Форум алдында Түркістан өңірін танытатын көркемсурет галереясы мен презентациялар, халықаралық бизнес пен инвестициялық жобалар жәрмеңкесі ел назарына ұсынылды. Іс-шарада ауыл шаруашылығы, жеңіл өнеркәсіп, экспорт, логистика және IT-білім сияқты негізгі салалар бойынша талқылануда.

Халықаралық форум аясында Түркістан облысында ауқымды жиынға қатысып жатқан Қазақстан, Түркия, Қырғызстан, Өзбекстан, Әзербайжан және Қытай, Ресей елінің беделді компанияларымен бірнеше бағытта 20-ға жуық меморандумға қол қойылды. Атап айтқанда Сауран ауданында тоңазытқыш қондырғылар өндірісін кеңейту, Созақ ауданында фосфатты тау жыныстары кендерін өңдеу зауытының құрылысы, «Шардара» экспорттық агроөнеркәсіптік кластерін құру, Мақтаарал ауданында тоқыма кластерін құру және Келес ауданында индустриалды парк құрылысы бойынша, Сайрам ауданында қуаттылығы 1000 МВт болатын икемді генерациялау режимі бар аралас циклді газ станциясының негізінде электр станциясын салу бойынша, түсті рудаларды және металлургия өндірісінің өнеркәсіп қалдықтарын қайта өңдеу бойынша Кентау байыту комбинатын іске қосу, Жетісай ауданында тоқыма фабрикасын құру, Бәйдібек ауданында тауық жұмыртқасын өндіретін құс фабрикасын құру, дымқыл майлықтар мен балалар жөргектерін шығару бағытында қолданыстағы желіні кеңейту бойынша, металл конструкцияларын шығаратын зауыт құрылысы бойынша және тағы басқа бағытта ынтымақтастық туралы меморандумға қол қойылып, келісімдер жасалды.

Маңызды жиында инвесторларға перспективалы инвестициялық жобалармен және оларды өңірде іске асыру үшін жағдайлармен танысуға бірегей мүмкіндік берілуде. Жобаларды бірлесіп дамыту үшін бизнес-қоғамдастық, жергілікті билік және инвесторлар арасында стратегиялық серіктестіктер орнатылып, тәжірибе және білім алмасады.

Айта кетейік, шара мақсаты — экономикалық өсуді ынталандыру, инфрақұрылымды дамыту, жаңа жұмыс орындарын құру, технологиялық жаңару және жергілікті бизнестің бәсекеге қабілеттілігін арттыру мақсатында өңірге шетелдік инвестицияларды тартуға жәрдемдесу. Сондай-ақ форум қолайлы инвестициялық орта құру, тәжірибе алмасу және өңірдің орнықты әлеуметтік-экономикалық дамуын ынталандыру үшін бірлескен шешімдер іздеу мақсатында инвесторлар, бизнес-қоғамдастық өкілдері мен мемлекеттік құрылымдар арасында әріптестік қатынастар орнатуға бағытталған.

Мұнымен қоса, дәл осы күні Түркістан облысы әкімінің орынбасары Ермек Кенжеханұлы Иран елінен келген делегациямен кездесіп, инвесторлармен жаңа жобаларды талқылады. Ирандық «Solico Group» компаниясының өкілдері Түркістан облысында сүт өнімдерін өндіретін зауыт салуға, ауыл шаруашылығы өнімдерін қайта өңдеуге ниетті. Инвестордың жобасымен танысқан Ермек Кенжеханұлы өңірде инвестициялық жобаларға жасалған мүмкіндіктер туралы тоқталды.

– Түркістан облысында бүгінде 9 индустриалды аймақ бар. Онда бірқатар жобалар жүзеге асқан. Түркістан облысы – өндіріс орындарын ашуға қолайлы өңір. Ауа-райы – жылы, халқы – еңбекқор. Экономиканы дамытуға бағытталған инвестициялық жобаларға ашықпыз, – деді облыс әкімінің орынбасары.

Айта кетейік, «Solico Group» – 2000-нан астам өнім санатын ұсынатын Таяу Шығыстағы ең ірі тамақ өнеркәсібіндегі компаниялардың бірі. Сүт, ет, сусындар, спорттық тамақтану және тағы басқа өнім түрлерін өндірумен айналысатын компанияның әлем бойынша бірқатар кеңселері бар. Атап айтқанда, Иран аумағында 12 өндіріс орны, Ирак аумағында 2 өндіріс орны және әлем бойынша 30 қалада кеңселері бар. Кездесу нәтижесінде екі тарап ауыл шаруашылығы саласында өзара ынтымақтастық құруға уағдаласты. Түркістан облысына инвестиция тарту бағытындағы жұмыстар жалғасады.

  «AQ-QARA.KZ» - ақпарат