Жасөспірімдер арасындағы бұл жарысқа еліміз бойынша 8 команда келген. Маңғыстау, Батыс Қазақстан, Қызылорда, Түркістан, Жамбыл облыстары мен Шымкент қаласының жастары өзара бақ сынасты. Ерекше ойынға ынталы жастар көп. Солардың бірі Бейбарыс Ұланбаев. Үш жылдан бері осы спорт түрімен шұғылданып келеді.

"Бұл спорт түріне негізі шетелдерде жақсы дамыған қазіргі таңда спорт түрлерін іріктеп мектептерде қысқартып жатыр Біздің мақсатымыз спорт мектептеріне осы хоккейді кіргізу",-дейі Шымкент қаласы және Түркістан облысы бойынша көгалдағы хоккей федерациясының президенті Ажар Арынбекова.

Тартысты ойынның өтуіне Спорт басқармасы мен Көгалдағы хоккей федерациясы мұрындық болған. Балаларды ынталандыру үшін жеңімпаз командаларға алғыс хаттар мен сыйлықтар табысталды. Көгалдағы хоккей - қысы жылы оңтүстік өңірлеріне ыңғайлы ойын. Федерация осы ойын түрін дамытуға барынша атсалысып жатыр.

Индорхоккей – көгалдағы хоккейдің бір түрі. Айырмашылығы, индорхоккей залда (төбесі жабық спорттық кешендерде) ойналады, ал көгалдағы хоккей ойындары ашық стадионда өткізіледі. Осыған орай, индорхоккей ойындары өтетін алаң сәл кішірек болады. Нақтырақ айтқанда, алаңның ауданы – 20х40 метр. Яғни қол добы алаңымен бірдей. Мұнда ойыншылар да аз. Әр командада бір қақпашы, бес ойыншы болады. Ал көгалдағы хоккейде футболдағыдай жасыл алаңға 11 ойыншы шығады. Индорхоккей матчтары 20 минуттық екі таймнан тұрады (тура футзалдағыдай). Ал қақпасы тура қол добындағыдай: биіктігі – 2 метр, ені – 3 метр. Көгалдағы хоккейдікі сәл үлкендеу: биіктігі – 2,14 метр, ені – 3,66 метр. Индорхоккей таяқшалары – көгалдағы хоккейдікіне ұқсас, имек таяқ, бірақ салмағы жеңілдеу. Допты әуелетіп (жоғары көтеріп) ұруға және шірене соғуға болмайды. Тек алаң үстімен қақпақылдап ойнау керек. Таяқшаны допқа тигізіп тұрып қозғалту керек. Сондай-ақ индор­хоккей Олимпиадалық ойындар бағдарламасына енгізілмеген.

Көгалдағы хоккейдің залда ойналатын бұл түрі 1972 жылы Германияда пайда болған.