Арал-Сырдария облысаралық бассейндік балық шаруашылығы инспекциясы Шымкент қаласы, Қызылорда және Түркістан облыстары шегіндегі бассейндік жүйе бойынша балық ресурстары мен басқа да су жануарларын қорғау, өсімін молайту және пайдалану саласындағы мемлекеттік бақылау мен қадағалауды жүзеге асырып келеді. «Таза су айдындары» табиғат қорғау акциясы Балық ресурстарын және олардың тіршілік ету ортасын сақтау, табиғи өсімін молайту мақсатында республика көлемінде жыл сайын акциялар өткізіліп келеді. Бұл туралы Арал-Сырдария облысаралық бассейндік балық шаруашылығы инспекциясы Түркістан балық инспекциясы бөлімінің бөлім басшысы Боранбай Шәкен Қанайұлы атап өтті.

Акция нәтижесі бойынша,тазалау жұмыстарына 457 адам қатысып, 57 арнайы техника және 17 шағын көлемді жүзу құралдары жұмылдырылып, 44 тоннаға жуық әр түрлі қоқыстар мен суда қалған 494 дана аулардың қалдықтары жиналып тиісті орындарға шығарылды.

Ал, «Уылдырық шашу» балық қорғау акциясы басталғалы Инспекция бойынша 214 балық қорғау заңнамасының бұзушылығы анықталып, оның ішінде 5 қылмыстық іс ішкі істер органына жолданды. 209 әкімшілік хаттама толтырылып, оның 54 әкімшілік ісі сот органдарының қарауына жіберілді. Сонымен қатар, жыл басынан балық аулау ережесін бұзғаны үшін 151 жеке тұлғаға 2 млн 388,8 мың теңге айыппұл салынып өндірілуде.

"Aq-qara.kz"- ақпарат

26 маусым — Халықаралық нашақорлыққа және есірткінің заңсыз айналымына қарсы күні.
Сарыағаш қала аумағындағы халық көп шоғырланатын қоғамдық орындарда «Жастар есірткіге қарсы» акциясын өтті. Акция барысында тұрғындарға ғасыр індетіне айналған есірткінің зияны мен зардабы түсіндіріліп, тұрғындарға брошюралары таратылды.

1987 жылы БҰҰ-ның Бас Ассамблеясы жыл сайын 26 маусымды өзінің есірткіні теріс пайдаланушылықтан еркін халықаралық қоғам құру мақсатында қызметін және ынтымақтастығын күшейту табандылығын білдіру үшін Халықаралық есірткі заттарын теріс пайдалану және олардың заңсыз айналымына, заңсыз түсік жасатуға қарсы күрес күні ретінде атап өтуді белгіледі (International Day Against Drug Abuse and Illicit Trafficking). Сондай-ақ, осы күні өткізілген Халықаралық конференция барысында ВИЧ ауруының таралуына жол ашатын ине арқылы есірткі қабылдауға қарсы күресу мақсатында бағдарлама даярланады. Жалпы есірткіні таратуға қарсы күрес шаралары 100 жылдан бері жүргізіліп келеді. Ең алғаш рет 1909 жылы шанхайлық апиынға қарсы ұйымының мүшелері әлемдегі дамыған 13 мемлекетті жинап, есірткі тасымалдануына тосқауыл қою шараларын ойлап табуға тырысқан болатын. Содан бері бір ғасырдан астам уақыт өтсе де, мәселенің шешімі нақты табылған емес.

Сандарды сөйлетсек, БҰҰ нашақорлық және қылмыс басқармасының бағасына сәйкес, есірткі пайдаланушылардың саны 200 млн. адамға жеткен, ол бүкіл жер шарының 3,4% немесе 15 жас және одан жоғары халықтың 4,7% құрайды. Қазіргі таңда 160 млн-ға жуық адам каннабистік есірткі пайдаланушылар тобында, 42 млн. САР (олардың ішінен 8 млн, экстази) және 14 млн. артығы кокаин, 15 млн-нан азы апиынды пайдаланады (олардың ішінен 10 млн. героин). Және оны тұтынушылардың үлесі жылма-жыл артып келетіндігі көңілге қаяу салады.

Мемлекеттік емес ұйымдардың жүргізген сауалнамасы бойынша, елімізде әрбір оныншы адам өмірінде бір рет болса да есірткі пайдаланған көрінеді.

Халықаралық нашақорлыққа және есірткінің заңсыз айналымға шығуына қарсы күрес күні бұқаралық қоғамға қазіргі уақытта есірткі мәселесіне баса аударуға себепші болып отыр. Нашақорлық – әлеуметке ортақ проблема, қоғамның дерті. Жер бетінде миллиондаған өмірлерді алып кетіп жатқан бұл ауру әлемдік трагедия, өз ауқымы жағынан дүниежүзілік соғыстармен тең. Бүкіләлемдік дертке арнайы мамандар ғана емес, планетамыздың әрбір тұрғыны қарсы күрес  жүргізе білгенде ғана мәселенің шешімі табылмақшы. Сондықтан да, сіз болып, біз болып салауатты өмір салтын қалыптастырайық! Дәл осындай деген

жастар үн парақшаларын тарату барысында “Есірткіге ЖОҚ деп айтуға тұратын 10 себеп қандай?”, “Нашақорлықтың салдары”, “Есірткіден қалай бас тартуға болады”, “Бас тарту тактикасы” жайлы халыққа түсінік берді.

«AQ-QARA.KZ»- ақпарат

 Қала күніне орай "Қазақ аналары - дәстүрге жол" республикалық жобасының мерекелік іс-шарасы өтті. Ұлттық салт-дәстүрлерді ұрпақтан ұрпаққа жеткізуді мақсат еткен жобаның мерекелік концерттік бағдарламасы Абай ауданы әкімдігінің қолдауымен ұйымдастырылды.

Шымкент қаласы Абай ауданы әкімінің орынбасары Е.Заңқоев мұндай жаңа бастамалардың жастарға берері мол екенін, тағылымды жобаларды қолдауға әркез дайын екенін жеткізді.

Республикалық жобаның Шымкент қаласы бойынша филиалы биыл наурыз айында құрылған болатын. Жобаның негізін қалаушы Айнұр Жүгінісова көпшілікті қала күнімен құттықтап, авторлық әндерін тарту етті. Іс-шарада ұмыт қалған салт-дәстүрлерімізден көрініс көрсетіліп, келіннің бетін ашу, тұсаукесер және тағы басқа дәстүрлеріміз дәріптелді."Қазақ қыздары" ұлттық киімдерінен дефиле және балалар киімдерінің үлгісі көрсетілді. Сондай-ақ, қолөнер шеберлері мен студенттердің қолөнер бұйымдарының көрмесі ұйымдастырылды.

Айтпақшы, қалада «Шырқал ән, төгіл дауыс» турнесі басталды.

Шымкент қаласының Ақпараттық – коммуникациялық орталығында Хатимолла Жәңгірұлы Бердіғалиевтің 70 жылдығына арналған республикалық «Шырқал ән, төгіл дауыс»  турнесінің өтуіне байланысты Батыс Қазақстан облысынан келген делегаттар баспасөз брифингін берді.

«Биылғы жылы, Қазақстанның еңбек сіңірген қайраткері,  «Парасат» орденінің иегері, айтыскер ақын, жыршы-темеші, дәстүрлі әнші Хатимолла Жәңгірұлы Бердіғалиев  мерейлі 70 жасқа толып отыр. Осы орайда, Батыс Қазақстан облысы әкімдігінің және облыстық мәдениет басқармасының қолдауымен, Ғ.Құрманғалиев атындағы облыстық филармониясының ұйымдастыруымен республикалық «Шырқал ән, төгіл дауыс»  турнесі бастау алды. Бүгін 21 маусым күні Шымкент қаласындағы Шәмші Қалдаяқов атындағы облыстық филармонияда сағат 19:00 де  Хатимолла Жәңгірұлының шығармашылық концерті өтеді. Бұл концертте Ғарифолла Құрманғалиев атындағы облыстық филармония әртістері ҚР Еңбек сіңірген артисі, Қанатқали Қожақов пен «Ерен еңбегі үшін» медалінің иегері Айбар Хайрхановтар да өнер көрсететін болады.»-деді Олжас  Сейтимов. Хатимолла Жәңгірұлының  репертуарында қазақтың үш жүзден астам халық әндері, Бұқар, Базар, Қашаған жыраулардың  терме-жырлары, Мұхит Мералиевтің, Ғарифолла Құрманғалиевтің  және халық композиторларының әндері де бар. Хатимолла Бердіғалиев есімі алты алашқа мәлім болған, айтыс пен ән өнерінде елінің ықыласына бөленген дарынды тұлға. Турненің мақсаты; руханият кеңістігін ұлттық тәрбиемен астастырып, патриоттық идеялогияны қалыптастыру және қазақ даласындағы  дарынды дарабоздардың есімдерін дәріптеу арқылы төл өнерімізді қастерлеу болып табылады.

"AQ-QARA.KZ"-ақпарат

Полицияның қызметі қашан да халықтың көз алдында. Олар әрдайым тұрғындармен тығыз қарым-қатынаста болады. Бірақ бәрі бірдей емес. Әр полицейдің өзінің қызметіне сай жүктелген міндеттері бар. Осылардың ішінде жұрт көзіне түсе бермейтін, алайда жұмыс барысында ең маңызды орынды иеленген криминалистика саласы. Бұл қызмет мол тәжірибе мен төзімділікті қажет етеді. Ол үшін біршама жылдар қажет. Алайда жас та болса алғырлығымен көзге түсіп жүрген 25 жастағы Әлихан Әмірдің бұл қызметке деген құлшынысы ерекше. Қызметке келген күннен бастап 3 жыл ішінде бірталай білім жинап үлгергені де байқалады.

Жалпы қылмыстардың ашылуы криминалистердің сауатты жұмысына тікелей байланысты. Қазіргі таңда бұл қызметке озық технологиялар мен жаңа құрылғылар келсе де бәрібір адамның жүйелі әрекетінсіз ештеңе бітпейді.

– Бәрімбек Бейсенов атындағы Қарағанды академиясын 2019 жылы тәмамдаған соң Кентау қалалық полиция бөлімінде анықтаушы болып, алғаш еңбек жолымды бастадым. Содан аздап тәжірибе жинақтаған соң көп ұзамай Мақтаарал аудандық полиция бөліміне криминалистика саласы бойынша қызметке ауыстым. Жас болған соң білгің келетін, үйренгің келетін дүниелер көп болады. Криминалистиканың да қыр-сырын меңгеру оңай емес. Аз уақыт ішінде бірталай білім жинағаным да рас. Бірақ «білгенім тоғыз, білмегенім тоқсан тоғыз» дегендей, өз ісіңнің білікті маманы болу үшін, көп тер төгуге тура келеді. Криминалистика бір жағынан алып қарағанда үлкен ғылым. Мұндай ғылым алғаш Грекия елінде пайда болған. Содан бері өз маңызын жоғалтпаған криминологиялық сараптаулар қылмысты ашу кезінде шешуші рөл атқарады.

Полицей болуды бала кезден армандаған аға лейтенант қашанда айналасындағыларға көмек беруге дайын жүреді. Керек жерінде мұқтаж жанға қол ұшын беру парыз деп түсінетін Әлихан тұрғындардан мақтау сөздер естіп, алғыс алған сайын жұмысына екі есе құлшыныспен кіріседі. Себебі ол кім үшін қызмет етіп, не үшін жұмыс жасап жүргенін жақсы біледі. Қазіргі таңда 1 қыздың әкесі көп уақытын жұмысқа бөліп жүр. Жас кезінде қиналып, ауырдың астымен жүруге дағдыланып, сынақтардан дер кезінде өтіп, жақсы көрсеткіштерге қол жеткізгенді жөн көреді. Жас криминалистің талабына нұр жауып, қабілет-қарымы шыңдалып, келешек барлық атақ-дәрежеге адал еңбегі, темірдей төзімділігінің арқасында жетуіне тілектеспіз!

Адам баласы кез-келген жағдайда жазатайым жағдайға ұшырауы мүмкін. Осындай келеңсіз жағдайлардың алдын алу мақсатында Төлеби аудандық полиция бөлімінің мәжіліс залында полицейлер кездесу өткізді. Жиынға бастауыш, негізгі, орта және жалпы білім беру мектептерінің қызметкерлері қатысты. Тәртіп сақшылары келеңсіз жағдайларды болдырмау мақсатында кезекшілік-мобильді топтық жұмыстар жасалатындығын айтты. Кезекшілік-мобильді топтың жоспары бекітіліп, білім алушылардың өмірі мен денсаулығының қауіпсіздігін қамтамасыз ету, қоғамдық қауіпсіздікпен жол қозғалыстарын сақтау мақсатында жұмыс атқаруды бастап кетті. Сонымен қатар жазатайым жағдайды болдырмас үшін тұрғындарға түсіндірме жұмыстары жүргізілуде. Жиналғандар осы тақырып аясында өздерінің ұсыныс-пікірлерін ортаға салды. Полицейлер жиынға қатысушыларға балаларының өміріне жауапты болып, оларды қадағалау керегін ескертеді. Кәмелет жасына толмаған жасөспірімдерге жол қозғалысы ережесін сақтау, сондай-ақ түнгі уақытта заңды өкілінсіз көшеге шықпау керектігі жайлы да айтылды. Бұл бағыттағы жұмыстар бұған дейін де тұрақты күн тәртібіне енген. Алдағы уақытта да бұл тұрғыдағы жұмыстар жалғасын табатын болады.

«AQ-QARA.KZ»- ақпарат

Сайрам аудандық полиция басқармасына жергілікті тұрғын арызданған. Орта жастағы әйелдің айтуынша, сағат 08:00 шамасында бұрынғы азаматтық некедегі күйеуімен жанжалдасып қалған. Салдарынан күйеуі әйелінің сөмкесіндегі «Самсунг Ж1» маркалы ұялы телефоны мен 800 теңге ақшасын өзінше билік етіп, алып кеткен. Аталған жайтты полиция қызметкерлері ҚР ҚК-нің 389/1-бабы «Өзінше билік ету» бойынша тіркеуге алды.

Хабарлама келіп түскен бойда тәжірибелі тәртіп сақшылары оқиға орнына бірден келіп жетті. Олар күдіктіні жедел-іздестіру нәтижесінде жарты сағат ішінде жақын аумақтағы дүкендердің бірінен ұстады.

Анықталғандай, күдікті ер адам Қостанай қаласының тұрғыны. Ол әйелімен 1 ай уақыт бойына ажырасып жүрген. Екеуі көшеде кездесіп қалып, ол әйелдің үйіне еріп келген. Арада болған жанжал салдарынан осындай әрекетке барған. Күдіктіден айғақты зат ретінде ұялы телефон мен ақша алынып, иесіне қайтарылды. Сезікті ер адам бұған дейін де қылмыстық жауапкершілікке тартылғаны белгілі болды. Қазіргі таңда күдіктіге қатысты тергеу амалдары жүргізілуде.

Өз кезегінде Түркістан облысының полицейлері азаматтарға мұқият және өз мүліктеріне ие болуды ескертеді. Сондай-ақ заңға қайшы іс-әрекеттерді жасамауға, туындаған мәселелерді заң аясында шешуге шақырады. Егер, сіз, заңсыз әрекеттердің құрбаны немесе куәсі болсаңыз, тез арада «102» телефонына хабарласыңыз.

Жігітке жеті өнердің өзі аздық етеді. Ал біздің бүгінгі кейіпкеріміз полиция аға лейтенанты Думанжан Тұрсынбай өнерін өрге жүздіріп, қоғамға әр қырынан ат салысып жүрген жандардың бірі. Қазіргі таңда Мақтаарал АПБ ЖПҚ Кәмелетке толмағандар ісі жөніндегі учаскелік полиция инспекторының бұл салаға деген қызығушылығы мектеп жасында-ақ оянған. Жастайынан қоғамдық жұмыстарға белсене араласып, өзінің жан-жақты қырын көрсете білген алғыр жігіт мектептен түлеп ұшқан шақта да спорт пен шығармашылығын қатар алып жүрді. Спорттың еркін күрес, қолкүрес түрлерінен әбден шыныққан Думанжан өзінің мықтылығын талай мәрте дәлелдеп, облыстық, республикалық жарыстардың жүлдегері атанған. Тіпті әлі күнге бұл спорт түрлерінен Мақтаарал ауданында жеңіс тұғырынан түспей, аймақтың бетке ұстар спортшыларының алдыңғы қатарында тұр. Ал шығармашылық қырына келсек, жас түлек алғаш Шырақбек Қабылбаев атындағы Қостанай академиясына оқуға барған сәттен-ақ ақындық таланты қанатын кеңге жайды. Академияда оқып жүрген шағында түрлі тақырыптағы өлеңдері мен мақалалары газет-журналдарда, әлеуметтік желілерде жарық көрген. Бұған қоса руханият саласына да өз үлесін қоспақ ниетпен академиядағы дарынды жастарды бір жерге жинап, шығармашылық орта құрды. Мұндай еңбектері әділ бағаланып, кейін республикалық «Ұстаз жолы» қоғамдық қорының атынан «Елеулі еңбегі үшін, Ел ардақтысы» медалімен де марапатталған.

Осыншама өнерді бойына жинаған талантты жігіттің алдынан сан-тарау жол кездессе де бәрібір полиция қызметіне деген қызығушылығы ерекше болды. Және алға қойған мақсатын құқық қорғау саласымен тікелей байланыстырды. Ол 2019 жылы академия түлегі атанған соң, көліктегі Полиция департаменті Петропавл станциясындағы желілік полиция бөлімінде алғаш қызметін бастады. Бұл қызметті абыроймен атқарып, 2 жылда жинаған тәжірибесімен 2021 жылы туған жері Мақтааралға қайта оралды. Содан бері аймақтағы жасөспірімдердің қауіпсіздігін қамтамасыз етіп, тұрғындардың тыныштығын күзетіп, тынбай еңбек етуде. 24 жастағы аға лейтенант жас та болса оқығаны мен тоқығаны көп десек артық айтқандық емес. Қаламын қолынан тастамайтын ақынжанды полицей ерлігімен есте қалған батырларымыздың даңқын асқақтатып, қаһармандардың есімдерін дәріптеп, әр мерекеде жыр жазудан жалыққан емес. Жақында ғана Ұлы жеңіс мерекесіне орай «қанатты қыз» атанған әйгілі ұшқыш ару, Кеңес одағының батыры, Халық қаһарманы Хиуаз Доспановаға арнаған жап-жаңа туындысы жарық көрді. Міне жастарға тек құқықтық тәртіпті ескерте бермей, рухани тұрғыдан сәл де болса бағыт-бағдар көрсететін Думанжандай сақшылардың қоғамға тигізер пайдасы көп.

Тұрсынбайдың немересі жөнінде біздің айтарымыз мұнымен бітпейді. Себебі әріптестері бұл жігіттен зор үміт күтетіндерін айтып, оның нағыз білікті маманға айналып келе жатқандығын алға тартады. Ендеше палуан, ақын, полицей Думанжанның әрдайым жеңістің тұғырынан көрініп, қаламынан небір керемет туындылар жарық көріп, абыройлы қызметте дәрежесі жылдан-жылға биіктей берсін демекпіз.

Заңсыз есірткі бизнесі, есірткі қолдану, сақтау, сату деген қылмыстар баршамызға ортақ мәселе десек болады. Осы орайда ел Президенті Қасым-Жомарт Тоқаев, біздің азаматтардың, әсіресе жастар арасында есірткінің таралу жолына қуатты тосқауыл қою қажеттігін баса айтқан болатын. Ал ҚР ІІМ барша облыстық ПД-ға тапсырмалар беріп, жұмысты жүйелендіруде. Өз кезегінде Түркістан облысы Полиция департаментінің бастығы полиция генерал-майоры Мұрат Қабденовтің бастамасымен Есірткі қылмысына қарсы іс-қимыл басқармасының қызметкерлері есірткіге қатысты қылмыстық құқық бұзушылықтарды анықтау, ұйымдасқан қылмыстық топтарды ажырату, жасырын есірткі зертханаларын жою, есірткінің жастар арасында таралуына тосқауыл қою мақсатында қарқынды жұмыс жүргізуде. Мәселен облыста 26 мамыр мен 26 маусым күндері аралағында 1 айға жоспарланған «Есірткісіз болашақ» іс-шарасы басталған болатын. Осы бағдарламаға сәйкес ПД-нің Есірткі қылмысына қарсы іс-қимыл басқармасы қызметкерлерінің ұйымдастыруымен, нарколог-дәрігерлердің қатысуында маңызы зор іс-шара өткізілді. Жеңіс саябағында «Есірткісіз болашақ» ұранымен өткен кездесуге 100-ден астам жастар қатысты. Студенттерге есірткінің зияндылығы және жауапкершілігі туралы түсіндірме жұмыстары жүргізілді. Ал нарколог дәрігерлер есірткінің адам ағзасына зияндылығын, өмір жалмайтынын айта отырып, зиянды әдеттерге мүлде жоламауға шақырды. Оған қоса «Есірткіге жол жоқ» жазуымен жасөспірімдерге естелік сыйлықтар табыс етілді.

Шымкент қаласының бас жоспары қала тұрғындарының назарына ұсынылды. 1 ай бойы кез келген шымкенттік тұрғын бас жоспармен танысып, өзінің ұсыныс-тілегін қалдыра алады. Қала әкімінің орынбасары Мақсұт Исахов арнайы өткен жиналыста осылай деп мәлімдеді.

– Шымкенттің бұған дейінгі бас жоспары 2012 жылы бекітілген болатын. Ал 2015-2018 жылдар аралығында бас жоспарға өзектендіру жұмыстары жүргізіліп, сол кездегі қала әкімі бекітті. Ал бұл бас жоспар 2025-2035 жылдар аралығын қамтып отыр. Арнайы мамандар қаладағы 117 мың гектар аумаққа түгел топотүсірілім жасап, 1:10 000 масштабпен картаға енгізді. Бұл жұмыстардың тағы бір ерекшілігі – барлық сызба заманауи талаптарға сай келетін векторлы форматта жасалып отыр. Осылайша алдағы уақытта тиісті жұмыстар атқарылып, Шымкент заманауи мегаполис талабына сай келетін қала атанады деп жоспарлап отырмыз, – деді Мақсұт Пернебайұлы.

Қала әкімі орынбасарының мәлімдеуінше, 2021 жылдың шілдесінде елдi мекендердiң аумақтарын дамыту және оған құрылыс салуды белгiленген тәртiппен бекiтiлген бас жоспарлар негiзiнде жүзеге асыру бойынша ерекше тәртіпті қолдана отырып өткізілген мемлекеттік сатып алу конкурсы арқылы Шымкенттің бас жоспарын әзірлеуге «Градкомплекс» ЖШС-мен келісімшарт түзілді. Мердігер мекеменің тәжірибесі мол, Қазақстанның көптеген қаласының жоспарын жасауға үлес қосқан, дейді жауапты мамандар. Компанияның шақыруымен Шымкентке Киев, Минск, Санкт-Петербург қалаларынан білікті мамандар келіп, кеңестерімен бөліскен.

Қазіргі таңда бас жоспардың 1-кезеңінің жұмыстары бітті. Бір ай бойы жүретін қоғамдық талқылаудан соң мамандар ұсыныс-талаптарды ескеріп, маңыздысын жоспарға енгізіп, жыл соңына дейін Шымкент қаласының жаңа бас жоспары жасақталады. Концептуалдық тұжырымдама негізінде әзірленген бас жоспар ҚР Премьер-Министрінің келісімінен кейін, ҚР Үкіметінің қаулысымен бекітіледі.

"AQ-QARA.KZ"-ақпарат

Шымкент қаласының әкімі Мұрат Әйтенов №65 Ы.Алтынсарин атындағы мектеп-гимназиясының қосымша ғимарат құрылысымен танысты. Сайрам шағынауданында орналасқан білім ұйымына оқушы санының артуына байланысты ғимарат қажеттілігі туындаған.

2021-2022 оқу жылында №65 мектеп-гимназияда 3 268 оқушы білім алды. Сыйымдылығы 1251 оқушыға арналған ғимаратта 3 ауысымда сабақ жүргізілген. Жаңа ғимарат бой көтерсе, екі ауысымда мыңнан аса оқушы білімін жалғастыра алады. Осы орайда, аталмыш білім ұясына қосымша ғимарат салу қолға алынды.

Жобада 25 оқушыға лайықталған 24 сынып бөлмесі, ашық спорт алаңы, онда футбол мен жүгіруга арналған арнайы жол және есік алдына субұрқақ, қоқыс контейнерлеріне арналған орын қаралып отыр.

Қосымша ғимарат қажеттілігі жөнінде 2021 жылы сынама өткізіліп, оң қорытындысы шыққан. Қазір құрылысқа бөлінген жер көлемінің аумағы 0,92 га, құрылыс ауданы 1995,85 шаршы метрді құрайды.

Осы жылдың наурыз айында басталған жұмыстар 2023 жылдың тамызында аяқталып, нысан пайдалануға берілмек.

Ал,  №45 мектепке жапсарлас ғимарат салынуда.

Шымкент қаласының әкімі М.Әйтенов келесі кезекте  № 45 мектеп-гимназиясының жанына салынып жатқан қосымша құрылыстың жұмыс барысымен танысты. Құрылыс Ш. Қалдаяқов көшесінің бойында 1,2909 га жер аумақта жүргізілуде.

300 орындық жапсарлас ғимараттың бас мердігері – «ЖАҢА АРНА 2002» ЖШС. Жоба бойынша мұнда жаттығу және гимнастикалық сабақтарға арналған спорт залы қарастырылған. Әрбір сынып 25 оқушыға шақталған 12 сынып болмақ. Сонымен бірге қосымша 33 жаңа жұмыс орны құрылады. Құрылысы наурыз айында басталған нысан келесі жылы пайдалануға беріледі деп жоспарланған.

Қос мектептің қосымша құрылыстарын көрген әкім мердігер компанияларға жұмысты сапалы істеуді тапсырды. Балалардың білім ұясының кестеге сай аяқталуын өзі қадағалайтынын да айтты.