Іс-шарада Шымкент қалалық саяси қуғын-сүргін құрбандары музейінің директоры – Асқарова Мария Келесқызы «Қасірет» мемориалындағы іс-шараның маңыздылығына тоқталып, оның әрі жас ұрпаққа өнеге, әрі өткен ата-бабалардың рухына көрсетілген тағзым екендігін айтып өтті.

Жалпы іс-шараға 100-ге жуық адам қатысты және 31 мамыр саяси қуғын сүргін құрбандарын еске алу күніне орай арнайы ұйымдастырылды.

«Таза Қазақстан» акция әрі қарай қаладағы «Орталық саябақ» аумағында жалғасатын болады. Саябақ аумағы мен онда орналасқан «Алаш қайраткерлерінің» ескерткіштерінде тазалық жұмыстары жүргізіледі.

Айта кетейік, аталмыш шара Мемлекет басшысының тапсырмасын сапалы жүзеге асыру мақсатында өткізілуде. Шымкент қаласы әкімдігі тарапынан «Таза Қазақстан» республикалық экологиялық акциясын өткізудің іс-шара жоспары бекітілді.

Экологиялық акцияның алғашқы «Таза өлке» апталығында қала тұрғындары ерекше қолдау білдіріп, қоғам белсенділері, ерікті жастар, ұйымдар мен кәсіпорындардың қызметкерлері іргелес аумақтар мен белгіленген аулаларды тазалау, көгалдандыру, ағаштарды күтіп-баптау жұмыстарына белсене қатысты.
Акцияның бірінші декадасында 380 арнайы техника, 49 мыңға жуық адам жұмылдырылды. Сонымен бірге, 282 шақырым көше бойы, 85 шақырым аяқ жолдары, 59 мың дана ағаштарды әктеу және қырқу жұмыстары жүргізілді.
Нәтижесінде қаладан 300 тонна шамасында қоқыс шығарылды. 355 шақырым ирригациялық жүйе, 95 аялдама жуылып, 1200 дана қоқыс жәшігі (урна), 285 дана орындық сырланды.