Республикалық деңгейде жалауы желбіреген бұл сайысқа Түркістан облысының әр өңірінен, сонымен қатар еліміздің барлық аймағынан жас қырандар шақырту алып, күш сынасты. Айта кетейік, Дүниежүзілік қазақ күресі федерациясы ұлттық ойынды әлемдік аренаға алып шығуы мақсатында игілікті істерді жүзеге асырып келеді. Қазақ халқының Төлебиін ұлықтап отырған бұл турнир осы сөзіміздің дәлелі болса керек. 

Белдесуде барлық қарсыластарының жаурынын жерге тигізіп, қара үзген 38 келідегі Леңгір қаласының балуаны Лес Нұрсат жеңіс тұғырынан көрінді. Сонымен қатаржеңімпаздар қатарында 42 келіде бақ сынасқан Ұлттық спорт мектебінің шәкірті Мұхтар Әлиев алтын медальді қанжығасына байлады. Жарысқа арнайы келген Дүниежүзілік қазақ күресі федерациясының бас хатшысы Бағдәулет Сәбитов жарыстың жоғары деңгейде өткенін айтты.

Дүбірлі додада үздік деп танылған жасөспірімдер туринр ұйымдастырушылары атынан арнайы медальдармен және кубокпен марапатталды. Сондай-ақ осы жарыс арқылы жас өрендер қазақ күресінің дамуына өзіндік үлестерін қосты.

«AQ-QARA.KZ»-ақпарат.