Шараның басты мақсаты - жастар саясатын жүзеге асыру, жастардың бойында мәдениеттілік, рухани адамгершілік, өнерге деген шығармашылық ізденістерін дамыту, дарынды жастарға қолдау көрсету. Тартысты өткен сайысты Сауран ауданы әкімінің орынбасары Садибаев Серік Өмірханұлы алғы сөзбен ашып берді. Жайдарман ойынын Түркістан қалалық оқушылар сарайының Жайдарман академиясының жетекшісі, Республикалық Жайдарман сайыстарында ойын көрсеткен - Жолдықожаев Бекұлан жүргізді.

Сауран ауданының 1 жылдығына және Мемлекеттік рәміздердің 30 жылдығына орай ұйымдастырылған жайдарман ойынына Сауран ауданынан жалпы 8 команда қатысып, өз өнерлерін ортаға салды. Жайдарман ойынында Қоғамдық кеңестің төрағасы, қоғам белсендісі Төребай Асқарұлы, блогер, вайнер, тиктокер Юсупов Азизхан, Сауран аудандық мәдениет үйі директорының орынбасары Сымбат Бақытқызы, Сауран ауданы Жастар ресурстық орталығының басшысы Айгерім Дүйсенбекова қазылық етіп, ойыншыларға әділ бағаларын берді.

Белсенді, жалынды жастардың қызыққа толы ойындары нәтижиесінде Қарашық ауылдық округінің “Егіздер мен семіздер” командасы І орынға, Жүйнек ауылдық округінің “ЖасStar” командасы ІІ орынға, Үшқайық ауылдық округінің “Үшқайық” командасы ІІІ орынға ие болып, Жібек Жолы ауылдық округінің “Сауран” командасының ойыншысы Мұратбекұлы Сәкен “Үздік ойыншы” номинациясымен және барлық қатысушы командалар үздік ойын көрсеткендері үшін Алғыс хаттармен марапатталып, бағалы сыйлықтар табысталды. Шынайы күлкіге толы, тартысты және көңілді өткен Жайдарман сайысына қатысқан командалар мен атсалысқан барша жандарға шынайы алғыс айтылды.

Бастауын сонау 2005 жылы алған жайдарман ойындары қазір халықаралық жобаға айналып үлгерді. Мұндағы жайдарлы әзілдер, ойыншылардың қылықтары, қызықтары, киім киістері, ән айтып, би билегендері біздің қоғамда, оның ішінде жастар арасында кеңінен танымалдылыққа ие болғаны да рас. Түркістан облысында, соның ішінде Сауран ауданында да бұл жобаға қатысушы жастар қатары көбейіп, тамыр жайып келеді. Жайдарман – қазіргі таңда ауқымды аудиторияны қамтыған, ең ірі жастар қозғалыстарының бірі. Жайдарлы жайдарманшылардың ұлттық болмысын қалыптастырып, ел игілігіне қызмет ететін тәлімді тәрбие беру үлкен міндет. Әрбір жаңа маусым – тәжірибелі командалардың біліктілігін шыңдауға, жас таланттардың шығармашылық потенциалын жүзеге асыруға жаңа мүмкіндіктер берері сөзсіз.

«AQ-QARA.KZ» - ақпарат»