Облыстық қоғамдық денсаулық басқармасының мәліметінше, емдеу мекемелеріндегі аппараттардың барлығы толыққанды іске қосылған. Медицина қызметкерлері оларды қолдану бойынша арнайы оқытулардан өткен.

«Түркістан қалалық орталық ауруханасы биыл 10 өкпені жасанды желдету аппаратымен толықты. Оның ішінде таяуда 2 аппарат отандық өнім өндірушіден жеткізілді. Қазіргі таңда жалпы саны 18 аппарат толық іске қосылған. Бүгінде инфекциялық бөлімде коронавирус инфекциясынан ем қабылдап жатқан науқас жоқ. Ауруханада коронавирус инфекциясының ықтимал екінші толқынына дайындық жұмыстары барынша күшейтілген. 2-3 айлық дәрі-дәрмек қоры да әзірленіп отыр», - дейді Түркістан қалалық орталық ауруханасының бас дәрігері Жанболат Ділдәбеков.

Сондай-ақ, өңірде медициналық ұйымдардың материалдық-техникалық базасы үздіксіз жабдықталған. Мәселен, 8 ауруханада қосымша оттегі станциялары орнатылған. Жуырда 80 бірлік оксигенация аппараты (HI-FLOW) сатып алынған. Бұдан бөлек, оттегі концентраторларының саны 900-ге жеткізіліп, оттегі нүктелерінің саны 2 095 нүктеге дейін арттырылған.

 «AQ-QARA.KZ»-ақпарат