Шымкент қаласында жаңа тағайындаулар науқаны жалғасуда. Таяуда  Шымкент қаласының және Түркістан облысының төтенше жағдайлар жөніндегі департаменттерінің басшылары тағайындалды.

Шымкенттегі Астана даңғылының бойынан жаңа жолайырық салынатын болады. Соның нәтижесінде қаланың орталық көшелеріндегі көлік қозғалысын азайтуға болады деп есептейді мамандар. Болашақта ұзындығы 6 шақырымға жететін бұл көше Шымкенттің әкімшілік-іскерлік орталығы мен Тассай тұрғын алабын байланыстырады.

Астана күні мерекесін атап өтуден Шымкент қаласы да қалыс қалған жоқ. Таяуда Шымшаһардың ортасындағы Әл-Фараби алаңында қала тұрғындары мен қонақтары үшін Астана күніне орайластырылған үлкен шоу-концерт болып өтті. Қала тұрғындары мен қонақтары әуезді ән тыңдап, керемет кештің куәсі болды.

Акцияға биыл да Шымкенттің төрт ауданы қатысады. Байқаудағы бұл жылғы ерекшелік енді үй аулалары мен көшені абаттандырған еңбеккерлерге де жүлде беріледі. Тазалық сайысына қатысуға қазір Қаратау ауданында 80 аула мен 64 көше өтінім берді.

Биылғы оқу жылында Шымкент қаласында 7987 түлек мектепті тәмамдап, соның ішінде 5446 түлек ҰБТ тапсырды. Соның ішінде 5422 түлек тест тапсыру орнына келген. Биылғы ҰБТ нәтижесі бойынша Шымкент түлектерінің орташа көрсеткіші 83,6 балды құраған. Қалалық білім бөлімінің мамандары осылай деп хабарлап отыр. Солардың арасында 138 балл жинаған екі түлек бар. Олар - Шымкенттегі №35 мектептің түлегі Гүлдана Мейірбек және №23 мектептің 11 сыныбын тәмамдаған Тұран Азым.

Шымкентте қорғасын зауытының екінші дүниежүзілік соғыста қаза тапқан жұмысшыларына арналған жаңа ескерткіш жасалып, басқа орынға қойылды. Айта кетсек, бұрынғы ескерткішті әлдебіреулер бұзып, тас-талқан етіп кеткен болатын.

Шымкентте алғаш рет халықаралық йога күні атап өтілді. Оның ұйымдастырушысы йога институтының жетекшісі Сандип Васант Джадхава.Шымкенттің тұрғындары мен қала қонақтары йогамен шұғылданып, үнді билерін көріп, Үнді мәдениетін тамашалады.

Бір жыл бұрын Қазақстанда ескі көліктерді қайта өңдеуге өткізу бағдарламасы басталған-ды. Бұл қаншалықты сәтті болды? Бағдарлама басталғалы өткен 12 ай  ішінде 10 мыңнан астам азамат ескі көліктерін өткізуге және өзімізде құрастырылған жаңа көлік құралын сатып алу үшін жеңілдік алуға мүмкіндік алды. Айта кетерлігі, ескі көліктерін өткізу жөнінен Шымкент қаласы бірінші орыннан көрінген.