу тобы шықты. Тексеру кезінде полицейлер, дүкенге белгісіз біреу кіріп, сатылымдағы аяқ киімдерді қарағандай болып, ұялы телефонды байқатпай ұрлап кеткенін анықтады. Ұрланған гаджеттің құны 70 мың теңгеден асады. Тәртіп сақшылары бірден іске кірісіп, бейнебақылау камераларындағы жазбаларды зерттеп, базар аумағын аралап, ықтимал куәлардан жауап алды.

Жедел-іздестіру іс-шараларының нәтижесінде күдіктінің жеке басы және тұрған жері анықталды. Ол жергілікті тұрғын болып шықты. Тәртіп сақшылары әйелді заңға сәйкес істің мән-жайын анықтап, тергеу үшін полиция бөліміне жеткізді. Айғақты зат ретінде күдіктіден ұрланған телефон тәркіленді.

Қазіргі уақытта аталған жайт ҚР ҚК-нің 188-бабы "Ұрлық" бойынша тіркеліп, сотқа дейінгі тергеу жүргізілуде. Тергеу күдіктінің басқа да осыған ұқсас қылмыстарға қатыстылығын анықтайды.

Өз кезегінде Түркістан облысының тәртіп сақшылары: «Ұялы телефондарды дүкен сөрелерінде, дәмханадағы үстелдерде немесе автомобильдерде қараусыз қалдырмаңыз. Қалта телефоныңызды бейтаныс адамдарға бермеңіз. Телефонды киімнің ішкі қалтасында және сөмкеде сақтау қажет. Егер де, сіз, өзгенің мүлкін ұрлаудың құрбаны болсаңыз, дереу полицияға хабарласыңыз»-деп ескертеді.Арыс аудандық полиция бөліміне орталық базар сатушыларының бірі арызданып, өзіне тиесілі "Самсунг" маркалы ұялы телефоны ұрланғанын хабарлады. Оқиға орнына дереу жедел-тергеу тобы шықты. Тексеру кезінде полицейлер, дүкенге белгісіз біреу кіріп, сатылымдағы аяқ киімдерді қарағандай болып, ұялы телефонды байқатпай ұрлап кеткенін анықтады. Ұрланған гаджеттің құны 70 мың теңгеден асады. Тәртіп сақшылары бірден іске кірісіп, бейнебақылау камераларындағы жазбаларды зерттеп, базар аумағын аралап, ықтимал куәлардан жауап алды.

«AQ-QARA.KZ»- ақпарат

Түлкібастық тұрғынның ауласынан есірткі табылды

Түлкібас аудандық полиция бөліміне ер адамнан жергілікті тұрғынның бірі есірткі өсімдігін егетіні және өсіретіні туралы хабарлама келіп түскен. Аталған жайтты полиция қызметкерлері ҚР ҚК-нің 300-бабы 1-бөлігі «Құрамында есiрткi заттар бар, өсiруге тыйым салынған өсiмдiктердi заңсыз егіп-өсіру» бойынша тіркеуге алды.

Тәртіп сақшыларының жедел-іздестіру шарасы аясында күдікті анықталды. Тұрғынның ауласын тінту кезінде 7 түп есірткіге ұқсас өсімдік табылды. Аталған өсімдікке сараптама тағайындалды. Нәтижесінде айғақты ретінде алынған зат «қарасора» есірткі өсімдігі болып шықты. Қазіргі таңда сотқа дейінгі тергеу амалдары жүргізілуде.

Түркістан облысының полицейлері есірткі заттарының заңсыз айналымы үшін қылмыстық жауапкершілік қарастырылғанын еске салады. Егер сізде, есірткіні заңсыз сақтау және өткізу жайттары туралы қандай да бір ақпарат болса, дереу полицияға хабарласыңыз.

«AQ-QARA.KZ»- ақпарат

ТҮРКІСТАНДА ЖОЛ АПАТЫ 41%-ҒА АЗАЙДЫ

Түркістан облысында «Сергек» орнатқалы жол-көлік оқиғалары салдарынан жарақат алушылар саны 41% азайды. 2020 жылы өңір республика бойынша жол апатынан қаза тапқандар саны бойынша 2-ші орында болған. Бүгінде бұл көрсеткіш төмендеген.

Бүгінде пилоттық жоба аясында Түркістан қаласының қиылысында 26 «Сергек» камералары орналасқан. Сонымен қатар жаяу жүргіншілер өткелі бар жерлерде 30 желілік «Сергек» кешендері және қала ішіндегі қоғамдық тәртіпті сақтау мақсатында қойылған 200 бейнебақылау камералары жұмыс істеуде.

Былтыр «Сергек» пилоттық жобасын іске асыру бойынша Түркістан облысының әкімдігі мен полиция департаменті және «Көркем Телеком» ЖШС арасында меморандумға қол қойылған болатын.

Сондай-ақ Түркістан қаласында «Қорғау» жүйесі іске қосылды. Аталған жүйе «Сергек» камераларының көмегімен патрульдік полиция қызметкеріне 10 минут ішінде жол жүру ережесін бұзған автокөліктерді, жалған нөмірлер орнатылғанын, айыппұл төленбегенін хабарлай алатын немесе іздеуде жүрген қылмыскерлер туралы ақпаратты беріп отырады.

Облыс аумағындағы автокөлік тас жолдарында орналасқан «Сергек» кешеніндерін айта кететін болсақ, бұл желілік камера кешендері P-31 автожолының Кентау-Түркістан бағыты бойында (Оранғай ауылдық округі), М-32 халықаралық автожолының Түркістан-Шымкент бағыты бойында (Спатаев, Көкарал, Қайнар, Шұбарсу елді мекендері), А-2 автожолының Түлкібас-Шымкент пен Шымкент-Ташкент бағыттары бойында (Атамекен, Құлтума, Қарабұлақ, Рабат елді мекендері), А-15 автожолының (Бесқұбыр және Жаңа Дәүір ауылына бұрылған жерде) бойында орналасқан.

«AQ-QARA.KZ»- ақпарат

«Полицей физикалық тұрғыдан да, моралдық тұрғыдан да мықты болуы қажет»

Полицияның негізгі жұмысы – қылмыспен күрес. Ал біздің бүгінгі кейіпкеріміз 9 жылдан бері қылмысты ашу, тергеу салаларында қызмет атқарып, қарымды еңбек етіп жүрген білікті маман. Ол – Қазақстан полициясының құрдасы, Түркістан облысы ПД Жетісай АПБ криминалдық полиция бөлімшесінің жедел уәкілі, полиция майоры Әлішер Есалиев Мамадиярұлы.

Әлішер өзі Жетісай қаласының тумасы. Ол мектеп жасынан полицей болуды армандап, 11 жылдық білім алған соң, 2009 жылы Бәрімбек Бейсенов атындағы ҚарАғанды академиясына оқуға түскен. Тіпті құқық қорғау саласына қызмет етемін деп бала кезінен физикалық тұрғыдан өз бетінше шыңдалып, жекпе-жек өнерінің бір түрі каратэмен айналысқан. Бұған қоса бұл спорт түрінен жақсы көрсеткіштер көрсетіп, Қазақстанның түкпір-түкпірінде болған дүбірлі додаларда топ жарып, Қазақстан чемпионатында бас жүлдені қанжығалап, «спорт шеберлігіне үміткер» атағын иеленген. Әлішер алғашқы қызмет жолын Қарағанды академиясын тәмамдаған соң, 2013 жылы Отырар АПБ-де тергеуші болып бастады. Міне сөйтіп жекпе-жек өнерінің әдіс-тәсілдерін керемет игерген каратэші жігіт, қылмыс ашудың қыр-сырын шебер меңгерген тәжірибелі тергеушіге айналды. Болашақ майор бұл лауазыммен 2014 жылы Мақтаарал АПБ-де қызмет етіп, одан кейін Жетісай АПБ-ға ауысып, 5 жыл бойы тергеу саласында аянбай тер төкті.

-Қылмыстарды ашып, тергеу амалдарын жүргізу өзіме ұнайтын жұмыс. 2018 жылы лауазымым өзгерсе де бұл саладан алшақтап кетпедім. Себебі бұрын қылмысты тергесем, қазір қылмыс ашумен айналысатын жедел уәкілмін. Біздер қауіпті сәттермен жиі кезігеміз. Қалай дегенмен қылмыс жасаған адам тек қолға түспеудің амалын жасап, ештеңеден тайынбайтыны айдан анық. Міне осындай сәтте бала кезден спортпен айналысуым көп септігін тигізеді. Қазір де жұмыстан қолым босағанда бұрынғыны еске түсіріп, жаттығу жасап тұрамын. Өйткені полицей физикалық тұрғыдан да, моралдық тұрғыдан да мықты болуы қажет»,-дейді полиция майоры.

Криминалдық бағытта қызмет атқарып жүрген жедел уәкіл, түрлі мал ұрлықтарын, пәтер ұрлықтарын әшкерелеп, арам оймен ақша табатын алаяқтардың жолын кесіп, қаншама қылмыскерлерді құрықтауда белсенді қимылдады. Сол еңбектері еленіп, түрлі іс-шараларда, полицияның 25 жылдық мерекесінде, 10 жыл бойы қызметін адал атқарған әріптестерінің арасында алдыңғылардың бірі болып, медалдармен наградталып, арнайы алғыс хаттармен марапатталған. «Ұлық болсаң кішік бол» дегендей Әлішер әрдайым айналасына ізеттілік көрсетіп жүреді. Өзінің атақ-дәрежесі жеткілікті болса да әріптестерінің алдында кеудесін керіп, мақтанған кезі болған емес. Және осындай қасиеті үшін қызметтегі, өмірдегі достары оны қатты құрметтейді. Ендеше мамандық таңдаудан қателеспеген, орда бұзар азаматтың алдағы қызмет жолына сәттілік, үлкен абырой, сарқылмас күш-қуат тілейміз!

«AQ-QARA.KZ»- ақпарат

Түркістан: Спорттық сайыстардан жүлделі орын алған полицейлер марапатталды

Тәртіп сақшылары қылмыспен күресу жолында ғана емес, қоғамдық жұмыстарға белсене араласып, түрлі спорттық жарыстарға қатысып, жүлделі орындарға ие болуда. Атап айтар болсақ, Түркістан облысы Полиция департаментінің мәжіліс залында спортшы полицейлерді департамент бастығы полиция генерал-майоры Мұрат Қабденов өзі арнайы марапаттады. Жеңімпаз тәртіп сақшысының бірі – полиция капитаны Жәнібек Айдарбек. Ол Өзбекстан Республикасы Ташкент қаласында ересектер арасында «Әмбебап» жекпе-жек спорт түрінен өткен жарыста «Спорт шебері» атағына қол жеткізген. Сонымен қатар қаламызда өткен «Грэплинг» спорт түрінен Түркітілдес мемлекеттер арасында өткен Халықаралық турнирде 83 кг салмақ дәрежесінде жеңімпаз атанған. Ал осы жарысқа 91 кг салмақта қатысқан полиция аға лейтенанты Жолдасбек Ануаров I-орынды иеленген. Аталған полицейлер арнайы медаль, дипломмен марапатталды. Біз де жүлделі орындарға ие болған полиция қызметкерлерін құттықтаймыз. Алар асуларыңыз бен шығар белестеріңіз көп болсын! Алдағы жұмыстарыңызға сәттілік тілейміз!

«AQ-QARA.KZ»- ақпарат

Жауапты міндетті тыңғылықты атқара білетін Асқат

Қазіргі таңда сервистік полицияны жүзеге асыруға көп көңіл бөлініп, нақты жоспарлармен тыңғылықты жұмыстар атқарылып жатқаны белгілі. Міне осы тұрғыда учаскелік полиция инспекторларына көп міндет жүктеліп отыр. Ал мұндай жауапты міндетте белсенді қимылдап, қазақ полициясының беделін көтеріп жүрген қызметкерлер баршылық. Солардың бірі учаскелік полиция инспекторы полиция капитаны Асқат Асқаров. Болашақ сақшы қазақ полициясы алғаш құрылған жылы Түркістан облысы Мақтаарал ауданында дүниеге келді. Отбасында ешкім құқық қорғау саласында қызмет етпесе де, ол жастайынан өз алдына оңаша қиялдап, полицейді болуды армандайтын. Қазақ полициясымен бірге тәй-тәйлап өскен Асқат мектеп бітірген соң, ешқайда алаңдамай заңгер мамандығын ойдағыдай бітіріп шықты. Содан 2011 жылы Астана күзет қызметінде 1 жыл тәжірибе жинап, туған жеріне Мақтаарал АПБ-ға криминалист болып қызметке орналасты. Ал 2013 жылы учаскелік полиция инспекторы лауазымына тағайындалып, 9 жылдан бері осы қызметте аянбай еңбек етіп жүр.

-Учаскелік полиция инспекторына тағайындалған соң бұл лауазымға қызығушылығым еселене түсті. Күнделікті қылмысты болдырмау, құқықтық тәртіпті сақтау, азаматтарға дер кезінде көмек көрсету сынды қарбалас жұмыста үнемі сергек жүресің. Уақыттың қалай өтіп кеткенін білмейде қаласың. Бізге негізгі артылатын міндет қылмысты болдырмау , яғни қандай жағдай болмасын кез-келген тәртіпсіздікке ұласқан оқиғалардың дер кезінде алдын-алып, қылмысқа дейін жеткізбеу. Қазіргі таңда сервистік моделмен жұмыс істеуге дағдыланып жүрміз. Тұрғындармен сыпайы қарым-қатынас, көмекке мұқтаж адамдарға жылдам әрекет етіп, көмек қолын созу. Жалпы тұрғындарға біз халықтың қорғаны екенімізді ұғындырып, сеніміне ие болу және сол сенімдеріне селкеу түсірмеу. Менің отбасым да құқық қорғау саласына қызығушылық танытқан менен басқа ешкім жоқ. Бірақ өз жолымды, өз болашағымды осы саламен тікелей байланысты екенін түсіндім де, көп уақытымды жұмысқа арнадым. Қазірде солай күн, түн демей қоғамдық тәртіпті сақтауға, азаматттардың жайлы қоғамда емін-еркін өмір сүруіне ықпал жасауға тырысып жүрмін.

Полиция капитаны 30 жыл уақыт ішінде атқамінер 2 ізбасары мен кесте тігер 1 бүлдіршінін ақылды қылып тәрбиелеп, өнегелі әке атанып отыр. Қызметі де аудан тұрғындарымен үнемі қарым-қатынас жасап отыру болғандықтан, кез-келген адаммен тез тіл табысып, қашанда ақкөңіл қасиетінен айныған емес. Әріптестеріде оның қандай білікті де талапты қызметкер және Отанына берген антына адал перзент екенін жоққа шығармайды.

«AQ-QARA.KZ»- ақпарат